മുല്ലൻപൂരിൽ നടന്ന ഐപിഎൽ എലിമിനേറ്റർ മത്സരത്തിൽ സൺറൈസേഴ്സ് ഹൈദരാബാദിനെ 47 റൺസിന് തകർത്ത് രാജസ്ഥാൻ റോയൽസ് രണ്ടാം ക്വാളിഫയറിലേക്ക് മുന്നേറി. രാജസ്ഥാൻ ഉയർത്തിയ 244 റൺസ് എന്ന കൂറ്റൻ വിജയലക്ഷ്യം പിന്തുടർന്ന ഹൈദരാബാദിന് 19.2 ഓവറിൽ 196 റൺസെടുക്കാനേ സാധിച്ചുള്ളൂ. ബാറ്റിങ്ങിലും ബൗളിങ്ങിലും ഒരുപോലെ മികച്ചുനിന്ന രാജസ്ഥാൻ, വെള്ളിയാഴ്ച നടക്കുന്ന രണ്ടാം ക്വാളിഫയറിൽ ഗുജറാത്ത് ടൈറ്റൻസിനെ നേരിടും.
കൂറ്റൻ ലക്ഷ്യത്തിലേക്ക് ബാറ്റിങ് തുടങ്ങിയ ഹൈദരാബാദിന് രണ്ടാം പന്തിൽ തന്നെ ഓപ്പണർ അഭിഷേക് ശർമയെ നഷ്ടമായെങ്കിലും ഇഷാൻ കിഷനും ട്രാവിസ് ഹെഡും ചേർന്ന് 15 പന്തിൽ 51 റൺസ് അടിച്ചുകൂട്ടി പ്രതീക്ഷ നൽകി. എന്നാൽ 11 പന്തിൽ 33 റൺസെടുത്ത ഇഷാനെ മൂന്നാം ഓവറിൽ ജോഫ്ര ആർച്ചർ പുറത്താക്കിയത് അവർക്ക് തിരിച്ചടിയായി. തുടർന്ന് സമാരൻ രവിചന്ദ്രൻ (1), ട്രാവിസ് ഹെഡ് (17), ഹെൻറിച്ച് ക്ലാസൻ (18) എന്നിവർ പെട്ടെന്ന് പുറത്തായതോടെ ഹൈദരാബാദ് അഞ്ചിന് 81 റൺസെന്ന നിലയിലേക്ക് തകർന്നു.
തകർച്ചയിലായ ഹൈദരാബാദിനെ ആറാം വിക്കറ്റിൽ ഒന്നിച്ച സലിൽ അറോറയും നിതീഷ് കുമാർ റെഡ്ഡിയും ചേർന്ന് 24 പന്തിൽ 56 റൺസ് നേടി അൽപ്പമൊന്ന് കരകയറ്റി. എന്നാൽ നിതീഷിനെയും (38) പിന്നീട് അറോറയെയും (35) പുറത്താക്കി രവീന്ദ്ര ജഡേജ രാജസ്ഥാന് വിജയം ഉറപ്പാക്കി. ശിവാംഗ് കുമാർ 27 റൺസ് നേടി ചെറുത്തുനിന്നെങ്കിലും ഹൈദരാബാദ് ഓൾഔട്ടാവുകയായിരുന്നു. രാജസ്ഥാനായി ആർച്ചർ മൂന്നും, നാന്ദ്രേ ബർഗർ, ജഡേജ, സുഷാന്ത് മിശ്ര എന്നിവർ രണ്ട് വിക്കറ്റ് വീതവും വീഴ്ത്തി.
നേരത്തെ ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ രാജസ്ഥാൻ, 15 വയസ്സുകാരൻ വൈഭവ് സൂര്യവംശിയുടെയും ധ്രുവ് ജുറെലിന്റെയും തകർപ്പൻ ബാറ്റിങ് കരുത്തിലാണ് 20 ഓവറിൽ 8 വിക്കറ്റ് നഷ്ടത്തിൽ 243 റൺസ് അടിച്ചുകൂട്ടിയത്. വെറും 29 പന്തുകൾ നേരിട്ട വൈഭവ് 12 സിക്സറുകളും 5 ഫോറുകളുമടക്കം 97 റൺസെടുത്ത് സെഞ്ചുറിക്ക് തൊട്ടരികെ പ്രഫുൽ ഹിംഗെയുടെ പന്തിൽ പുറത്താവുകയായിരുന്നു. പാറ്റ് കമ്മിൻസ് എറിഞ്ഞ മൂന്നാം ഓവറിൽ 25 റൺസ് അടിച്ചാണ് വൈഭവ് തന്റെ കളി തുടങ്ങിയത്.
വെറും 16 പന്തിൽ അർധസെഞ്ചുറി തികച്ച വൈഭവ്, ഒരു ഐപിഎൽ സീസണിൽ ഏറ്റവും കൂടുതൽ സിക്സറുകൾ നേടുന്ന താരമെന്ന ക്രിസ് ഗെയ്ലിന്റെ റെക്കോഡും മറികടന്നു. നിലവിൽ 65 സിക്സറുകളാണ് ഈ കുട്ടിത്താരത്തിന്റെ പേരിലുള്ളത്. ഐപിഎൽ നോക്കൗട്ട് ചരിത്രത്തിലെ ഏറ്റവും വേഗമേറിയ അർധസെഞ്ചുറി സ്വന്തമാക്കിയ വൈഭവ്, യശസ്വി ജയ്സ്വാളിനൊപ്പം (29) ചേർന്ന് ഒന്നാം വിക്കറ്റിൽ 48 പന്തിൽ 125 റൺസ് കൂട്ടിച്ചേർത്തു. പിന്നാലെയെത്തിയ ധ്രുവ് ജുറെൽ 21 പന്തിൽ 50 റൺസ് നേടി സ്കോർ വേഗത്തിലാക്കി.
ക്യാപ്റ്റൻ റിയാൻ പരാഗ് 12 പന്തിൽ 26 റൺസ് നേടി പിന്തുണ നൽകിയെങ്കിലും, ഇരുവരും പുറത്തായതോടെ രാജസ്ഥാന്റെ റൺവേഗത കുറഞ്ഞു. ഒരു ഘട്ടത്തിൽ 270 റൺസ് കടക്കുമെന്ന് തോന്നിച്ചെങ്കിലും ഡോണോവൻ ഫെരെയ്ര (12), ദസുൻ ഷനക (5), ജോഫ്ര ആർച്ചർ (4), രവീന്ദ്ര ജഡേജ (12*) എന്നിവരടങ്ങുന്ന പിൻനിരയ്ക്ക് അവസാന ഓവറുകളിൽ തകർപ്പൻ പ്രകടനം പുറത്തെടുക്കാനായില്ല. ഹൈദരാബാദ് നിരയിൽ പ്രഫുൽ ഹിംഗെ മൂന്ന് വിക്കറ്റുകൾ വീഴ്ത്തി മികച്ച പ്രകടനം നടത്തി.
