തുടർച്ചയായ രണ്ടാം തവണയും ഐപിഎൽ കിരീടം സ്വന്തമാക്കി റോയൽ ചാലഞ്ചേഴ്സ് ബെംഗളൂരു . ഫൈനലിൽ വിരാട് കോലിയുടെ തകർപ്പൻ അർധസെഞ്ചറിയുടെ കരുത്തിലാണ് ആർസിബി വിജയം പിടിച്ചെടുത്തത്. ഓപ്പണർമാരായ വെങ്കിടേഷ് അയ്യരും വിരാട് കോലിയും ചേർന്ന് ടീമിന് മികച്ച തുടക്കമാണ് നൽകിയത്. ഗുജറാത്ത് ഉയർത്തിയ 156 റൺസ് വിജയലക്ഷ്യം പിന്തുടർന്ന ആർസിബിയെ സമ്മർദ്ദത്തിലാക്കാൻ എതിർ ബൗളർമാർക്ക് കഴിഞ്ഞില്ല.
ടീം സ്കോർ 62 റൺസിൽ നിൽക്കെ 32 റൺസെടുത്ത വെങ്കിടേഷ് അയ്യർ പുറത്തായി. പിന്നാലെയെത്തിയ ദേവ്ദത്ത് പടിക്കൽ (1), രജത് പാട്ടീദാർ (15) എന്നിവർ വേഗത്തിൽ മടങ്ങിയെങ്കിലും അത് ബെംഗളൂരുവിന്റെ വിജയക്കുതിപ്പിനെ ബാധിച്ചില്ല. 18 ഓവറിൽ 5 വിക്കറ്റ് നഷ്ടത്തിൽ ആർസിബി ലക്ഷ്യം കണ്ടു. 42 പന്തിൽ 75 റൺസുമായി കോലി പുറത്താകാതെ നിന്ന് ടീമിനെ വിജയത്തിലേക്ക് നയിച്ചു.
നേരത്തെ ടോസ് നഷ്ടപ്പെട്ട് ആദ്യം ബാറ്റിങ്ങിന് ഇറങ്ങിയ ഗുജറാത്ത് ടൈറ്റൻസ് 20 ഓവറിൽ എട്ട് വിക്കറ്റ് നഷ്ടത്തിൽ 155 റൺസാണ് എടുത്തത്. 37 പന്തിൽ പുറത്താകാതെ 50 റൺസ് നേടിയ വാഷിങ്ടൻ സുന്ദറാണ് അവരുടെ ടോപ് സ്കോറർ. നിഷാന്ത് സിദ്ദു (18 പന്തിൽ 20), ജോസ് ബട്ലർ (23 പന്തിൽ 19) എന്നിവർ മാത്രമാണ് ഭേദപ്പെട്ട പ്രകടനം നടത്തിയത്.
പവർപ്ലേ ഓവറുകളിൽ 45 റൺസ് എടുക്കുന്നതിനിടെ തന്നെ ഗുജറാത്തിന് രണ്ട് പ്രധാന വിക്കറ്റുകൾ നഷ്ടമായിരുന്നു. ജോഷ് ഹെയ്സൽവുഡ് എറിഞ്ഞ മൂന്നാം ഓവറിലെ രണ്ടാമത്തെ പന്തിൽ ക്യാപ്റ്റൻ രജത് പാട്ടീദാറിന്റെ മികച്ചൊരു ക്യാച്ചിലാണ് ശുഭ്മൻ ഗിൽ പുറത്തായത്. തുടർന്ന് സായ് സുദർശനെ ഭുവനേശ്വർ കുമാർ, വിക്കറ്റ് കീപ്പർ ജിതേഷ് ശർമയുടെ കൈകളിൽ എത്തിച്ചു. പിന്നാലെ റാസിഖ് സലാമിന്റെ ഓവറിൽ നിഷാന്ത് സിദ്ദുവും മടങ്ങി. സ്കോർ 73-ൽ നിൽക്കെ അപകടകാരിയായ ജോസ് ബട്ലറെ ജിതേഷ് ശർമ സ്റ്റംപിങ്ങിലൂടെ പുറത്താക്കുകയായിരുന്നു.
ഈ ഫൈനൽ മത്സരത്തിൽ ഒടുവിൽ കളിച്ച അതേ ടീമുമായാണ് ആർസിബി കളത്തിലിറങ്ങിയത്. എന്നാൽ ഗുജറാത്ത് ടൈറ്റൻസ് നിരയിൽ സായ് കിഷോറിന് പകരം അർഷദ് ഖാനെ ഫൈനൽ ഇലവനിൽ ഉൾപ്പെടുത്തിയിരുന്നു.
