വിവാഹത്തോടനുബന്ധിച്ച് തലേന്ന് നടന്ന ഹൽദി ചടങ്ങുകൾക്കിടെ പാചക വാതക സിലിണ്ടർ ചോർന്ന് തീപിടിച്ച് വധുവിന് ഗുരുതരമായി പൊള്ളലേറ്റു. വിവാഹത്തിന്റെ തലേന്നായിരുന്നു ഈ ദാരുണ സംഭവം. ഗുരുതരമായ പരിക്കുകളോടെ ആശുപത്രിയിൽ പ്രവേശിപ്പിക്കപ്പെട്ട യുവതി, വിവാഹം മുടങ്ങിപ്പോകുമോ എന്ന് ഭയപ്പെട്ടിരുന്നു. എന്നാൽ ആശുപത്രി ജീവനക്കാരും ഇരു കുടുംബങ്ങളും ചേർന്ന് ആശുപത്രിക്ക് ഉള്ളിൽത്തന്നെ വിവാഹത്തിനുള്ള ക്രമീകരണങ്ങൾ ചെയ്യുകയും, വിവാഹ ദിവസം തന്നെ വരൻ വധുവിനെ താലിചാർത്തുകയും ചെയ്തു. സിനിമയെ അനുസ്മരിപ്പിക്കുന്ന ഈ യഥാർത്ഥ ജീവിത നിമിഷത്തെ സോഷ്യൽ മീഡിയ ഒന്നടങ്കം പ്രശംസിക്കുകയാണ്.
കാൺപൂരിൽ ജഗന്നാഥ്പൂർ ഗ്രാമത്തിൽ നടന്ന ഹൽദി ചടങ്ങിനിടെയുണ്ടായ ഈ അപകടത്തിൽ വധു ഉൾപ്പെടെ പന്ത്രണ്ട് പേർക്കാണ് ഗുരുതരമായി പൊള്ളലേറ്റത്. ഘട്ടമ്പൂർ പോലീസ് സ്റ്റേഷൻ പരിധിയിൽ, പാചക വാതക സിലിണ്ടറിന്റെ പൈപ്പ് ലൈനിൽ ഉണ്ടായ ചോർച്ചയാണ് തീപിടുത്തത്തിന് കാരണമായതെന്നാണ് സംശയിക്കുന്നത്. 22 കാരിയായ ശ്വേതയുടെ വിവാഹത്തിന് മുന്നോടിയായുള്ള ചടങ്ങുകൾക്കിടെ ബുധനാഴ്ച വൈകുന്നേരമായിരുന്നു അപകടം. പരമ്പരാഗതമായ ഹൽദി ചടങ്ങുകളിൽ പങ്കെടുക്കാൻ ബന്ധുക്കളും അയൽവാസികളും ശ്വേതയുടെ വീട്ടിൽ ഒത്തുകൂടിയിരുന്നു.
അതിഥികൾക്കായി ഭക്ഷണം തയ്യാറാക്കുന്നതിനിടെയാണ് ഗ്യാസ് സിലിണ്ടർ പൈപ്പ് ലൈനിൽ ചോർച്ചയുണ്ടായത്. നിമിഷങ്ങൾക്കകം വാതകം പടർന്ന് തീപിടിക്കുകയും പാചകം ചെയ്തിരുന്ന സ്ഥലത്തേക്ക് ആളിപ്പടരുകയും ചെയ്തു. ആളുകൾ തീ അണയ്ക്കാൻ ശ്രമിക്കുന്നതിനിടെ തിളച്ച എണ്ണയടങ്ങിയ ചട്ടി മറിഞ്ഞത് തീയുടെ തീവ്രത കൂട്ടുകയും അടുത്തുള്ളവരുടെ മേലേക്ക് എണ്ണ തെറിക്കാൻ ഇടയാക്കുകയും ചെയ്തു. ഇതോടെ ആളുകൾ പരിഭ്രാന്തരായി ഓടി. ഫയർഫോഴ്സും പോലീസും സ്ഥലത്തെത്തിയാണ് പിന്നീട് തീ നിയന്ത്രണവിധേയമാക്കിയത്.
പരിക്കേറ്റ പന്ത്രണ്ട് പേരെയും ആദ്യം ഘട്ടമ്പൂരിലെ കമ്മ്യൂണിറ്റി ഹെൽത്ത് സെന്ററിലാണ് പ്രവേശിപ്പിച്ചത്. പൊള്ളൽ ഗുരുതരമായതിനാൽ വിദഗ്ദ്ധ ചികിത്സയ്ക്കായി പിന്നീട് ഇവരെ കാൺപൂരിലെ ഉർസുല ആശുപത്രിയിലേക്ക് മാറ്റി. വധു ശ്വേത, പിതാവ് ജഗദീഷ്, മുത്തശ്ശി ഉഷ, സഹോദരൻ ഹൻസ്രാജ് എന്നിവരുൾപ്പെടെയുള്ള ബന്ധുക്കൾക്കും ഒരു അഞ്ചു വയസ്സുകാരനും അപകടത്തിൽ പരിക്കേറ്റിട്ടുണ്ട്.
സന്തോഷം നിറഞ്ഞ ഒരു ആഘോഷം പെട്ടെന്ന് ഒരു മെഡിക്കൽ അടിയന്തരാവസ്ഥയായി മാറിയെങ്കിലും, ഈ ദുരന്തം വധൂവരന്മാരുടെ ഒന്നാകാനുള്ള തീരുമാനത്തിന് തടസ്സമാകാൻ ഡോക്ടർമാരും നഴ്സിംഗ് ജീവനക്കാരും ഇരു കുടുംബങ്ങളും അനുവദിച്ചില്ല. അവരുടെ പൂർണ്ണ പിന്തുണയോടെയും മെഡിക്കൽ മേൽനോട്ടത്തോടെയും ആശുപത്രിക്ക് ഉള്ളിൽത്തന്നെ മംഗല്യത്തിനുള്ള ഒരുക്കങ്ങൾ ചെയ്യുകയായിരുന്നു.
