കലയ്ക്ക് വേണ്ടിയായാലും വിനോദത്തിന് വേണ്ടിയായാലും മൃഗങ്ങളെ വെറും ഉപകരണങ്ങളായി കാണുന്നത് ശരിയല്ലെന്ന ചർച്ചകൾക്ക് വഴിതെളിച്ചിരിക്കുകയാണ് ജയ്പൂരിലെ ഒരു ഫോട്ടോഷൂട്ട്. വിദേശിയായ ആർട്ട് ഫോട്ടോഗ്രാഫർ ജൂലിയ ബുരുലേവ, ജയ്പൂർ യാത്രയ്ക്കിടയിൽ ഒരു ആനയെ പൂർണ്ണമായും പിങ്ക് നിറമടിച്ച് ഫോട്ടോഷൂട്ട് നടത്തിയതാണ് സോഷ്യൽ മീഡിയയിൽ വലിയ പ്രതിഷേധത്തിന് കാരണമായത്. രാജസ്ഥാനിലെ സംസ്കാരത്തിന്റെയും വാസ്തുവിദ്യയുടെയും അടയാളമായി ആനകളെ കാണുന്നതിനാലാണ് ഇത്തരമൊരു പരീക്ഷണം നടത്തിയതെന്നാണ് ജൂലിയയുടെ വിശദീകരണം.
ആറാഴ്ചയോളം നീണ്ട തയ്യാറെടുപ്പുകൾക്കൊടുവിലാണ് ജൂലിയ ഈ ഫോട്ടോഷൂട്ട് നടത്തിയത്. ശരീരത്തിൽ പിങ്ക് നിറം പൂശിയ ഒരു മോഡലിനെ ആനയുടെ മുകളിൽ ഇരുത്തിയായിരുന്നു ചിത്രീകരണം. പ്രകൃതിദത്തമായ നിറങ്ങൾ (Organic colours) മാത്രമാണ് ഉപയോഗിച്ചതെന്നും ആനയ്ക്ക് യാതൊരുവിധ ദോഷവും സംഭവിച്ചിട്ടില്ലെന്നും അവർ അവകാശപ്പെട്ടു. എന്നാൽ ഈ ചിത്രങ്ങൾ പുറത്തുവന്നതോടെ വലിയ രീതിയിലുള്ള വിമർശനങ്ങളാണ് ഉയർന്നത്. ആനകളുടെ ചർമ്മം വളരെ സെൻസിറ്റീവ് ആണെന്നും വെറും ചിത്രഭംഗിക്ക് വേണ്ടി ഒരു മിണ്ടാപ്രാണിയെ ഇത്തരത്തിൽ ബുദ്ധിമുട്ടിക്കുന്നത് ക്രൂരതയാണെന്നും പലരും പ്രതികരിച്ചു.
ഇക്കാലത്ത് ഇത്തരം ചിത്രങ്ങൾക്കായി ആർട്ടിഫിഷ്യൽ ഇന്റലിജൻസ് (AI) ഉപയോഗിക്കാമെന്നിരിക്കെ എന്തിനാണ് ആനയെ കഷ്ടപ്പെടുത്തിയതെന്ന് സോഷ്യൽ മീഡിയ ഉപയോക്താക്കൾ ചോദിക്കുന്നു. വിനോദസഞ്ചാര കേന്ദ്രങ്ങളിൽ ആനകൾ അനുഭവിക്കുന്ന പീഡനങ്ങൾക്കെതിരെ വൈൽഡ് ലൈഫ് എസ്.ഒ.എസ് (Wildlife SOS), പെറ്റ (PETA) തുടങ്ങിയ സംഘടനകൾ നിരന്തരം ശബ്ദമുയർത്തുന്ന കാര്യവും പ്രതിഷേധക്കാർ ചൂണ്ടിക്കാട്ടി. കലയോടുള്ള താൽപ്പര്യത്തെ മാനിക്കുന്നുവെങ്കിലും ഇനിയൊരിക്കലും മൃഗങ്ങളെ ഇത്തരത്തിൽ ഉപയോഗിക്കരുതെന്ന് ജയ്പൂരിലെ സ്വദേശികൾ തന്നെ കമന്റുകളിലൂടെ അഭ്യർത്ഥിച്ചു. ആനകൾ ബുദ്ധിശക്തിയുള്ള ജീവികളാണെന്നും അവയെ ഇത്തരം അസ്വാഭാവിക സാഹചര്യങ്ങളിൽ നിർത്തുന്നത് വലിയ മാനസിക സമ്മർദ്ദമുണ്ടാക്കുമെന്നും വിദഗ്ധരും മുന്നറിയിപ്പ് നൽകുന്നു.
