ട്വന്റി-20 ലോകകപ്പിന് മുമ്പ് തന്നെ പുറത്തുനിന്നുള്ള വിമർശനങ്ങൾക്കൊന്നും ചെവികൊടുക്കാതെ സ്വന്തം നിലപാടുകളിൽ ഉറച്ചുനിന്ന് ക്രിക്കറ്റ് കളിക്കുമെന്ന് പ്രഖ്യാപിച്ചിരുന്നുവെന്ന് വെളിപ്പെടുത്തി സഞ്ജു സാംസൺ. അനാവശ്യ സമ്മർദ്ദങ്ങളിൽ നിന്നും മത്സരയോട്ടങ്ങളിൽ നിന്നും താൻ മാറിനിൽക്കുകയാണെന്നും സ്വന്തം കഴിവിൽ വിശ്വസിച്ച് മുന്നോട്ട് പോകുമെന്നും സഞ്ജു കൂട്ടിച്ചേർത്തു. ഈ വർഷം സ്വന്തം നാട്ടിൽ നടന്ന പുരുഷ ട്വന്റി-20 ലോകകപ്പ് കിരീടം നിലനിർത്താൻ ഇന്ത്യയെ സഹായിച്ചതും തുടർച്ചയായ മൂന്ന് അർദ്ധസെഞ്ചുറികൾ നേടിയതും വഴി സഞ്ജു ചരിത്രത്തിൽ ഇടംപിടിച്ചിരുന്നു. എന്നാൽ അയർലൻഡിനും ഇംഗ്ലണ്ടിനുമെതിരായ മത്സരങ്ങളിലെ ചെറിയ ഫോം ഔട്ട് കാരണം സിംബാബ്വെ പര്യടനത്തിനുള്ള ടീമിൽ സഞ്ജുവിന് ഇടം ലഭിച്ചിരുന്നില്ല.
ജിയോസ്റ്റാറിന്റെ ‘ബിലീവ്’ എന്ന ഷോയിൽ സംസാരിക്കവെ സഞ്ജു തന്റെ മനസ്സുതുറന്നു: “നമ്മുടെ നാട്ടിൽ ഒരു അനാവശ്യ മത്സരയോട്ടം നടക്കുന്നുണ്ടെന്ന് ഞാൻ മനസ്സിലാക്കി. 2026 ട്വന്റി-20 ലോകകപ്പിന് മുമ്പ് തന്നെ അതിന്റെ ഭാഗമാകേണ്ടതില്ല എന്ന് ഞാൻ തീരുമാനിച്ചിരുന്നു. കളി ആസ്വദിക്കുക മാത്രമാണ് ഇനി എന്റെ ലക്ഷ്യം. ദൈവാനുഗ്രഹം കൊണ്ട് ഒരുപാട് കാര്യങ്ങൾ നേടാൻ സാധിച്ചു. ഇപ്പോൾ എനിക്ക് 31 വയസ്സായി, ഇനി കുറച്ച് വർഷങ്ങൾ കൂടി ബാക്കിയുണ്ട്. അതുകൊണ്ട് സ്വന്തം താല്പര്യപ്രകാരം മാത്രം കളിക്കാൻ തീരുമാനിച്ചു. ഞാൻ എങ്ങനെ ബാറ്റ് ചെയ്യണം, എന്ത് ചെയ്യണം എന്ന് ഇനി ആരും ഉപദേശിക്കേണ്ടതില്ല. സഞ്ജുവിന്റെ കാര്യങ്ങൾ സഞ്ജു തന്നെ തീരുമാനിക്കും.
എല്ലാവരോടും ബഹുമാനം നിലനിർത്തിക്കൊണ്ടുതന്നെ ഞാൻ കളിക്കും, കളി ആസ്വദിക്കും, നല്ലൊരു ടീമംഗമായി സഹതാരങ്ങളെ പിന്തുണയ്ക്കും. പക്ഷെ അത് എന്റെ രീതിയിലായിരിക്കും. 2024 ലോകകപ്പിന് ശേഷം 2026 ലോകകപ്പിൽ കളിക്കാനാകുമെന്ന് ഞാൻ കരുതിയിരുന്നതേയില്ല. ഒരു ഘട്ടത്തിൽ ഞാൻ 15 അംഗ ടീമിൽ പോലും ഉണ്ടായിരുന്നില്ല. അങ്ങനെയുള്ളപ്പോൾ 2028-നെ കുറിച്ച് ഞാൻ എങ്ങനെ പദ്ധതിയിടും? ഞാൻ ഉണ്ടെങ്കിൽ, ടീമിന് എന്നെ ആവശ്യമുണ്ടെങ്കിൽ, നന്നായി കളിച്ചാൽ കാര്യങ്ങൾ തനിയെ നടക്കും. ഇല്ലെങ്കിലും വലിയ നന്ദിയുണ്ട്. നേടിയ ഈ നേട്ടങ്ങൾ ആർക്കും എന്നിൽ നിന്ന് തട്ടിയെടുക്കാൻ കഴിയില്ല.”
ദേശീയ ടീമിന്റെ ക്യാമ്പിനിടെ മുൻ ക്യാപ്റ്റൻ വിരാട് കോഹ്ലിയുമായി ജിമ്മിൽ വെച്ച് നടത്തിയ സംഭാഷണത്തെക്കുറിച്ചും സഞ്ജു ഓർത്തെടുത്തു. “വിരാട് ഭായ് എങ്ങനെയുള്ള ആളാണെന്ന് നമുക്കെല്ലാവർക്കും അറിയാം. വളരെ വ്യക്തവും കൃത്യവുമായ നിലപാടുകളാണ് അദ്ദേഹത്തിന്റേത്. ജിമ്മിൽ അദ്ദേഹത്തിന്റെ പ്രകടനം കാണുമ്പോൾ തന്നെ ഒരു പ്രത്യേക ഊർജ്ജം അനുഭവപ്പെടും. ഒരു ക്യാമ്പിനിടെ ഞങ്ങൾ രണ്ടുപേരും ജിമ്മിൽ വർക്ക്ഔട്ട് ചെയ്യുമ്പോൾ ഞാൻ അദ്ദേഹത്തോട് ചോദിച്ചു, ‘പാജി, ഞാൻ എന്താണ് ചെയ്യേണ്ടത്? എനിക്കും കുറച്ച് ഉപദേശങ്ങൾ തരൂ.’ അപ്പോൾ ജീവിതരീതി വളരെ പ്രധാനമാണെന്ന് അദ്ദേഹം പറഞ്ഞു. ഒരു അന്താരാഷ്ട്ര ക്രിക്കറ്ററാകണമെങ്കിൽ വേറൊരു രീതിയിലുള്ള ജീവിതശൈലി പുലർത്തണമെന്ന് അദ്ദേഹം വ്യക്തമാക്കി. ഏത് ഭക്ഷണമാണ് ശരീരത്തിന് നല്ലത്, ഏതാണ് ഒഴിവാക്കേണ്ടത് എന്നൊക്കെ അദ്ദേഹം പറഞ്ഞുതന്നു. അടുത്ത 10 വർഷം ഈ അച്ചടക്കം പാലിച്ചാൽ മികച്ചൊരു കരിയർ ഉണ്ടാകുമെന്നും അദ്ദേഹം പറഞ്ഞു. ഒരു ഒന്നര വർഷത്തോളം ഞാൻ അത് കൃത്യമായി പിന്തുടർന്നു, എന്നാൽ അതിനുശേഷം എനിക്ക് അത് തുടരാൻ കഴിഞ്ഞില്ല,” സഞ്ജു വിവരിച്ചു.
മുംബൈ വാംഖഡെ സ്റ്റേഡിയത്തിൽ ഇംഗ്ലണ്ടിനെതിരെ നടന്ന ലോകകപ്പ് സെമിഫൈനലിന് മുന്നോടിയായുള്ള അനുഭവങ്ങളും സഞ്ജു പങ്കുവെച്ചു. ഫാസ്റ്റ് ബൗളർ ജോഫ്ര ആർച്ചർക്കെതിരായ മുൻകാല റെക്കോർഡുകളെക്കുറിച്ച് ആളുകൾ ഓർമ്മിപ്പിച്ചെങ്കിലും താൻ അത് കാര്യമാക്കിയില്ല എന്ന് സഞ്ജു പറഞ്ഞു. “ഇന്ത്യൻ ടീമിനായി റൺസ് നേടുമ്പോൾ കൂടുതൽ ഉത്തരവാദിത്തം വരും. സെമിഫൈനലിന് മുമ്പ് നമ്മുടെ ടോപ് ഓർഡർ നന്നായി തിളങ്ങിയിരുന്നില്ല. ആളുകൾ എന്നോട് വന്ന് പറഞ്ഞു, ‘എതിരാളികൾ ഇംഗ്ലണ്ടാണ്, ആർച്ചറാണ് ബൗൾ ചെയ്യുന്നത്, മുൻപ് 3-4 തവണ നിന്നെ ഔട്ടാക്കിയിട്ടുണ്ട്’. എന്നാൽ എനിക്ക് പൂർണ്ണ ആത്മവിശ്വാസമുണ്ടായിരുന്നു. കൂടുതൽ സംസാരിച്ചാൽ അഹങ്കാരമായി തോന്നുമെന്നതിനാൽ ഞാൻ മിണ്ടാതിരുന്നു. എന്നാൽ മനസ്സിൽ വ്യക്തമായ പദ്ധതികളുണ്ടായിരുന്നു. ഒരു വർഷം മുമ്പത്തെ സഞ്ജുവല്ല ഇപ്പോഴത്തെ സഞ്ജുവെന്ന് എനിക്കറിയാമായിരുന്നു. വെസ്റ്റ് ഇൻഡീസിനെതിരായ ഇന്നിംഗ്സിന് ശേഷം എനിക്ക് വലിയ ആത്മവിശ്വാസം ലഭിച്ചു. രാജ്യത്തിന് വേണ്ടി കളി ജയിപ്പിക്കുമെന്ന കാര്യത്തിൽ എനിക്ക് യാതൊരു സംശയവുമില്ലായിരുന്നു.”
ന്യൂസിലൻഡിനെതിരായ ഫൈനൽ മത്സരത്തിൽ ടീമിന്റെ പ്രധാന റൺവേട്ടക്കാരനാവുന്നതിന്റെ ഉത്തരവാദിത്തം താൻ സന്തോഷത്തോടെ ഏറ്റെടുത്തതായി സഞ്ജു പറഞ്ഞു. “ഫോം എപ്പോഴും ഒരുപോലെ നിലനിർത്താൻ കഴിയില്ലെന്ന് ഞാൻ പഠിച്ചു. അത് വരികയും പോവുകയും ചെയ്യും. ഫൈനലിൽ റൺസ് കണ്ടെത്താനുള്ള പ്രധാന ഉത്തരവാദിത്തം എനിക്കായിരുന്നു. അവസാനം വരെ ക്രീസിൽ നിന്ന് രാജ്യത്തിനായി മത്സരം പൂർത്തിയാക്കണമെന്ന് ഞാൻ സ്വയം ഓർമ്മിപ്പിച്ചുകൊണ്ടിരുന്നു. ആ ചിന്തയാണ് ഇന്നിംഗ്സിലുടനീളം എന്നെ ശ്രദ്ധ കേന്ദ്രീകരിക്കാൻ സഹായിച്ചത്.”
അഹമ്മദാബാദിൽ നടന്ന ഫൈനലിൽ ന്യൂസിലൻഡ് ക്യാപ്റ്റൻ മിച്ചൽ സാന്റ്നർക്കെതിരെ കാണിച്ച ക്ഷമയെക്കുറിച്ചും സഞ്ജു വ്യക്തമാക്കി. “ആത്മവിശ്വാസമുള്ളപ്പോൾ സമനില പാലിക്കാൻ ബുദ്ധിമുട്ടില്ല. സാന്റ്നറുടെ ഒരു ഓവറിൽ നാല് ഡോട്ട് ബോളുകൾ കളിക്കേണ്ടി വന്നു. എന്നാൽ മറ്റൊരു ഓവറിൽ രണ്ട് സിക്സറുകൾ അടിക്കാൻ കഴിയുമെന്ന് എനിക്ക് ഉറപ്പായിരുന്നു. പണ്ടൊക്കെ ആയിരുന്നെങ്കിൽ പരിഭ്രാന്തി കാരണം അടുത്ത പന്തിൽ വലിയ ഷോട്ടിന് മുതിർന്ന് ഔട്ടാകുമായിരുന്നു. എന്നാൽ വെസ്റ്റ് ഇൻഡീസിനും ഇംഗ്ലണ്ടിനുമെതിരായ മത്സരങ്ങൾ എന്നെ ക്ഷമയോടെ കാത്തിരിക്കാൻ പഠിപ്പിച്ചു. ഏത് ബൗളറെ എപ്പോൾ ആക്രമിക്കണമെന്ന് എനിക്ക് വ്യക്തമായ ധാരണയുണ്ടായിരുന്നു. അനുഭവസമ്പത്ത് ഉപയോഗിച്ച് ഞാൻ എന്റെ സ്വാഭാവിക ഗെയിം കളിച്ചു.”
മറ്റ് സഹതാരങ്ങളുടെ പ്രകടനത്തെയും അഭിനന്ദിച്ചുകൊണ്ടാണ് സഞ്ജു സംഭാഷണം അവസാനിപ്പിച്ചത്. “എല്ലാവർക്കുമൊപ്പം ബാറ്റ് ചെയ്യുന്നത് ഞാൻ ആസ്വദിച്ചു. ഇഷാൻ നല്ല പങ്കുവഹിച്ചു. ബുംറയുടെ സംഭാവനകൾ മറക്കാൻ കഴിയില്ല. അദ്ദേഹം ഒരു യഥാർത്ഥ ‘ചീറ്റ് കോഡ്’ ആണ്. ആ ചീറ്റ് കോഡ് ഇല്ലായിരുന്നെങ്കിൽ ഞങ്ങൾക്ക് ഇംഗ്ലണ്ടിനെ മറികടക്കാൻ കഴിയില്ലായിരുന്നു. ഫൈനലിലും അദ്ദേഹം നൽകിയ തുടക്കം നിർണായകമായിരുന്നു. എല്ലാവരും തങ്ങളുടെ പങ്ക് ഭംഗിയായി നിർവ്വഹിച്ചു. മികച്ച രീതിയിൽ സംഭാവന നൽകാൻ സാധിച്ചതിൽ എനിക്ക് വലിയ സന്തോഷമുണ്ട്,” സഞ്ജു പറഞ്ഞു നിർത്തി.
