കട്നി ജില്ലാ ആശുപത്രിയിൽ നിന്ന് മനസാക്ഷിയെ മരവിപ്പിക്കുന്ന ഒരു വാർത്തയാണ് ഇപ്പോൾ പുറത്തുവരുന്നത്. അത്യാസന്ന നിലയിലായിരുന്ന രോഗിയുടെ ഭാര്യയെക്കൊണ്ട് നിർബന്ധിപ്പിച്ച് ആംബുലൻസ് വൃത്തിയാക്കിച്ച ജീവനക്കാരുടെ ക്രൂരതയ്ക്കെതിരെ വലിയ രീതിയിലുള്ള പ്രതിഷേധം ഉയരുകയാണ്. സംഭവത്തിന്റെ വീഡിയോ സമൂഹമാധ്യമങ്ങളിൽ പ്രചരിച്ചതോടെ ആരോഗ്യവകുപ്പിന്റെ പ്രവർത്തനങ്ങളെക്കുറിച്ച് ഗുരുതരമായ ചോദ്യങ്ങൾ ഉയരുന്നു.
കരേല സ്വദേശിയായ 32 വയസ്സുകാരൻ രാഹുൽ ബർമ്മൻ ഒരു വാഹനാപകടത്തിൽ ഗുരുതരമായി പരിക്കേറ്റതിനെ തുടർന്നാണ് ആശുപത്രിയിൽ എത്തിയത്. ബർഹിയിലെ പ്രാഥമിക ചികിത്സയ്ക്ക് ശേഷം വിദഗ്ധ ചികിത്സയ്ക്കായി ഇയാളെ കട്നി ജില്ലാ ആശുപത്രിയിലേക്ക് കൊണ്ടുപോയി. യാത്രയ്ക്കിടയിൽ ശാരീരിക അസ്വസ്ഥതകൾ കാരണം രാഹുൽ ആംബുലൻസിന്റെ ജനാലയിലൂടെ ഛർദ്ദിക്കുകയുണ്ടായി.
ആംബുലൻസ് ആശുപത്രിയിൽ എത്തിയപ്പോൾ, മോഹിത് നായക് എന്ന ജീവനക്കാരൻ രോഗിയുടെ ഭാര്യയെ നിർബന്ധിച്ച് വാഹനം വൃത്തിയാക്കിക്കുകയായിരുന്നു എന്നാണ് റിപ്പോർട്ടുകൾ സൂചിപ്പിക്കുന്നത്. പുറത്തുവന്ന വീഡിയോയിൽ സ്ത്രീ വെള്ളമൊഴിച്ച് ആംബുലൻസ് കഴുകുന്നത് വ്യക്തമായി കാണാം.
ഈ സമയമത്രയും സഹായത്തിനെത്താതെ അങ്ങേയറ്റം ക്രൂരമായാണ് ആംബുലൻസ് ജീവനക്കാർ പെരുമാറിയതെന്ന് ദൃക്സാക്ഷികൾ പറയുന്നു. നിലവിൽ രാഹുലിന്റെ നില ഗുരുതരമായി തുടരുന്നതിനാൽ അദ്ദേഹത്തെ ജബൽപൂർ മെഡിക്കൽ കോളേജിലേക്ക് മാറ്റിയിരിക്കുകയാണ്. അതേസമയം, സംഭവത്തെക്കുറിച്ച് അന്വേഷിച്ച് കുറ്റക്കാർക്കെതിരെ നടപടിയെടുക്കുമെന്ന് ചീഫ് മെഡിക്കൽ ഓഫീസർ അറിയിച്ചു.
