ജോധ്പൂരിലെ ഒരു റിസോർട്ടിൽ വിവാഹാഘോഷത്തിനിടെ വരണമാല്യ ചടങ്ങു നടന്ന സ്റ്റേജിൽ വൻ തീപിടുത്തം. വരണമാല്യം കൈമാറി നിമിഷങ്ങൾക്കകം തീ പടർന്നതോടെ വധൂവരന്മാർ തലനാരിഴയ്ക്കാണ് രക്ഷപ്പെട്ടത്. മെയ് 6-ന് വൈകുന്നേരം പാൽ റോഡിലെ എംപയർ റിസോർട്ടിലായിരുന്നു സംഭവം.
ചടങ്ങിനിടെ ഉപയോഗിച്ച ‘കോൾഡ് ഫയർ’ പടക്കങ്ങളിൽ നിന്നുള്ള തീപ്പൊരി സ്റ്റേജിലെ പ്ലാസ്റ്റിക് പൂക്കളിലും മറ്റ് അലങ്കാര വസ്തുക്കളിലും വീണതാണ് അപകടത്തിന് കാരണമായതെന്ന് കരുതപ്പെടുന്നു. സെക്കൻഡുകൾക്കുള്ളിൽ തന്നെ സ്റ്റേജ് മുഴുവൻ തീ വിഴുങ്ങുന്നതും പരിഭ്രാന്തരായ അതിഥികൾ ചിതറി ഓടുന്നതും ദൃശ്യങ്ങളിൽ കാണാം. തീ ആളിപ്പടരുന്നതിന് മുൻപ് തന്നെ വധൂവരന്മാർ സ്റ്റേജിൽ നിന്ന് സുരക്ഷിതമായി ഓടിമാറി.
അവിടെയുണ്ടായിരുന്ന അതിഥികൾ ഉടൻ തന്നെ വെള്ളമൊഴിച്ച് തീ അണയ്ക്കാൻ ശ്രമിച്ചു. ആർക്കും പരിക്കേറ്റതായി റിപ്പോർട്ടുകളില്ലെങ്കിലും, ആഘോഷം നിമിഷനേരം കൊണ്ട് വലിയ പരിഭ്രാന്തിയായി മാറി. സംഭവത്തിന്റെ വീഡിയോ ഇപ്പോൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. വിവാഹ ചടങ്ങുകളിൽ ഇത്തരം അപകടകരമായ പടക്കങ്ങളും കൃത്രിമ അലങ്കാരങ്ങളും ഉപയോഗിക്കുന്നതിലെ സുരക്ഷാ വീഴ്ചയെക്കുറിച്ച് വലിയ ചർച്ചകൾക്കും ഈ സംഭവം വഴിവെച്ചിരിക്കുകയാണ്. വലിയ ആഘോഷങ്ങളിൽ ചെറിയ അശ്രദ്ധ പോലും വൻ ദുരന്തങ്ങൾക്ക് കാരണമാകുമെന്ന് ഈ അപകടം വീണ്ടും ഓർമ്മിപ്പിക്കുന്നു.
