മയക്കുമരുന്നിന് അടിമയായി കുടുംബാംഗങ്ങളെ നിരന്തരം ഉപദ്രവിച്ചിരുന്ന യുവാവിനെ സ്വന്തം വീട്ടുകാർ വാടകക്കൊലയാളിയെ വിട്ട് കൊലപ്പെടുത്തി. ഉത്തർപ്രദേശിലെ അംരോഹയിൽ നിന്നാണ് ഞെട്ടിക്കുന്ന വാർത്ത പുറത്തുവരുന്നത്. കൊല്ലപ്പെട്ട ദുഷ്യന്ത് എന്ന യുവാവിന്റെ പിതാവിനെയും സഹോദരനെയും പോലീസ് അറസ്റ്റ് ചെയ്തു.
കഴിഞ്ഞ ദിവസം ഷാംപുർ ഗ്രാമത്തിലെ കനാലിന് സമീപം രക്തത്തിൽ കുളിച്ച നിലയിൽ ദുഷ്യന്തിന്റെ മൃതദേഹം കണ്ടെത്തുകയായിരുന്നു. തുടർന്ന് പോലീസ് നടത്തിയ അന്വേഷണത്തിലാണ് കുടുംബം തന്നെ ആസൂത്രണം ചെയ്ത കൊലപാതകമാണെന്ന് തെളിഞ്ഞത്.
ദീർഘകാലമായി ലഹരിക്ക് അടിമയായിരുന്ന ദുഷ്യന്ത് വീട്ടിൽ സ്ഥിരമായി പ്രശ്നങ്ങൾ ഉണ്ടാക്കുകയും ബന്ധുക്കളെ ക്രൂരമായി ഉപദ്രവിക്കുകയും ചെയ്തിരുന്നു. ഇയാളുടെ പെരുമാറ്റം കാരണം കുടുംബം മുഴുവൻ വലിയ ഭയത്തിലായിരുന്നു കഴിഞ്ഞിരുന്നത്. ഈ സാഹചര്യം സഹിക്കവയ്യാതെ വന്നപ്പോഴാണ് മകനെ ഇല്ലാതാക്കാൻ മാതാപിതാക്കളും സഹോദരങ്ങളും ചേർന്ന് തീരുമാനമെടുത്തത്. ജോളി എന്ന വാടകക്കൊലയാളിയെ ഇതിനായി അവർ സമീപിക്കുകയായിരുന്നു.
അഞ്ചുലക്ഷം രൂപയ്ക്കാണ് കൊലപാതകം ഉറപ്പിച്ചത്. ഇതിനായി ദുഷ്യന്തിന്റെ അമ്മ സ്വന്തം സ്വർണം പണയം വെച്ചാണ് പണം കണ്ടെത്തിയത് എന്നത് സംഭവത്തിന്റെ തീവ്രത വർദ്ധിപ്പിക്കുന്നു. 55,000 രൂപ മുൻകൂറായി കൊലയാളിക്ക് നൽകിയിരുന്നു. ദുഷ്യന്തിന്റെ അച്ഛൻ, സഹോദരൻ എന്നിവരുടെ പങ്കാളിത്തം പോലീസ് സ്ഥിരീകരിച്ചിട്ടുണ്ട്.
കൃത്യം നടത്തിയ വാടകക്കൊലയാളി ജോളിക്ക് വേണ്ടിയുള്ള തിരച്ചിൽ പോലീസ് ശക്തമാക്കിയിരിക്കുകയാണ്. അസിസ്റ്റന്റ് പോലീസ് സൂപ്രണ്ട് അഖിലേഷ് ഭദോരിയയുടെ നേതൃത്വത്തിലാണ് കേസിൽ അന്വേഷണം പുരോഗമിക്കുന്നത്.
