ഒരു വിദ്യാർത്ഥി സ്വന്തമായി നിർമ്മിച്ച തുണി മടക്കുന്ന യന്ത്രത്തിന്റെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്. സ്കൂൾ യൂണിഫോം ധരിച്ച ഒരു കൊച്ചു മിടുക്കൻ വളരെ ലളിതമായ വസ്തുക്കൾ ഉപയോഗിച്ച് തുണികൾ വേഗത്തിൽ മടക്കുന്നത് എങ്ങനെയെന്ന് ഈ വീഡിയോയിലൂടെ കാണിച്ചുതരുന്നു. ഇൻസ്റ്റാഗ്രാമിൽ പങ്കുവെക്കപ്പെട്ട ഈ വീഡിയോയിലെ യന്ത്രം നിർമ്മിച്ചിരിക്കുന്നത് നിരപ്പായ ബോർഡുകളും ഹിഞ്ചുകളും ലിവർ മെക്കാനിസവും ഉപയോഗിച്ചാണ്.
ഈ ഉപകരണത്തിന് ഇടത്, വലത്, താഴെ എന്നിങ്ങനെ മൂന്ന് ഭാഗങ്ങളാണുള്ളത്. ഓരോ ഭാഗങ്ങളും കൃത്യമായ ക്രമത്തിൽ ചലിപ്പിക്കുമ്പോൾ തുണികൾ കൃത്യമായി മടങ്ങി വരുന്നു. വീഡിയോയിൽ ഒരു ഷർട്ട് ബോർഡിന് മുകളിൽ നിവർത്തിയിട്ട ശേഷം വശങ്ങളിലെ പാനലുകൾ ഉള്ളിലേക്ക് മടക്കുമ്പോൾ ഷർട്ടിന്റെ കൈകളും വശങ്ങളും കൃത്യമായി മടങ്ങുന്നു. അവസാനമായി താഴത്തെ പാനൽ കൂടി മടക്കുന്നതോടെ ഷർട്ട് വളരെ ഭംഗിയായി ദീർഘചതുരാകൃതിയിൽ മടക്കി ലഭിക്കും. കൈകൊണ്ട് മടക്കുന്നതിനേക്കാൾ വളരെ കുറഞ്ഞ സമയം കൊണ്ട് ഈ യന്ത്രം വഴി ജോലി തീർക്കാൻ സാധിക്കും.
ക്ലാസ് മുറികളിൽ നിന്ന് എത്രത്തോളം ഉപകാരപ്രദമായ കണ്ടുപിടുത്തങ്ങൾ വരാമെന്നതിന്റെ മികച്ച ഉദാഹരണമാണിതെന്ന് സോഷ്യൽ മീഡിയ ഉപയോക്താക്കൾ പുകഴ്ത്തുന്നു. വലിയ കമ്പനികളിൽ നിന്നോ ലാബുകളിൽ നിന്നോ മാത്രമല്ല പുതിയ ആശയങ്ങൾ ഉണ്ടാകുന്നതെന്ന് ഈ കുട്ടി തെളിയിച്ചിരിക്കുകയാണ്. ദൈനംദിന ജീവിതത്തിലെ ചെറിയ പ്രശ്നങ്ങൾക്ക് ലളിതമായ പരിഹാരം കണ്ടെത്താനുള്ള ആഗ്രഹമാണ് ഇത്തരം മികച്ച കണ്ടുപിടുത്തങ്ങളിലേക്ക് നയിക്കുന്നത്.
