പല്ലിന്റെ ആരോഗ്യത്തിന് കേടുപാടുകൾ വരുത്താതെ വെളുപ്പിക്കാൻ സഹായിക്കുന്ന പുതിയൊരു ടൂത്ത് പൗഡർ ശാസ്ത്രജ്ഞർ വികസിപ്പിച്ചെടുത്തു. കാപ്പി, ചായ, ഭക്ഷണസാധനങ്ങൾ എന്നിവ പല്ലിന്റെ ഇനാമലിൽ കറയുണ്ടാക്കുന്നത് സാധാരണമാണ്. നിലവിൽ വിപണിയിലുള്ള വൈറ്റനിംഗ് ഉൽപ്പന്നങ്ങൾ പല്ലിലെ കറ നീക്കം ചെയ്യുമെങ്കിലും, അവയിലടങ്ങിയിരിക്കുന്ന രാസവസ്തുക്കൾ പല്ലിന്റെ കവചമായ ഇനാമലിനെ നശിപ്പിക്കുകയും പല്ലിന് പുളിപ്പും മറ്റ് അസ്വസ്ഥതകളും ഉണ്ടാക്കുകയും ചെയ്യാറുണ്ട്. ഈ പ്രശ്നത്തിനാണ് പുതിയ കണ്ടുപിടുത്തത്തിലൂടെ പരിഹാരമാകുന്നത്.
മിൻ സിംഗ് എന്ന ഗവേഷകന്റെ നേതൃത്വത്തിലുള്ള സംഘമാണ് ഈ പ്രത്യേക സംയുക്തം വികസിപ്പിച്ചത്. ഇലക്ട്രിക് ടൂത്ത് ബ്രഷ് ഉപയോഗിക്കുമ്പോഴുണ്ടാകുന്ന വിറയൽ (vibration) വഴി മാത്രം സജീവമാകുന്ന രീതിയിലാണ് ഈ പൗഡർ നിർമ്മിച്ചിരിക്കുന്നത്. സ്ട്രോൺഷ്യം, കാൽസ്യം എന്നീ അയോണുകൾക്കൊപ്പം ബേരിയം ടൈറ്റനേറ്റ് എന്ന പദാർത്ഥം ചേർത്താണ് ‘ബി.എസ്.സി.ടി’ എന്ന ഈ മിശ്രിതം തയ്യാറാക്കിയത്. ബ്രഷ് ചെയ്യുമ്പോഴുണ്ടാകുന്ന യാന്ത്രിക ഊർജ്ജത്തെ ഉപയോഗപ്പെടുത്തി പല്ലിലെ കറകൾ നീക്കം ചെയ്യാൻ ഇത് സഹായിക്കുന്നു. പരീക്ഷണശാലയിൽ ചായയും കാപ്പിയും കൊണ്ട് കറപിടിച്ച പല്ലുകളിൽ നടത്തിയ പരിശോധനയിൽ മികച്ച ഫലമാണ് ലഭിച്ചത്. 12 മണിക്കൂർ നേരത്തെ ബ്രഷിംഗിലൂടെ പല്ലുകൾ 50 ശതമാനത്തോളം കൂടുതൽ വെളുത്തതായി കണ്ടെത്തി.
വെറുതെ പല്ല് വെളുപ്പിക്കുക മാത്രമല്ല, ഇനാമലിനെ ബലപ്പെടുത്താനും ഈ പൗഡറിന് കഴിയും. ഇതിലടങ്ങിയിരിക്കുന്ന ധാതുക്കൾ പല്ലിലെ തേയ്മാനം പരിഹരിക്കാനും ഇനാമൽ പുനർനിർമ്മിക്കാനും സഹായിക്കുന്നു. കൂടാതെ, വായിലെ ദോഷകരമായ ബാക്ടീരിയകളെ നശിപ്പിക്കാനും മോണരോഗങ്ങൾ തടയാനും ഈ പൗഡറിന് കഴിയുമെന്ന് എലികളിൽ നടത്തിയ പരീക്ഷണങ്ങൾ തെളിയിക്കുന്നു. നിലവിൽ ഇത് വിപണിയിൽ ലഭ്യമായിട്ടില്ലെങ്കിലും, പല്ലിന്റെ ആരോഗ്യത്തിന് കോട്ടം തട്ടാതെ പുഞ്ചിരിക്ക് തിളക്കം കൂട്ടാൻ ഭാവിയിൽ ഈ സാങ്കേതികവിദ്യ വലിയ മാറ്റങ്ങൾ കൊണ്ടുവരുമെന്നാണ് പ്രതീക്ഷിക്കുന്നത്.
