മുംബൈയിലെ വാങ്കഡെ സ്റ്റേഡിയത്തിൽ നടന്ന ആവേശകരമായ ‘എൽക്ലാസിക്കോ’ പോരാട്ടത്തിൽ മുംബൈ ഇന്ത്യൻസിനെ 103 റൺസിന് തകർത്ത് ചെന്നൈ സൂപ്പർ കിങ്സ് കരുത്തുകാട്ടി. സഞ്ജു സാംസൺ മിന്നുന്ന സെഞ്ചറി നേടിയ പിച്ചിൽ മറുപടി ബാറ്റിങ്ങിനിറങ്ങിയ മുംബൈ ബാറ്റർമാർ റൺസ് കണ്ടെത്താൻ പാടുപെടുന്ന കാഴ്ചയാണ് ആരാധകർ കണ്ടത്. ചെന്നൈ ഉയർത്തിയ 208 റൺസ് എന്ന വിജയലക്ഷ്യം പിന്തുടർന്ന മുംബൈയുടെ പോരാട്ടം 19 ഓവറിൽ വെറും 104 റൺസിൽ അവസാനിച്ചു. ഇതോടെ പോയിന്റ് പട്ടികയിൽ ചെന്നൈ അഞ്ചാം സ്ഥാനത്തേക്ക് ഉയർന്നപ്പോൾ, മുംബൈ എട്ടാം സ്ഥാനത്തേക്ക് പിന്തള്ളപ്പെട്ടു.
നാല് വിക്കറ്റുകൾ പിഴുത വെസ്റ്റ് ഇൻഡീസ് സ്പിന്നർ അകീൽ ഹുസൈനാണ് മുംബൈയുടെ നട്ടെല്ലൊടിച്ചത്. നൂർ അഹമ്മദ് രണ്ട് വിക്കറ്റുകൾ വീഴ്ത്തിയപ്പോൾ മുകേഷ് ചൗധരി, അൻഷുൽ കംബോജ്, ജാമി ഓവർടൺ, ഗുർജപ്നീത് സിങ് എന്നിവർ ഓരോ വിക്കറ്റ് വീതം നേടി. മുംബൈ നിരയിൽ തിലക് വർമയും (37) സൂര്യകുമാർ യാദവും (36) മാത്രമാണ് അല്പമെങ്കിലും പൊരുതിയത്. മറ്റാർക്കും തന്നെ രണ്ടക്കം കടക്കാനായില്ല എന്നത് മുംബൈയുടെ ദയനീയ തകർച്ചയുടെ ആഴം വ്യക്തമാക്കുന്നു.
മറുപടി ബാറ്റിങ് തുടങ്ങിയ മുംബൈയ്ക്ക് രണ്ടാം പന്തിൽ സിക്സറടിച്ച് ക്വിന്റൻ ഡിക്കോക്ക് പ്രതീക്ഷ നൽകിയെങ്കിലും ആ ഓവറിൽ തന്നെ ഓപ്പണർ ഡാനിഷ് മലേവാറിനെ പൂജ്യത്തിന് പുറത്താക്കി അകീൽ ഹുസൈൻ തിരിച്ചടിച്ചു. പവർപ്ലേയ്ക്കുള്ളിൽ തന്നെ ഡിക്കോക്കിനെയും നമൻ ധീറിനെയും നഷ്ടമായ മുംബൈ 3 വിക്കറ്റിന് 29 റൺസ് എന്ന നിലയിലായി. സൂര്യകുമാറും തിലക് വർമയും ചേർന്ന് നാലാം വിക്കറ്റിൽ 73 റൺസ് പടുത്തുയർത്തിയെങ്കിലും സ്കോറിങ്ങിന് വേഗതയില്ലാത്തത് തിരിച്ചടിയായി. പന്ത്രണ്ടാം ഓവറിൽ തിലകിനെ പുറത്താക്കി അകീൽ വീണ്ടും പ്രഹരിച്ചതോടെ മുംബൈയുടെ തകർച്ച വേഗത്തിലായി.
ഹാർദിക് പാണ്ഡ്യയും ഷെർഫെയ്ൻ റൂഥർഫോർഡും നൂർ അഹമ്മദിന്റെ പന്തിൽ തുടർച്ചയായി പുറത്തായതോടെ മുംബൈ പൂർണമായും പരാജയം സമ്മതിച്ചു. പിന്നാലെ സൂര്യകുമാറിനെ അകീൽ തന്നെ മടക്കി. വാലറ്റത്ത് ക്രിഷ് ഭഗത്, ഷാർദൂൽ ഠാക്കൂർ, ജസ്പ്രീത് ബുമ്ര എന്നിവരും പെട്ടെന്ന് പുറത്തായതോടെ ചെന്നൈ സീസണിലെ തങ്ങളുടെ മൂന്നാം ജയം ആഘോഷിച്ചു. ബാറ്റിങ്ങിലും ബൗളിങ്ങിലും ആധികാരികമായ പ്രകടനം കാഴ്ചവെച്ചാണ് ചെന്നൈ സ്വന്തം മൈതാനമല്ലാത്ത വാങ്കഡെയിൽ ആധിപത്യം ഉറപ്പിച്ചത്.
നേരത്തെ ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ചെന്നൈയെ സഞ്ജു സാംസണിന്റെ വെടിക്കെട്ട് സെഞ്ചറിയാണ് കൂറ്റൻ സ്കോറിലെത്തിച്ചത്. മുൻപ് ലോകകപ്പ് സെമിയിൽ ഇതേ ഗ്രൗണ്ടിൽ വെച്ച് നഷ്ടമായ സെഞ്ചറി 54 പന്തിൽ 100 റൺസ് തികച്ച് സഞ്ജു ഇത്തവണ സ്വന്തമാക്കി. 10 ഫോറും 6 സിക്സറും അടങ്ങുന്നതായിരുന്നു സഞ്ജുവിന്റെ ഇന്നിങ്സ്. ഇതോടെ ഈ സീസണിലെ തന്റെ രണ്ടാം സെഞ്ചറി കുറിച്ച സഞ്ജു, റൺവേട്ടക്കാരുടെ പട്ടികയിൽ ശുഭ്മൻ ഗില്ലിനെ മറികടന്ന് മൂന്നാം സ്ഥാനത്തെത്തുകയും ചെയ്തു.
സഞ്ജുവിനൊപ്പം ക്യാപ്റ്റൻ ഋതുരാജ് ഗെയ്ക്വാദും ചേർന്ന് ചെന്നൈയ്ക്ക് മികച്ച തുടക്കമാണ് നൽകിയത്. ഹാർദിക് പാണ്ഡ്യയുടെ ഓവറിൽ 19 റൺസെടുത്ത് ഗെയ്ക്വാദ് തകർത്തടിച്ചെങ്കിലും ഗസൻഫർ അദ്ദേഹത്തെ പുറത്താക്കി. സർഫറാസ് ഖാനും ശിവം ദുബെയും വേഗത്തിൽ മടങ്ങിയെങ്കിലും ഡെവാൾഡ് ബ്രവിസ് ചെറിയൊരു വെടിക്കെട്ട് നടത്തി മടങ്ങി. പിന്നീട് കാർത്തിക് ശർമയെ കൂട്ടുപിടിച്ച് സഞ്ജു ടീമിനെ മുന്നോട്ട് നയിച്ചു. അവസാന ഓവറുകളിൽ ജാമി ഓവർടണും സഞ്ജുവും ചേർന്ന് നടത്തിയ ബാറ്റിങ് ചെന്നൈയെ 20 ഓവറിൽ 207 എന്ന മികച്ച നിലയിൽ എത്തിക്കുകയായിരുന്നു.
