യേശുവിന്റെ ക്രൂശീകരണവും യൂദാസിന്റെ വഞ്ചനയും ആത്മഹത്യയും പരാമർശിച്ചുകൊണ്ട് ബി.ജെ.പി അനുഭാവികളായ ക്രൈസ്തവർക്ക് പരോക്ഷ മുന്നറിയിപ്പുമായി കത്തോലിക്ക സഭയുടെ മുഖപത്രമായ ‘ദീപിക’ രംഗത്തെത്തി. ദുഃഖവെള്ളി ദിനത്തിലെ എഡിറ്റോറിയലിലൂടെയാണ് ഒറ്റുകാരെ രൂക്ഷമായ ഭാഷയിൽ സഭ വിമർശിക്കുന്നത്. ആവശ്യം കഴിഞ്ഞാൽ ഭരണകൂടങ്ങൾക്കും രാഷ്ട്രീയ നേതൃത്വങ്ങൾക്കും ഒറ്റുകാരെക്കൊണ്ട് യാതൊരു പ്രയോജനവുമില്ലെന്നും, ക്രിസ്തുവിനെ ഒറ്റിക്കൊടുത്ത ശേഷം യൂദാസ് ആത്മഹത്യ ചെയ്ത ചരിത്രം ഇതിന് തെളിവാണെന്നും ലേഖനം ഓർമ്മിപ്പിക്കുന്നു.
സീസറിന്റെ ശത്രുവായും രാജ്യദ്രോഹിയായും മുദ്രകുത്തിയാണ് അന്ന് ക്രിസ്തുവിനെ വിചാരണ ചെയ്തത്. ഇന്നും എതിർസ്വരമുയർത്തുന്നവരെ കുരിശിലേറ്റാൻ ഉപയോഗിക്കുന്ന രാഷ്ട്രീയ ആയുധമാണ് ‘ദേശദ്രോഹി’ എന്ന ചാപ്പയെന്ന് മുഖപ്രസംഗം കുറ്റപ്പെടുത്തുന്നു. സ്വന്തം സമുദായത്തെയും ജനങ്ങളെയും ഒറ്റിക്കൊടുക്കുന്നവർ ആധുനിക കാലത്തെ യൂദാസുമാരാണെന്നും, ഭരണകൂടവുമായി സന്ധിചെയ്ത് അധികാരത്തിന്റെ വെള്ളിനാണയങ്ങൾ കൈക്കലാക്കുന്നവർക്കുള്ള ഗൗരവകരമായ മുന്നറിയിപ്പാണ് ദുഃഖവെള്ളിയെന്നും ദീപിക ചൂണ്ടിക്കാട്ടി.
ജറൂസലെമിൽ അന്ന് നടന്ന ഒരു കൊലപാതകവും ഒരു ആത്മഹത്യയും സമകാലിക രാഷ്ട്രീയ സാഹചര്യങ്ങളുമായി ചേർത്താണ് ലേഖനം വിശകലനം ചെയ്യുന്നത്. അധികാര കേന്ദ്രങ്ങളെ വിമർശിച്ചതിനാണ് ക്രിസ്തു കൊല്ലപ്പെട്ടതെങ്കിൽ, ഭയന്ന് തലകുനിക്കാതെ സ്വന്തം നിലപാടിൽ അദ്ദേഹം ഉറച്ചുനിന്നു. എന്നാൽ ക്രിസ്തുവിനോടൊപ്പം അത്താഴത്തിനിരിക്കുകയും അതേസമയം തന്നെ ഭരണകൂടത്തോട് ചേർന്ന് നിന്ന് സ്വന്തം ജനതയെ വഞ്ചിക്കുകയും ചെയ്യുന്നവർക്കുള്ള തിരിച്ചടിയാണ് യൂദാസിന്റെ പരിണാമം. ഒറ്റുകാശ് ദേവാലയത്തിലേക്ക് വലിച്ചെറിഞ്ഞ് തൂങ്ങിമരിക്കേണ്ടി വന്ന യൂദാസിന്റെ ഗതി തന്നെയാണ് ഇത്തരം രാഷ്ട്രീയ കൂടുമാറ്റക്കാരെയും കാത്തിരിക്കുന്നതെന്ന് സഭ വ്യക്തമാക്കുന്നു.
കാര്യം സാധിച്ചു കഴിഞ്ഞാൽ ഭരണകൂടങ്ങൾ വഞ്ചകരെ ഉപേക്ഷിക്കുമെന്ന സത്യം ചരിത്രം സാക്ഷ്യപ്പെടുത്തുന്നു. ക്രിസ്തുവിനെ കുരിശിലേറ്റിയ സ്ഥലവും യൂദാസ് മരിച്ച സ്ഥലവും തമ്മിൽ ചെറിയ ദൂരമേയുള്ളൂവെന്നും, ഇത് പറയാതിരുന്നാൽ ദുഃഖവെള്ളിയുടെ ചരിത്രം അപൂർണ്ണമായിരിക്കുമെന്നും എഡിറ്റോറിയൽ പറയുന്നു. പാവപ്പെട്ടവന്റെയും ന്യൂനപക്ഷങ്ങളുടെയും ദളിതരുടെയും രക്തം കയ്യിലുണ്ടോ എന്ന് ഓരോരുത്തരും സ്വയം ചോദിക്കണമെന്നും ലേഖനം ആവശ്യപ്പെടുന്നുണ്ട്. മടിശീലയിലെ പണം എങ്ങനെ വന്നതാണെന്നും ഏതാണ് തങ്ങൾക്കായി ഒരുക്കപ്പെട്ടിരിക്കുന്ന അവസാന ഇടമെന്നും ചിന്തിക്കണമെന്നും പത്രം ഓർമ്മിപ്പിച്ചു.
സഭയുടെ ഈ നിലപാട് ബി.ജെ.പി അനുഭാവികളായ നേതാക്കൾക്ക് വലിയ തിരിച്ചടിയാണ്. കഴിഞ്ഞ ദിവസം പൂഞ്ഞാറിലെ എൻ.ഡി.എ സ്ഥാനാർത്ഥി പി.സി. ജോർജ് സഭാ പിതാക്കന്മാർക്കെതിരെ കടുത്ത ഭാഷയിൽ സംസാരിച്ചിരുന്നു. ബി.ജെ.പി എന്ന് കേട്ടാൽ ഹാലിളകുന്ന ചില പിതാക്കന്മാർക്ക് തലയ്ക്ക് സ്ഥിരതയില്ലെന്നും ബി.ജെ.പിയോളം ക്രിസ്ത്യാനികളെ പരിഗണിച്ച മറ്റൊരു പാർട്ടിയില്ലെന്നും അദ്ദേഹം വാദിച്ചിരുന്നു. ഇതിനുള്ള മറുപടി കൂടിയായാണ് സഭയുടെ ഔദ്യോഗിക പത്രത്തിലൂടെ ഇത്തരമൊരു കടുത്ത രാഷ്ട്രീയ നിലപാട് പുറത്തുവന്നിരിക്കുന്നത്.
