പ്രണയവിവാഹത്തിന്റെ പേരിൽ യുവാവിനെതിരെ ഭാര്യാപിതാവും സംഘവും ക്രൂരമായ അതിക്രമം നടത്തി. മഹാരാഷ്ട്രയിലെ നാസിക് ജില്ലയിലുള്ള ഭുസാവലിലാണ് സംഭവം. സ്വന്തം ഇഷ്ടപ്രകാരം വിവാഹം കഴിച്ചതിലുള്ള പക മൂലം യുവാവിനെ ക്രൂരമായി മർദ്ദിക്കുകയും നഗ്നനാക്കി റോഡിലൂടെ നടത്തുകയുമായിരുന്നു. ഈ സംഭവവുമായി ബന്ധപ്പെട്ട് പെൺകുട്ടിയുടെ പിതാവ് ഉൾപ്പെടെ അഞ്ചുപേരെ പൊലീസ് ഇതിനോടകം അറസ്റ്റ് ചെയ്തിട്ടുണ്ട്.
ഒന്നര വർഷത്തെ പ്രണയത്തിന് ശേഷം കഴിഞ്ഞ മാർച്ച് 18-നാണ് ഈ ദമ്പതികൾ വിവാഹിതരായത്. വിവാഹശേഷം ഇരുവരും ഭുസാവൽ പൊലീസ് സ്റ്റേഷനിൽ നേരിട്ടെത്തി വിവരം അറിയിക്കുകയും ചെയ്തു. തുടർന്ന് പൊലീസ് പെൺകുട്ടിയുടെ വീട്ടുകാരെ വിളിച്ച് കാര്യങ്ങൾ ബോധ്യപ്പെടുത്തിയെങ്കിലും, ഇതിന് പിന്നാലെ പെൺകുട്ടിയുടെ പിതാവിന്റെ നേതൃത്വത്തിലുള്ള പതിനഞ്ചംഗ സംഘം യുവാവിനെ ആക്രമിക്കാൻ പദ്ധതിയിടുകയായിരുന്നു.
സ്റ്റേഷനിൽ നിന്നിറങ്ങി യുവാവിന്റെ അമ്മാവന്റെ വീട്ടിലേക്ക് പോവുകയായിരുന്ന ദമ്പതികളെ അക്രമിസംഘം പിന്തുടർന്ന് പിടികൂടി. യുവാവിനെ ബലംപ്രയോഗിച്ച് കെട്ടിയിട്ട് ക്രൂരമായി മർദ്ദിക്കുകയും പിന്നീട് നഗ്നനാക്കി പരസ്യമായി റോഡിലൂടെ നടത്തിക്കുകയും ചെയ്തുവെന്നാണ് പരാതി. കേസിൽ ഉൾപ്പെട്ട മറ്റ് പ്രതികൾക്കായി പൊലീസ് തിരച്ചിൽ ഊർജ്ജിതമാക്കിയിട്ടുണ്ട്. അറസ്റ്റിലായ അഞ്ചുപേരെയും കോടതി പൊലീസ് കസ്റ്റഡിയിൽ വിട്ടു.
