അൺഹെൽത്തി എന്ന് നമ്മൾ തെറ്റിദ്ധരിക്കാറുള്ള ചില ഭക്ഷണങ്ങളുണ്ട്. കാലങ്ങളായി ആളുകൾ മോശമെന്ന് കരുതുന്ന ചില ഭക്ഷണങ്ങൾ യഥാർത്ഥത്തിൽ ആരോഗ്യത്തിന് വളരെ നല്ലതാണ്. അമിതമായ ഉപയോഗം കൊണ്ടോ തെറ്റായ ധാരണകൾ കൊണ്ടോ ആണ് ഇത്തരം ഭക്ഷണങ്ങൾക്ക് മോശം പേര് വന്നത്. അത്തരത്തിൽ ആരോഗ്യത്തിന് ദോഷകരമാണെന്ന് കരുതപ്പെടുന്ന, എന്നാൽ രഹസ്യമായി വൻ ആരോഗ്യഗുണങ്ങൾ നൽകുന്ന അഞ്ച് ഭക്ഷണങ്ങളെക്കുറിച്ച് അറിയാം.
ആദ്യത്തേത് ഡാർക്ക് ചോക്ലേറ്റാണ്. ഇത് വെറുമൊരു മധുരപലഹാരം മാത്രമല്ല. ആന്റിഓക്സിഡന്റുകളും വീക്കം കുറയ്ക്കാൻ സഹായിക്കുന്ന ഫ്ലേവനോയിഡുകളും ഇതിൽ ധാരാളമുണ്ട്. ഇത് ഹൃദയാരോഗ്യം മെച്ചപ്പെടുത്താനും സഹായിക്കും. എങ്കിലും ഭക്ഷണത്തിന് ശേഷം വളരെ ചെറിയൊരു കഷണം മാത്രം കഴിക്കാൻ ശ്രദ്ധിക്കുക.
രണ്ടാമത്തേത് ഉരുളക്കിഴങ്ങാണ്. തടി കൂട്ടുമെന്ന പേരിൽ പലരും ഒഴിവാക്കുന്ന ഉരുളക്കിഴങ്ങ് പൊട്ടാസ്യം, വൈറ്റമിൻ സി, നാരുകൾ എന്നിവയാൽ സമ്പന്നമാണ്. പുഴുങ്ങിയോ ബേക്ക് ചെയ്തോ കഴിക്കുന്നത് വ്യായാമത്തിന് ശേഷം ശരീരത്തിന് ആവശ്യമായ കാർബോഹൈഡ്രേറ്റ് നൽകും. എന്നാൽ ചിപ്സ് രൂപത്തിലോ വറുത്തോ കഴിക്കുന്നത് ഒഴിവാക്കണം.
മൂന്നാമത്തേത് ചീസാണ്. ഇത് ശരീരത്തിന് കേടാണെന്ന് കരുതാറുണ്ടെങ്കിലും പ്രോട്ടീൻ, കാൽസ്യം, വൈറ്റമിനുകൾ എന്നിവയുടെ മികച്ചൊരു കലവറയാണിത്. എന്നാൽ ഉയർന്ന കലോറിയും പൂരിത കൊഴുപ്പും ഉള്ളതിനാൽ പാകത്തിന് മാത്രം കഴിക്കുക.
നാലാമത്തേത് മുട്ടയുടെ മഞ്ഞക്കരു ആണ്. കൊളസ്ട്രോൾ കൂട്ടുമെന്നും തടി കൂട്ടുമെന്നും ഭയന്ന് പലരും മുട്ടയുടെ മഞ്ഞ ഒഴിവാക്കി വെള്ള മാത്രം കഴിക്കാറുണ്ട്. എന്നാൽ വൈറ്റമിൻ ഡി, പ്രധാനപ്പെട്ട മറ്റ് വൈറ്റമിനുകൾ, ആരോഗ്യകരമായ കൊഴുപ്പ് എന്നിവ അടങ്ങിയിരിക്കുന്നത് മഞ്ഞക്കരുവിലാണ്. പച്ചക്കറികൾക്കൊപ്പം ഇത് കഴിക്കുന്നത് ശരീരത്തിന് ഏറെ നല്ലതാണ്.
അഞ്ചാമത്തേത് വെള്ളച്ചോറാണ്. അമിതമായി കാർബോഹൈഡ്രേറ്റ് അടങ്ങിയിട്ടുണ്ടെന്ന് കരുതി പലരും ചോറ് ഒഴിവാക്കാറുണ്ട്. എന്നാൽ എളുപ്പത്തിൽ ദഹിക്കുന്നതും ഗ്ലൂട്ടൻ ഇല്ലാത്തതുമായ ഊർജ്ജസ്രോതസ്സാണ് അരിഭക്ഷണം. ചോറിനൊപ്പം പരിപ്പോ രാജ്മയോ പോലുള്ള പ്രോട്ടീൻ അടങ്ങിയ ഭക്ഷണങ്ങൾ ഉൾപ്പെടുത്തിയാൽ സമീകൃതമായ ആഹാരമായി അത് മാറും.
ഏതൊരു നല്ല ഭക്ഷണവും അമിതമായി കഴിച്ചാൽ ദോഷം ചെയ്യും. പഴങ്ങളായാലും നട്സ് ആയാലും അമിതമായാൽ കലോറി കൂടും. അതുകൊണ്ട് ശരിയായ അളവിൽ കഴിക്കുക (portion control) എന്നതാണ് പ്രധാനം. ശരിയായ ആഹാരം തിരഞ്ഞെടുക്കുന്നതിനോടൊപ്പം അത് പാകമായ അളവിൽ കഴിക്കുന്നതിലാണ് യഥാർത്ഥ ആരോഗ്യം കുടികൊള്ളുന്നത്.
