കൊൽക്കത്തയും ഗുജറാത്ത് ടൈറ്റൻസും തമ്മിൽ ഈഡൻ ഗാർഡൻസിൽ നടന്ന ആവേശപ്പോരാട്ടത്തിൽ കൊൽക്കത്ത നൈറ്റ് റൈഡേഴ്സിന് 29 റൺസിന്റെ തകർപ്പൻ ജയം. പ്ലേഓഫ് ഉറപ്പാക്കാൻ ഒരു ജയം മാത്രം വേണ്ടിയിരുന്ന ഗുജറാത്തിനെ, ആദ്യം ബാറ്റ് ചെയ്ത് 247 റൺസെടുത്ത കൊൽക്കത്ത വിജയകരമായി തടയുകയായിരുന്നു. കൂറ്റൻ ലക്ഷ്യം പിന്തുടർന്ന ഗുജറാത്തിന് 20 ഓവറിൽ 4 വിക്കറ്റ് നഷ്ടത്തിൽ 218 റൺസെടുക്കാനേ കഴിഞ്ഞുള്ളൂ. ക്യാപ്റ്റൻ ശുഭ്മൻ ഗിൽ (85), ജോസ് ബട്ലർ (57), സായ് സുദർശൻ (53*) എന്നിവർ പൊരുതിയെങ്കിലും ടീമിനെ ജയത്തിലേക്ക് നയിക്കാനായില്ല. ബോളിങ്ങിൽ നാല് ഓവറിൽ 29 റൺസ് മാത്രം നൽകി രണ്ട് പ്രധാന വിക്കറ്റുകൾ വീഴ്ത്തിയ സുനിൽ നരെയ്നും ഒരു വിക്കറ്റെടുത്ത സൗരഭ് ദുബെയും കൊൽക്കത്തയുടെ വിജയത്തിൽ വലിയ പങ്കുവഹിച്ചു. ഈ ജയത്തോടെ കൊൽക്കത്ത 11 പോയിന്റുമായി ഏഴാം സ്ഥാനത്തെത്തിയപ്പോൾ, തോറ്റെങ്കിലും ഗുജറാത്ത് 16 പോയിന്റോടെ രണ്ടാം സ്ഥാനത്ത് തുടരുന്നു.
വലിയൊരു സ്കോർ ലക്ഷ്യമിട്ടിറങ്ങിയ ഗുജറാത്തിന് ഓപ്പണർമാരായ സായ് സുദർശനും ശുഭ്മൻ ഗില്ലും ചേർന്ന് മികച്ച തുടക്കമാണ് നൽകിയത്. എന്നാൽ അഞ്ചാം ഓവറിൽ വിരലിന് പരുക്കേറ്റ സായ് സുദർശന് റിട്ടയർ ഹർട്ടായി താൽക്കാലികമായി ക്രീസ് വിടേണ്ടി വന്നു. പിന്നാലെ വന്ന നിഷാന്ത് സിന്ധു (1) വേഗം പുറത്തായതോടെയാണ് ഗില്ലും ജോസ് ബട്ലറും ഒന്നിച്ചത്. തുടക്കത്തിൽ പതുക്കെ കളിച്ച ഗിൽ പിന്നീട് തകർത്തടിക്കാൻ തുടങ്ങി. പവർപ്ലേയിൽ ഒന്നിന് 56 റൺസെന്ന നിലയിലായിരുന്ന ഗുജറാത്ത് പത്താം ഓവറിൽ നൂറു കടന്നു. 33 പന്തിൽ നിന്ന് ഗിൽ തന്റെ 31–ാം ഐപിഎൽ അർധസെഞ്ചറി പൂർത്തിയാക്കി.
ഈ ഇന്നിങ്സോടെ ഗിൽ ഈ സീസണിൽ 500 റൺസ് തികച്ചു. 2023, 2025 വർഷങ്ങളിലും താരം ഈ നേട്ടം സ്വന്തമാക്കിയിരുന്നു. നിലവിൽ ഈ സീസണിലെ റൺവേട്ടക്കാരിൽ സായ് സുദർശന് പിന്നിൽ രണ്ടാമതാണ് ഗിൽ. മറുവശത്ത് ബട്ലറും മികച്ച പിന്തുണ നൽകിയതോടെ ഈ സഖ്യം 128 റൺസ് കൂട്ടിച്ചേർത്തു. ഒടുവിൽ 17-ാം ഓവറിൽ ഗില്ലിനെ പുറത്താക്കി സുനിൽ നരെയ്നാണ് ഈ കൂട്ടുകെട്ട് പൊളിച്ചത്. ഇത് മത്സരത്തിൽ കൊൽക്കത്തയ്ക്ക് വലിയ വഴിത്തിരിവായി. ഗിൽ പുറത്തായതിനു പിന്നാലെ പരുക്ക് മാറിയ സായ് സുദർശൻ വീണ്ടും ബാറ്റിങ്ങിന് ഇറങ്ങി.
മത്സരത്തിന്റെ 18–ാം ഓവറിൽ കാർത്തിക് ത്യാഗിക്കെതിരെ സായ്യും ബട്ലറും ചേർന്ന് 21 റൺസ് അടിച്ചെടുത്തതോടെ അവസാന രണ്ട് ഓവറിലെ വിജയലക്ഷ്യം 45 റൺസായി കുറഞ്ഞു. എന്നാൽ 19–ാം ഓവറിൽ വെറും അഞ്ച് റൺസ് മാത്രം വിട്ടുകൊടുത്ത സൗരഭ് ദുബെ, അപകടകാരിയായ ജോസ് ബട്ലറെ പുറത്താക്കി കൊൽക്കത്തയ്ക്ക് മേൽക്കൈ നൽകി. അവസാന ഓവറിൽ ഗുജറാത്തിന് ജയിക്കാൻ 40 റൺസ് വേണ്ടിയിരുന്നു. എന്നാൽ അവസാന ഓവർ എറിഞ്ഞ കാമറൂൺ ഗ്രീൻ വെറും 10 റൺസ് മാത്രം വിട്ടുകൊടുക്കുകയും അവസാന പന്തിൽ രാഹുൽ തെവാത്തിയയെ (2) പുറത്താക്കുകയും ചെയ്തതോടെ കൊൽക്കത്ത വിജയം ഉറപ്പിച്ചു.
നേരത്തെ ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ കൊൽക്കത്തയ്ക്ക് ക്യാപ്റ്റൻ അജിൻക്യ രഹാനെയെ (14) തുടക്കത്തിലേ നഷ്ടമായിരുന്നു. എന്നാൽ അർധസെഞ്ചറികൾ നേടിയ ഓപ്പണർ ഫിൻ അലൻ (93), അംഗ്ക്രിഷ് രഘുവംശി (82*), കാമറൂൺ ഗ്രീൻ (52*) എന്നിവരുടെ വെടിക്കെട്ട് ബാറ്റിങ്ങാണ് കൊൽക്കത്തയ്ക്ക് കൂറ്റൻ സ്കോർ സമ്മാനിച്ചത്. വെറും രണ്ട് വിക്കറ്റ് നഷ്ടത്തിലാണ് കൊൽക്കത്ത 247 റൺസെടുത്തത്. രഘുവംശിയെ കൂട്ടുപിടിച്ച് അലൻ ആഞ്ഞടിച്ചതോടെ കൊൽക്കത്ത സ്കോർ അതിവേഗം ഉയർന്നു. വെറും 21 പന്തിലാണ് അലൻ അർധസെഞ്ചറി തികച്ചത്.
ഗുജറാത്തിന്റെ പ്രധാന ബോളർമാരായ കഗീസോ റബാദ, മുഹമ്മദ് സിറാജ്, ജയ്സൻ ഹോൾഡർ എന്നിവരെയെല്ലാം അലൻ തല്ലിച്ചതച്ചു. 11–ാം ഓവറിൽ അർഷദ് ഖാനെതിരെ മൂന്ന് സിക്സും ഒരു ഫോറുമടക്കം 22 റൺസാണ് അലൻ നേടിയത്. തൊട്ടടുത്ത ഓവറിൽ സെഞ്ചറിക്ക് വെറും ഏഴ് റൺസ് അകലെ താരം പുറത്താകുമ്പോൾ കൊൽക്കത്ത 139 റൺസിൽ എത്തിയിരുന്നു. 10 സിക്സും നാല് ഫോറുമടങ്ങുന്നതായിരുന്നു അലന്റെ ഇന്നിങ്സ്. രണ്ടാം വിക്കറ്റിൽ ഇവർ 95 റൺസ് കൂട്ടിച്ചേർത്തു.
തുടർന്ന് മൂന്നാം വിക്കറ്റിൽ ഒന്നിച്ച രഘുവംശി–ഗ്രീൻ സഖ്യവും ഇതേ വേഗത്തിൽ റൺസ് ഉയർത്തി. 17–ാം ഓവറിൽ കൊൽക്കത്തയുടെ സ്കോർ 200 കടന്നു. 19–ാം ഓവറിൽ സിറാജിനെതിരെ മൂന്ന് സിക്സും ഒരു ഫോറുമടക്കം 25 റൺസാണ് രഘുവംശി അടിച്ചെടുത്തത്. ഐപിഎലിൽ രഘുവംശിയുടെ ഏറ്റവും ഉയർന്ന സ്കോറാണ് ഈ മത്സരത്തിൽ നേടിയ 82 റൺസ്. അവസാന ഓവറിൽ ഗ്രീനും അർധസെഞ്ചറി തികച്ചതോടെ കൊൽക്കത്തയുടെ ടോട്ടൽ 247-ൽ എത്തി. രഘുവംശി ഏഴ് സിക്സും നാല് ഫോറും അടിച്ചപ്പോൾ, ഗ്രീൻ നാല് സിക്സും മൂന്ന് ഫോറും നേടി. ഇരുവരും ചേർന്നുണ്ടാക്കിയ 108 റൺസിന്റെ കൂട്ടുകെട്ട് ഐപിഎലിൽ കൊൽക്കത്തയുടെ ഏറ്റവും മികച്ച റെക്കോർഡാണ്. ഐപിഎൽ ചരിത്രത്തിൽ കൊൽക്കത്തയുടെ ഏറ്റവും ഉയർന്ന മൂന്നാമത്തെ ടോട്ടലാണിത്. 2024ൽ ഡൽഹിക്കെതിരെ നേടിയ 272/7, അതേവർഷം പഞ്ചാബിനെതിരെ നേടിയ 261/6 എന്നിവയാണ് ആദ്യ രണ്ട് സ്ഥാനങ്ങളിൽ. കൂടാതെ ഗുജറാത്ത് ടൈറ്റൻസിനെതിരെ ഒരു ടീം നേടുന്ന ഏറ്റവും ഉയർന്ന ടോട്ടൽ കൂടിയാണിത്.
