അഞ്ച് തെരുവുനായ്ക്കളെ തന്റെ റിക്ഷയിൽ പരിപാലിക്കുന്ന പ്രായമായ ഒരു മനുഷ്യന്റെ ഹൃദയസ്പർശിയായ വീഡിയോ സോഷ്യൽ മീഡിയയിൽ വൈറലാകുന്നു. ‘മനുഷ്യത്വം ഇന്നും ജീവനോടെയുണ്ട്’ എന്ന അടിക്കുറിപ്പോടെയാണ് ഈ ദൃശ്യങ്ങൾ പ്രചരിക്കുന്നത്.
തിരക്കേറിയ ഒരു ഇന്ത്യൻ തെരുവിലൂടെ, അവശനായി തോന്നിപ്പിക്കുന്ന ഒരു വൃദ്ധൻ തന്റെ സൈക്കിൾ റിക്ഷയിൽ അഞ്ച് നായ്ക്കളുമായി യാത്ര ചെയ്യുന്നതാണ് വീഡിയോയിലുള്ളത്. വളരെ പരിമിതമായ ജീവിതസാഹചര്യങ്ങളിലും തനിക്കുള്ള ചെറിയ ഇടവും ഭക്ഷണവും സ്നേഹവും ഈ മിണ്ടാപ്രാണികൾക്കായി അദ്ദേഹം പങ്കുവെക്കുന്നു. തെരുവുനായ്ക്കളാണെങ്കിലും അവയുടെ കഴുത്തിലെ കയറുകൾ ആ മനുഷ്യൻ അവയെ ദത്തെടുത്തതാണെന്ന് വ്യക്തമാക്കുന്നു. അദ്ദേഹം റിക്ഷ നിർത്തി വിശ്രമിക്കുമ്പോൾ സ്നേഹപ്രകടനങ്ങളുമായി നായ്ക്കൾ അദ്ദേഹത്തിന് ചുറ്റും കൂടുന്ന കാഴ്ച ആർക്കും കണ്ടുനിൽക്കാനാവില്ല.
സമ്പത്തോ പദവിയോ അല്ല, മറിച്ച് കരുണയുള്ള ഒരു മനസ്സിനാണ് യഥാർത്ഥത്തിൽ സ്നേഹം നൽകാൻ കഴിയുന്നതെന്ന് ഈ വീഡിയോ നമ്മെ ഓർമ്മിപ്പിക്കുന്നു. “ഇങ്ങനെയുള്ള ആളുകളെ മനുഷ്യർ എന്നല്ല, മാലാഖമാർ എന്നാണ് വിളിക്കേണ്ടത്” എന്നും “സ്നേഹം നൽകാനും സ്വീകരിക്കാനുമുള്ള ഈ മനസ്സ് വലിയൊരു നിധിയാണെന്നും” തുടങ്ങി നിരവധി കമന്റുകളാണ് വീഡിയോയ്ക്ക് താഴെ വരുന്നത്. ദൈവം ഇദ്ദേഹത്തെ അനുഗ്രഹിക്കട്ടെ എന്ന പ്രാർത്ഥനയോടെ നിരവധി ആളുകൾ ഈ ദൃശ്യങ്ങൾ പങ്കുവെക്കുന്നു.
