നമ്മുടെ നാട്ടിൽ സാധാരണമായി ലഭിക്കുന്ന വെണ്ടയ്ക്ക വെറും ഒരു പച്ചക്കറി മാത്രമല്ല, നിരവധി പോഷക ഗുണങ്ങളുള്ള ഒന്നാണെന്ന് നമുക്കറിയാം. സാധാരണയായി തോരനോ മെഴുക്കുപുരട്ടിയോ ഉണ്ടാക്കാൻ ഉപയോഗിക്കുന്ന വെണ്ടയ്ക്ക ഉപയോഗിച്ച് തയ്യാറാക്കുന്ന ‘വെണ്ടയ്ക്ക വെള്ളം’ ഇപ്പോൾ ആരോഗ്യരംഗത്ത് വലിയ ശ്രദ്ധ നേടുകയാണ്. ദഹനപ്രക്രിയ മെച്ചപ്പെടുത്താനും ശരീരഭാരം കുറയ്ക്കാനും ഇത് സഹായിക്കുമെന്ന് പ്രമുഖ ഡോക്ടർമാർ സാക്ഷ്യപ്പെടുത്തുന്നു. എന്നാൽ പ്രമേഹരോഗികൾക്ക് വെണ്ടയ്ക്ക വെള്ളം നൽകുന്ന ഗുണങ്ങളെക്കുറിച്ച് പലർക്കും അറിവില്ല.
വെണ്ടയ്ക്ക വെള്ളം എങ്ങനെയാണ് രക്തത്തിലെ പഞ്ചസാരയുടെ അളവിനെ ബാധിക്കുന്നത് എന്ന് നോക്കാം. ഇതിൽ അടങ്ങിയിരിക്കുന്ന ലയിക്കുന്ന നാരുകൾ ശരീരത്തിൽ പഞ്ചസാര ആഗിരണം ചെയ്യുന്നത് സാവധാനത്തിലാക്കുന്നു. ഇത് രക്തത്തിലെ പഞ്ചസാര പെട്ടെന്ന് ഉയരുന്നത് തടയാൻ സഹായിക്കും. കൂടാതെ, വെണ്ടയ്ക്കയിലെ ചില ഘടകങ്ങൾ ഇൻസുലിന്റെ പ്രവർത്തനം മെച്ചപ്പെടുത്താനും കോശങ്ങൾ ഗ്ലൂക്കോസ് ശരിയായി ഉപയോഗിക്കാനും സഹായിക്കുമെന്ന് പഠനങ്ങൾ സൂചിപ്പിക്കുന്നു. പ്രമേഹത്തിന് മുൻപുള്ള അവസ്ഥയിലുള്ളവരിലും ടൈപ്പ് 2 പ്രമേഹമുള്ളവരിലും വെമ്പാവിലെ പഞ്ചസാരയുടെ അളവ് കുറയ്ക്കാൻ ഇത് ഫലപ്രദമാണെന്ന് കണ്ടുവരുന്നു.
ഇതൊരു അത്ഭുത മരുന്നല്ലെങ്കിലും, സമീകൃതാഹാരത്തോടൊപ്പം ഉപയോഗിക്കുമ്പോൾ പ്രമേഹരോഗികൾക്ക് ഇത് ഗുണകരമാണ്. വിറ്റാമിൻ സി, കെ, മഗ്നീഷ്യം എന്നിവയാൽ സമ്പന്നമായ ഈ പാനീയം രോഗപ്രതിരോധ ശേഷി വർദ്ധിപ്പിക്കാനും സഹായിക്കുന്നു. രാത്രിയിൽ ഫ്രഷ് ആയ വെണ്ടയ്ക്കയുടെ അറ്റം മുറിച്ച ശേഷം വെള്ളത്തിൽ ഇട്ടു വയ്ക്കുകയും, രാവിലെ ആ വെള്ളം അരിച്ചെടുത്ത് വെറും വയറ്റിൽ കുടിക്കുകയും ചെയ്യുന്നതാണ് ഇതിന്റെ രീതി.
എങ്കിലും ചില കാര്യങ്ങൾ ശ്രദ്ധിക്കേണ്ടതുണ്ട്. മെറ്റ്ഫോർമിൻ പോലുള്ള പ്രമേഹ മരുന്നുകൾ കഴിക്കുന്നവർ വെണ്ടയ്ക്ക വെള്ളം കുടിക്കുമ്പോൾ ഡോക്ടറുടെ ഉപദേശം തേടണം, കാരണം ഇത് മരുന്നിന്റെ ആഗിരണത്തെ ബാധിച്ചേക്കാം. കൂടാതെ വെണ്ടയ്ക്കയിൽ ഓക്സലേറ്റുകൾ കൂടുതലായതിനാൽ വൃക്കയിൽ കല്ല് വരാൻ സാധ്യതയുള്ളവർ അമിതമായി ഇത് ഉപയോഗിക്കരുത്. ചുരുക്കത്തിൽ, മരുന്നുകൾക്ക് പകരമായല്ല, മറിച്ച് ആരോഗ്യകരമായ ഭക്ഷണരീതിയുടെ ഭാഗമായി ഡോക്ടറുടെ നിർദ്ദേശപ്രകാരം വെണ്ടയ്ക്ക വെള്ളം ഉപയോഗിക്കുന്നത് പ്രമേഹ നിയന്ത്രണത്തിന് ഏറെ സഹായകരമാകും.
