ഹിമാചൽ പ്രദേശിൽ ട്രെക്കിംഗിന് പോയ ഒരു യുവതിക്ക് അവിചാരിതമായി ഉണ്ടായ അനുഭവം ഇപ്പോൾ സോഷ്യൽ മീഡിയയിൽ വലിയ രീതിയിൽ വൈറലാവുകയാണ്. ട്രെക്കിംഗിനിടയിൽ ഇന്ത്യൻ ക്രിക്കറ്റ് താരങ്ങളായ ശ്രേയസ് അയ്യർ, വാഷിംഗ്ടൺ സുന്ദർ എന്നിവരുൾപ്പെടെയുള്ള ടീം അംഗങ്ങളെ കണ്ടുമുട്ടിയെങ്കിലും, അവരെ തിരിച്ചറിയാതെയാണ് യുവതി തന്റെ വ്ലോഗിനായി ദൃശ്യങ്ങൾ പകർത്തിയത്.
ധരംശാലയ്ക്ക് സമീപമുള്ള ഒരു രഹസ്യ വെള്ളച്ചാട്ടം തേടിയാണ് യുവതിയും സുഹൃത്തും ട്രെക്കിംഗ് നടത്തിയത്. യാത്രാമധ്യേ ഒരു കൂട്ടം ആളുകളെ കണ്ടുമുട്ടിയപ്പോൾ അവർ സാധാരണ വിനോദസഞ്ചാരികളാണെന്ന് കരുതി ഇവർ സംസാരിക്കുകയും യാത്രാ ദൃശ്യങ്ങൾ വ്ലോഗിനായി റെക്കോർഡ് ചെയ്യുകയും ചെയ്തു. ‘രഹസ്യ വെള്ളച്ചാട്ടം തേടിയിറങ്ങിയ ഞങ്ങൾക്ക് മുന്നിൽ ദാ ടീം ഇന്ത്യ!’ എന്നാണ് യുവതി പിന്നീട് തന്റെ റീലിൽ കുറിച്ചത്. അത് വെറുമൊരു യാത്രാ ഓർമ്മ മാത്രമായിരിക്കുമെന്നാണ് അവർ കരുതിയതെങ്കിലും, തങ്ങൾ കണ്ടുമുട്ടിയത് ഇന്ത്യൻ ക്രിക്കറ്റ് താരങ്ങളെയാണെന്ന് പിന്നീട് മനസ്സിലാക്കിയതോടെ കഥ മാറി.
ഈ കൂടിക്കാഴ്ചയുടെ പല വീഡിയോകളും യുവതി സോഷ്യൽ മീഡിയയിൽ പങ്കുവെച്ചിട്ടുണ്ട്. അതിലൊരു വീഡിയോയിൽ ശ്രേയസ് അയ്യർക്കൊപ്പം അവർ ഒരു സാധാരണ യാത്രികനെപ്പോലെ പോസ് ചെയ്യുന്നത് കാണാം. ആ സമയത്ത് ഇന്ത്യയിലെ ഏറ്റവും പ്രശസ്തനായ ക്രിക്കറ്റ് താരങ്ങളിൽ ഒരാളാണ് തന്റെ കൂടെ നിൽക്കുന്നതെന്ന് അവർക്ക് ഒട്ടും അറിയില്ലായിരുന്നു.
വീട്ടിൽ തിരിച്ചെത്തിയ ശേഷമാണ് താൻ സംസാരിച്ചതും കൂടെ ഫോട്ടോ എടുത്തതും ഇന്ത്യൻ ക്രിക്കറ്റ് താരങ്ങളോടാണെന്ന് മനസ്സിലായതെന്ന് യുവതി മറ്റൊരു റീലിൽ സമ്മതിച്ചു. തനിക്ക് ക്രിക്കറ്റിനെക്കുറിച്ച് വലിയ അറിവില്ലാത്തതിൽ ഖേദിക്കുന്നുവെന്നും, ആ സമയത്ത് അവരെ തിരിച്ചറിയാൻ കഴിഞ്ഞിരുന്നെങ്കിൽ നന്നായേനെ എന്നും അവർ തമാശയായി പറഞ്ഞു.
ഈ വീഡിയോകൾ വളരെ പെട്ടെന്നാണ് സോഷ്യൽ മീഡിയയിൽ ശ്രദ്ധിക്കപ്പെട്ടത്. ഇന്ത്യൻ ടീമിലെ കളിക്കാർക്കൊപ്പം സമയം ചിലവഴിച്ചിട്ടും അവരെ തിരിച്ചറിയാൻ കഴിഞ്ഞില്ലല്ലോ എന്നോർത്ത് ക്രിക്കറ്റ് ആരാധകർ കമന്റ് ബോക്സിൽ ചിരി പങ്കുവെക്കുകയാണ്. “അവർ ആരാണെന്ന് പിന്നീട് തിരിച്ചറിഞ്ഞപ്പോഴുള്ള ആ ഒരു ഫീലിംഗ്…” എന്നാണ് ഒരാൾ കമന്റ് ചെയ്തത്. “അത് ഇന്ത്യൻ ടി20 ടീമിന്റെ ക്യാപ്റ്റനാണ് ചേച്ചി,” എന്ന് മറ്റൊരു ആരാധകൻ കുറിച്ചപ്പോൾ, “അവരെ എങ്ങനെയാണ് തിരിച്ചറിയാതെ പോയത്?” എന്ന് അത്ഭുതത്തോടെ മൂന്നാമതൊരാൾ ചോദിച്ചു.
ലക്ഷക്കണക്കിന് ക്രിക്കറ്റ് ആരാധകർ സ്വപ്നം കാണുന്ന ഒരു കാര്യമാണ് യാതൊരു ബഹളവുമില്ലാത്ത ഒരു സാഹചര്യത്തിൽ ഇന്ത്യൻ താരങ്ങളെ നേരിൽ കാണുക എന്നത്. ആ ഭാഗ്യം ലഭിച്ചിട്ടും തിരിച്ചറിയാതെ പോയ യുവതിയുടെ പിന്നീട് ഉണ്ടായ പ്രതികരണം ഈ കൂടിക്കാഴ്ചയേക്കാൾ രസകരമായിട്ടുണ്ടെന്നാണ് സോഷ്യൽ മീഡിയയിലെ സംസാരം.
