മരണപ്പെട്ട മുൻ മോഡലായ ട്വിഷാ ശർമ്മയ്ക്കെതിരെ കടുത്ത ആരോപണങ്ങളുമായി ഭർതൃമാതാവ് ഗിരിബാല സിംഗ് വീണ്ടും രംഗത്ത്. ട്വിഷാ മയക്കുമരുന്നിന് അടിമയായിരുന്നുവെന്നും ഇരട്ട വ്യക്തിത്വമുള്ള ആളായിരുന്നുവെന്നുമാണ് ഇവരുടെ പുതിയ വാദം. എന്നാൽ ഇത് ട്വിഷായുടെ പേര് നശിപ്പിക്കാനുള്ള ബോധപൂർവ്വമായ ശ്രമമാണെന്ന് കുടുംബം ആരോപിക്കുന്നു.
മരണപ്പെട്ട 31-കാരിയായ ട്വിഷാ ശർമ്മയ്ക്കെതിരെ മുൻ ജഡ്ജി കൂടിയായ ഭർതൃമാതാവ് ഗിരിബാല സിംഗ് ചൊവ്വാഴ്ചയാണ് പുതിയ ആരോപണങ്ങൾ ഉന്നയിച്ചത്. ട്വിഷാ മയക്കുമരുന്ന് ഉപയോഗിച്ചിരുന്നതായും ‘ഇരട്ട വ്യക്തിത്വം’ പ്രകടിപ്പിച്ചിരുന്നതായും മാനസികാരോഗ്യ ചികിത്സയിലായിരുന്നുവെന്നും ഇവർ അവകാശപ്പെടുന്നു. എന്നാൽ ഭോപ്പാലിൽ വെച്ചുണ്ടായ ട്വിഷായുടെ മരണത്തിന് ശേഷം അവളുടെ സ്വഭാവത്തെ മോശമായി ചിത്രീകരിക്കാനും തങ്ങളെ പീഡിപ്പിക്കാനുമാണ് ഭർതൃവീട്ടുകാർ ശ്രമിക്കുന്നതെന്ന് ട്വിഷായുടെ കുടുംബം കുറ്റപ്പെടുത്തി.
ഇതിനകം തന്നെ വലിയ വിവാദമായ ഈ കേസിനെ കൂടുതൽ വഷളാക്കുന്ന രീതിയിലാണ് ഗിരിബാല സിംഗിന്റെ പുതിയ വെളിപ്പെടുത്തലുകൾ. ട്വിഷാ പൊതുവേദിയിലും വീട്ടിലും വ്യത്യസ്തമായ രീതിയിലാണ് പെരുമാറിയിരുന്നതെന്നും വീട്ടുജോലികൾ ചെയ്യാൻ പലപ്പോഴും വിസമ്മതിച്ചിരുന്നതായും അവർ ആരോപിച്ചു. എന്റെ മുന്നിൽ വെച്ച് ട്വിഷാ നന്നായി പെരുമാറുമെങ്കിലും അടിസ്ഥാനപരമായ വീട്ടുജോലികൾ ചെയ്യാൻ പെട്ടെന്ന് തന്നെ വിസമ്മതിക്കുമായിരുന്നുവെന്ന് ഗിരിബാല സിംഗ് പറഞ്ഞു.
ട്വിഷായുടെ ജീവിതരീതിയെയും സ്വാതന്ത്ര്യത്തെയും ചോദ്യം ചെയ്ത അവർ, വീട്ടിൽ ആരോടും പറയാതെയാണ് ട്വിഷാ പുറത്തുപോയിരുന്നതെന്നും കൂട്ടിച്ചേർത്തു. ട്വിഷാ വളരെ ഫ്രീയായി ജീവിക്കാൻ ആഗ്രഹിച്ച വ്യക്തിയായിരുന്നുവെന്നും എങ്ങോട്ടാണ് പോകുന്നതെന്ന് തങ്ങളോട് പറഞ്ഞിരുന്നില്ലെന്നുമാണ് ഇവരുടെ വാദം. അഭിഭാഷകനായ സമർത്ഥ് സിംഗുമായുള്ള വിവാഹം കഴിഞ്ഞ് വെറും അഞ്ച് മാസങ്ങൾക്ക് ശേഷം, മെയ് 12-നാണ് ഭോപ്പാലിലെ ഭർതൃവീട്ടിൽ ട്വിഷാ ശർമ്മയെ തൂങ്ങിമരിച്ച നിലയിൽ കണ്ടെത്തിയത്. ഈ മരണത്തിൽ അന്വേഷണം ഊർജ്ജിതമായി നടക്കുന്നതിനിടയിലാണ് പുതിയ വിവാദങ്ങൾ.
നേരത്തെ ഗിരിബാല സിംഗ് സമർപ്പിച്ച മുൻകൂർ ജാമ്യാപേക്ഷയിലും ട്വിഷാ മയക്കുമരുന്ന് ഉപയോഗിച്ചിരുന്നതായും കഞ്ചാവ് അമിതമായി ഉപയോഗിച്ചതിനെ തുടർന്ന് മാനസിക അസ്വസ്ഥതകൾ കാണിച്ചിരുന്നതായും ആരോപിച്ചിരുന്നു. ഇതിന്റെ തുടർച്ചയായാണ് ഇപ്പോഴത്തെ പുതിയ അവകാശവാദങ്ങളും. എന്നാൽ ഇപ്പോൾ പരസ്യമായി ‘ഇരട്ട വ്യക്തിത്വം’ എന്ന ആരോപണം കൂടി ഉന്നയിച്ചതോടെ ട്വിഷായുടെ കുടുംബം കടുത്ത അമർഷത്തിലാണ്. ട്വിഷായുടെ മരണം മാനസികാരോഗ്യ പ്രശ്നങ്ങളും ലഹരിമരുന്ന് ഉപയോഗവും മൂലമാണെന്ന് വരുത്തിത്തീർക്കാനാണ് ഭർതൃവീട്ടുകാർ നിരന്തരം ശ്രമിക്കുന്നത്. എന്നാൽ ഈ വാദങ്ങളെ പൂർണ്ണമായി തള്ളിക്കളയുന്ന പെൺകുട്ടിയുടെ കുടുംബം, മരണശേഷവും മകളെ അപമാനിക്കാനുള്ള ആസൂത്രിത ശ്രമമാണിതെന്ന് ആരോപിക്കുന്നു.
ഗിരിബാല സിംഗിന്റെ വാദങ്ങളെ തുടർന്ന് ട്വിഷാ ചികിത്സ തേടിയിരുന്നു എന്ന് പറയപ്പെടുന്ന ഭോപ്പാലിലെ പ്രശസ്ത മാനസികരോഗ വിദഗ്ദ്ധൻ ഡോ. സത്യകാന്ത് ത്രിവേദിയുടെ ക്ലിനിക്കിൽ ഒരു മാധ്യമസംഘം എത്തിയിരുന്നു. എന്നാൽ രോഗിയുടെ വിവരങ്ങൾ രഹസ്യമായി സൂക്ഷിക്കേണ്ട ബാധ്യതയുള്ളതിനാൽ ട്വിഷായെക്കുറിച്ചുള്ള യാതൊരു വിവരവും വെളിപ്പെടുത്താൻ ഡോക്ടർ തയ്യാറായില്ല. നിയമപരമായ കാരണങ്ങളാൽ ട്വിഷായെ സംബന്ധിച്ച വിശദാംശങ്ങൾ പങ്കുവെക്കാൻ കഴിയില്ലെന്നാണ് ഡോ. സത്യകാന്ത് ത്രിവേദി വ്യക്തമാക്കിയത്. ഡോക്ടർ പ്രതികരിക്കാൻ വിസമ്മതിച്ചതോടെ കേസ് കൂടുതൽ നിഗൂഢതകളിലേക്ക് നീങ്ങുകയാണ്.
അതേസമയം, പ്രതിഭാഗം ഉന്നയിക്കുന്ന ആരോപണങ്ങളെ ട്വിഷായുടെ കുടുംബം ശക്തമായി എതിർക്കുന്നു. ക്രിമിനൽ കേസ് ദുർബലപ്പെടുത്താൻ വേണ്ടിയാണ് ഭർതൃവീട്ടുകാർ അവളുടെ ഓർമ്മകളെപ്പോലും അപമാനിക്കുന്നതെന്ന് കുടുംബം ആരോപിച്ചു. ഭർതൃവീട്ടിൽ വെച്ച് ട്വിഷാ കടുത്ത വൈകാരിക പീഡനങ്ങൾ അനുഭവിച്ചിരുന്നതായും ഗർഭധാരണവുമായി ബന്ധപ്പെട്ട് മാനസികമായി പീഡിപ്പിക്കപ്പെട്ടിരുന്നതായും അവളുടെ പിതാവ് ആവർത്തിച്ചു പറഞ്ഞു.
തനിക്ക് ഭയവും ശ്വാസംമുട്ടലും തോന്നുന്നുവെന്ന് ട്വിഷാ വ്യക്തമാക്കുന്ന വാട്സാപ്പ് ചാറ്റുകളും കുടുംബം തെളിവായി ചൂണ്ടിക്കാണിക്കുന്നു. മരണത്തിലെ അസ്വാഭാവികതകൾ, പോസ്റ്റ്മോർട്ടം റിപ്പോർട്ടിൽ കണ്ടെത്തിയ പരിക്കുകൾ, കാണാതായ തൂക്കുകയറിനെച്ചൊല്ലിയുള്ള തർക്കങ്ങൾ തുടങ്ങി നിരവധി ചോദ്യങ്ങൾക്ക് ഇപ്പോഴും മറുപടി ലഭിക്കാത്തതിനാൽ ഈ കേസ് കൂടുതൽ സങ്കീർണ്ണമായി തുടരുകയാണ്.
