കേരളത്തിൽ നിന്ന് നേപ്പാളിലേക്ക് ഒരു ചക്രമുള്ള സൈക്കിളിൽ യാത്ര ചെയ്യുന്ന ഒരു മലയാളി ചെറുപ്പക്കാരന്റെ വീഡിയോ സോഷ്യൽ മീഡിയയിൽ വൈറലാവുകയാണ്. ലഗേജുകളും ദേശീയ പതാകയും ഘടിപ്പിച്ച പ്രത്യേക തരം സൈക്കിളിൽ, അത്ഭുതപ്പെടുത്തുന്ന ബാലൻസോടെ തിരക്കുള്ള റോഡുകളിലൂടെ പോകുന്ന ഈ യുവാവിന്റെ ദൃശ്യങ്ങൾ ആളുകളെ അമ്പരപ്പിച്ചു കഴിഞ്ഞു. പലരും ഈ യുവാവിന്റെ ധൈര്യത്തെയും കഴിവിനെയും അഭിനന്ദിക്കുമ്പോൾ, ഈ യാത്രയിലുള്ള അപകടസാധ്യതകളെക്കുറിച്ച് ആശങ്കപ്പെടുന്നവരും കുറവല്ല.
സൈക്കിളിന്റെ മുൻഭാഗം പൂർണ്ണമായും ഉയർത്തി, പിൻചക്രം മാത്രം റോഡിൽ മുട്ടിച്ചാണ് ഈ യുവാവ് യാത്ര ചെയ്യുന്നത്. കഠിനമായ ഈ സൈക്കിൾ സവാരിയിലൂടെ തിരക്കുള്ള റോഡുകളിലെ ട്രാഫിക്കിനെപ്പോലും വളരെ ശാന്തമായാണ് ഇയാൾ മറികടക്കുന്നത്. നീണ്ട യാത്രയ്ക്ക് ആവശ്യമായ ബാഗുകളും സാധനങ്ങളും സൈക്കിളിൽ ഘടിപ്പിച്ചിട്ടുണ്ട്. കൂടാതെ സൈക്കിളിന്റെ പുറകിൽ സ്ഥാപിച്ചിട്ടുള്ള ഇന്ത്യൻ പതാകയും ആളുകളുടെ ശ്രദ്ധ ആകർഷിക്കുന്നു.
വീഡിയോ വൈറലായതോടെ വലിയ പ്രതികരണങ്ങളാണ് സോഷ്യൽ മീഡിയയിൽ വരുന്നത്. ജീവിതം ബാലൻസ് ചെയ്യാൻ ആളുകൾ കഷ്ടപ്പെടുമ്പോൾ ഈ ചെറുപ്പക്കാരൻ ഒരു ചക്രത്തിൽ വലിയൊരു യാത്ര തന്നെ ബാലൻസ് ചെയ്യുകയാണെന്നാണ് ഒരാൾ കമന്റ് ചെയ്തത്. ഈ കഴിവിന് അന്താരാഷ്ട്ര അംഗീകാരം ലഭിക്കണമെന്നും, സാധാരണ സൈക്കിൾ പോലും നേരെ ഓടിക്കാൻ കഴിയാത്ത തങ്ങൾക്ക് ഇതൊരു അത്ഭുതമാണെന്നും മറ്റു ചിലർ പറയുന്നുണ്ട്. യുവാക്കളുടെ കഠിനാധ്വാനത്തിനും നിശ്ചയദാർഢ്യത്തിനും ഇതൊരു വലിയ മാതൃകയാണെന്നാണ് ഭൂരിഭാഗം പേരുടെയും അഭിപ്രായം.
സാധാരണ സൈക്കിൾ ചവിട്ടുന്നതുപോലെയല്ല ഒറ്റച്ചക്രത്തിലുള്ള യാത്ര. അതിന് വലിയ ശരീരബലവും ഏകാഗ്രതയും ആവശ്യമാണ്. കുറച്ചുദൂരം പോലും ഇങ്ങനെ ഓടിക്കാൻ പാടാണെന്നിരിക്കെയാണ് ഇത്രയും നീണ്ടൊരു അന്തർദേശീയ യാത്ര ഈ ചെറുപ്പക്കാരൻ നടത്തുന്നത്. ലഗേജുകളുടെ ഭാരമുണ്ടായിട്ടും യാതൊരു ഭയവുമില്ലാതെ വളരെ കൂളായാണ് ഇയാൾ സൈക്കിൾ ഓടിക്കുന്നത്.
എന്നാൽ, ഈ സാഹസികതയെ അഭിനന്ദിക്കുന്നതിനൊപ്പം തന്നെ പൊതുനിരത്തുകളിൽ ഇത്തരം സ്റ്റണ്ടുകൾ ചെയ്യുന്നത് വലിയ അപകടങ്ങൾക്ക് കാരണമാകുമെന്ന് ചിലർ ഓർമ്മിപ്പിക്കുന്നു. ഹൈവേകളിലൂടെയും മറ്റും ദീർഘദൂര യാത്ര നടത്തുമ്പോൾ ഹെൽമെറ്റ് ഉൾപ്പെടെയുള്ള സുരക്ഷാ മാനദണ്ഡങ്ങൾ പാലിക്കേണ്ടതുണ്ടെന്നും റോഡ് സുരക്ഷാ വിദഗ്ദ്ധർ ചൂണ്ടിക്കാണിക്കുന്നുണ്ട്.
