ആലപ്പുഴ: തിരഞ്ഞെടുപ്പ് പരാജയത്തിന് പിന്നാലെ യു. പ്രതിഭയ്ക്കും സിപിഐക്കുമെതിരെ കടുത്ത വിമർശനവുമായി വെള്ളാപ്പള്ളി നടേശൻ രംഗത്തെത്തി. സ്വന്തം മകൻ കഞ്ചാവ് കച്ചവടത്തിന് പോകുമ്പോൾ അതിന്റെ പ്രത്യാഘാതങ്ങൾ ഉണ്ടാകുമെന്ന് അവർ ഓർക്കണമായിരുന്നുവെന്നും ഇതെല്ലാം ജനങ്ങൾ നിരീക്ഷിക്കുന്നുണ്ടായിരുന്നുവെന്നും അദ്ദേഹം പറഞ്ഞു. അധികാരമുപയോഗിച്ച് തെറ്റുകളിൽ നിന്ന് രക്ഷപ്പെടാൻ ശ്രമിച്ചാലും വോട്ടർമാർ കൃത്യമായ മറുപടി നൽകുമെന്നതിന്റെ തെളിവാണ് ഈ പരാജയമെന്നും അദ്ദേഹം പരിഹസിച്ചു.
മാത്യു കുഴൽനാടൻ എംഎൽഎയ്ക്കെതിരായ നീക്കങ്ങളിലും വെള്ളാപ്പള്ളി അതൃപ്തി രേഖപ്പെടുത്തി. മുസ്ലിം ലീഗിനെ വിമർശിച്ചതിന്റെ പേരിൽ കുഴൽനാടന്റെ ചിത്രം ഫ്ലക്സിൽ നിന്ന് വെട്ടിമാറ്റിയത് ശരിയായ പ്രവണതയല്ലെന്ന് അദ്ദേഹം പറഞ്ഞു. കഴിവുള്ള ഒരു ജനപ്രതിനിധിയോട് ഇത്തരത്തിൽ പെരുമാറുന്നത് ജനാധിപത്യത്തിന് ചേർന്നതല്ല. ലീഗിനെ പ്രീണിപ്പിക്കാൻ ശ്രമിക്കുന്നവർ സത്യം പറയുന്നവരുടെ വായടപ്പിക്കാനാണ് നോക്കുന്നതെന്നും അദ്ദേഹം ആരോപിച്ചു.
എൽഡിഎഫിന്റെ പരാജയത്തിന് കാരണം തന്റെ പ്രസ്താവനകളാണെന്ന സിപിഐയുടെ വാദങ്ങളെ വെള്ളാപ്പള്ളി തള്ളി. സിപിഐ നേതൃത്വത്തിന്റെ പരാജയവും തെറ്റായ നയങ്ങളുമാണ് അവർക്ക് തിരിച്ചടിയായതെന്ന് അദ്ദേഹം കുറ്റപ്പെടുത്തി. ഭരണത്തിൽ പങ്കാളികളായിരിക്കെ തന്നെ സർക്കാരിനെ തകർക്കാൻ ശ്രമിച്ചവരാണ് സിപിഐയെന്നും മുന്നണിക്കുള്ളിലെ ഐക്യമില്ലായ്മയാണ് ഭരണത്തുടർച്ച നഷ്ടപ്പെടാൻ കാരണമായതെന്നും അദ്ദേഹം വ്യക്തമാക്കി.
മുഖ്യമന്ത്രിയെ നിശ്ചയിക്കുന്ന കാര്യത്തിൽ ഹൈക്കമാൻഡിനാണ് പൂർണ്ണ ഉത്തരവാദിത്തമെന്ന് അദ്ദേഹം പറഞ്ഞു. ഇതിൽ തനിക്ക് പ്രത്യേകിച്ച് പങ്കൊന്നുമില്ലെന്ന് ‘പൂച്ചയ്ക്ക് പൊന്നുരുക്കുന്നിടത്ത് എന്ത് കാര്യം’ എന്ന പഴഞ്ചൊല്ലിലൂടെ അദ്ദേഹം ഓർമ്മിപ്പിച്ചു. വി.ഡി. സതീശനടക്കം മൂന്ന് നേതാക്കളും മുഖ്യമന്ത്രി സ്ഥാനത്തിന് യോഗ്യരാണെന്നാണ് അദ്ദേഹത്തിന്റെ അഭിപ്രായം. എങ്കിലും ഒരു ആലപ്പുഴക്കാരൻ എന്ന നിലയിൽ മുഖ്യമന്ത്രി പദം തന്റെ ജില്ലയിലേക്ക് എത്തുന്നത് സന്തോഷമുള്ള കാര്യമാണെന്ന് അദ്ദേഹം കൂട്ടിച്ചേർത്തു.
