ഫ്രിഡ്ജ് തുറക്കുമ്പോൾ തലേന്നത്തെ ബിരിയാണിയോ, പാസ്തയോ, കറിയോ ഒക്കെ ഇരിക്കുന്നത് കാണുന്നത് ഒരു പ്രത്യേക ആശ്വാസമാണ്. ബാക്കിവരുന്ന ഇത്തരം ഭക്ഷണങ്ങൾ സമയം ലാഭിക്കാനും ഭക്ഷണം പാഴാക്കാതിരിക്കാനും സഹായിക്കുമെന്ന് മാത്രമല്ല, പിറ്റേന്ന് കഴിക്കുമ്പോൾ ഇവയ്ക്ക് രുചി കൂടുകയും ചെയ്യാറുണ്ട്. എന്നാൽ ഈ ഭക്ഷണം വേഗത്തിൽ എടുത്ത് ഓവനിലോ അടുപ്പിലോ വെച്ച് ചൂടാക്കുന്നതിന് മുൻപ്, ഇന്ത്യൻ ഭക്ഷ്യ സുരക്ഷാ ഗുണനിലവാര അതോറിറ്റിക്ക് (FSSAI) നിങ്ങളോട് ചിലത് പറയാനുണ്ട്.
ഭക്ഷണം ശരിയായി പാകം ചെയ്യുന്നത് പോലെ തന്നെ പ്രധാനമാണ് അത് ശരിയായ രീതിയിൽ വീണ്ടും ചൂടാക്കുന്നതുമെന്ന് അടുത്തിടെ എക്സിലെ ഒരു പോസ്റ്റിലൂടെ എഫ്.എസ്.എസ്.എ.ഐ വ്യക്തമാക്കുകയുണ്ടായി. ബാക്കിവന്ന ഭക്ഷണം കഴിക്കുന്നത് സുരക്ഷിതമാണെങ്കിലും, അത് ചൂടാക്കുമ്പോൾ വരുത്തുന്ന ചില തെറ്റുകൾ ഭക്ഷണത്തിൽ ബാക്ടീരിയകൾ വളരാനും അതുവഴി രോഗങ്ങൾ ഉണ്ടാകാനും കാരണമാകും. ഭക്ഷണം സുരക്ഷിതവും രുചികരവുമായി സൂക്ഷിക്കാൻ ഈ ലളിതമായ ശീലങ്ങൾ സഹായിക്കും:
പുതുതായി പാകം ചെയ്ത ഭക്ഷണവും ബാക്കിവന്ന ഭക്ഷണവും ഒന്നിച്ച് ചേർക്കരുത് എന്നതാണ് ആദ്യത്തെ കാര്യം. പലരും അറിയാതെ ചെയ്യുന്ന ഒരു തെറ്റാണിത്. ഉദാഹരണത്തിന്, ഇന്നലത്തെ പരിപ്പ് കറി ചൂടാക്കുമ്പോൾ അതിലേക്ക് ഇന്ന് ഉണ്ടാക്കിയ പരിപ്പ് കറി കൂടി ചിലർ ഒഴിക്കാറുണ്ട്. എഫ്.എസ്.എസ്.എ.ഐ ഇതിനെതിരെ മുന്നറിയിപ്പ് നൽകുന്നു. പുതുതായി ഉണ്ടാക്കിയ ഭക്ഷണത്തിന്റെയും ബാക്കിവന്ന ഭക്ഷണത്തിന്റെയും താപനിലയും ഗുണനിലവാരവും വ്യത്യസ്തമായിരിക്കും. അതിനാൽ ബാക്കിവന്ന ഭക്ഷണം പ്രത്യേകം ചൂടാക്കിയ ശേഷം മാത്രം പുതിയ ഭക്ഷണവുമായി ചേർക്കുക.
ഒരു തവണ ഉണ്ടാക്കിയ ഭക്ഷണം വീണ്ടും വീണ്ടും ചൂടാക്കുന്ന ശീലവും ഒഴിവാക്കേണ്ടതാണ്. ഒരു വലിയ പാത്രം കറി ഫ്രിഡ്ജിൽ നിന്ന് എടുത്ത് ചൂടാക്കി, അതിൽ നിന്ന് കുറച്ച് കഴിച്ച ശേഷം ബാക്കി വീണ്ടും ഫ്രിഡ്ജിൽ വെക്കുകയും പിറ്റേന്ന് അത് വീണ്ടും ചൂടാക്കുകയും ചെയ്യുന്നത് പലരുടെയും രീതിയാണ്. എന്നാൽ ഭക്ഷണം ഫ്രിഡ്ജിൽ നിന്ന് എടുത്ത് ചൂടാക്കുകയും വീണ്ടും തണുപ്പിച്ച് സൂക്ഷിക്കുകയും ചെയ്യുമ്പോൾ, ബാക്ടീരിയകൾക്ക് വേഗത്തിൽ വളരാൻ അനുയോജ്യമായ താപനിലയിലേക്ക് ആ ഭക്ഷണം മാറുകയാണ് ചെയ്യുന്നത്.
അതുകൊണ്ട്, കഴിക്കാൻ ആവശ്യമുള്ള അളവ് ഭക്ഷണം മാത്രം എടുത്ത് ചൂടാക്കുക. ഒരു വലിയ പാത്രത്തിലെ ഭക്ഷണം മുഴുവനായി ചൂടാക്കുന്നതിന് പകരം, നിങ്ങൾക്ക് അപ്പോൾ കഴിക്കാൻ വേണ്ടത്ര ഭാഗം മാത്രം എടുക്കുക. ഇത് ബാക്കി ഭക്ഷണം ഫ്രിഡ്ജിൽ തന്നെ സുരക്ഷിതമായി ഇരിക്കാൻ സഹായിക്കും. ഉദാഹരണത്തിന്, നാല് പേർക്കുള്ള പുലാവ് ബാക്കിയുണ്ടെങ്കിൽ, ഒരാൾക്ക് മാത്രമാണ് വേണ്ടതെങ്കിൽ ആ ഒരു പങ്ക് മാത്രം എടുത്ത് ചൂടാക്കുക.
ഭക്ഷണം ചൂടാക്കുമ്പോൾ അത് നന്നായി ഇളക്കി കൊടുക്കാൻ ശ്രദ്ധിക്കണം. മൈക്രോവേവ് ഓവൻ ഉപയോഗിക്കുമ്പോൾ ഭക്ഷണത്തിന്റെ മുകൾഭാഗം നല്ല ചൂടും ഉൾഭാഗം തണുത്തിരിക്കുന്നതുമായി അനുഭവപ്പെടാറുണ്ട്. ഭക്ഷണം എല്ലാ ഭാഗത്തും ഒരേപോലെ ചൂടാകാത്തതുകൊണ്ടാണ് ഇങ്ങനെ സംഭവിക്കുന്നത്. ഇത്തരം തണുത്ത ഭാഗങ്ങളിൽ ബാക്ടീരിയകൾ നശിക്കാതെ അവശേഷിക്കാൻ സാധ്യതയുണ്ട്. അതിനാൽ ചൂടാക്കുമ്പോൾ ഭക്ഷണം നന്നായി ഇളക്കി കൊടുക്കണം.
ഫ്രീസറിൽ വെച്ച് തണുപ്പിച്ച ഭക്ഷണം ചൂടാക്കുന്നതിന് മുൻപ് അത് സാധാരണ താപനിലയിലേക്ക് എത്തിക്കണം (ഡീഫ്രോസ്റ്റ് ചെയ്യണം). ഭക്ഷണം കൂടുതൽ ദിവസം കേടുകൂടാതെ ഇരിക്കാൻ ഫ്രീസറിൽ വെക്കുന്നത് നല്ലതാണെങ്കിലും, കഴിക്കാൻ നേരത്ത് അത് നേരിട്ട് അടുപ്പത്തോ ഓവനിലോ വെക്കുന്നത് ശരിയല്ല. ഇത് ഭക്ഷണം എല്ലാ ഭാഗത്തും ഒരേപോലെ ചൂടാകുന്നതിനെ തടയും. അതുകൊണ്ട് ഫ്രീസറിൽ ഇരുന്ന ഭക്ഷണം പൂർണ്ണമായും സാധാരണ നിലയിലാക്കിയ ശേഷം മാത്രം ചൂടാക്കുക.
ശരിയായ രീതിയിലല്ല ചൂടാക്കിയതെങ്കിലും ഭക്ഷണം കാണാൻ കേടായതായി തോന്നണമെന്നില്ല, അതിന് ദുർഗന്ധവും ഉണ്ടാകണമെന്നില്ല. എങ്കിലും കൃത്യമായി ചൂടാക്കാത്തതിനാലോ ഒന്നിലധികം തവണ ചൂടാക്കിയതിനാലോ അതിൽ മാരകമായ ബാക്ടീരിയകൾ ഉണ്ടാകാൻ സാധ്യതയുണ്ട്. ഇത്തരം ഭക്ഷണം കഴിക്കുന്നത് വയറുവേദന, ഓക്കാനം, ഛർദ്ദി, വയറിളക്കം, പനി തുടങ്ങിയ ഭക്ഷണവിഷബാധയുടെ (ഫുഡ് പോയിസണിംഗ്) ലക്ഷണങ്ങൾക്ക് കാരണമാകും. ബാക്കിവരുന്ന ഭക്ഷണം ഉപയോഗിക്കുന്നത് സമയവും പണവും ലാഭിക്കാനുള്ള നല്ലൊരു മാർഗ്ഗമാണെങ്കിലും, ചെറിയ അശ്രദ്ധകൾ അത് വലിയ ആരോഗ്യപ്രശ്നങ്ങളാക്കി മാറ്റിയേക്കാം.
