കൊച്ചി ∙ മോഡലിങ് രംഗത്ത് അവസരങ്ങൾ വാഗ്ദാനം ചെയ്ത് യുവതികളെ ദുബായിലെത്തിച്ച് നിർബന്ധിത ലൈംഗികവൃത്തിക്ക് ഇരയാക്കുന്ന പെൺവാണിഭ സംഘത്തിൽ, ബിലാൽ എന്ന പ്രതിയുടെ പങ്ക് കൂടുതൽ വ്യക്തമായി. ഇയാളുടെ യഥാർത്ഥ പേര് എസ്. ശ്രീകുമാർ എന്നാണെന്ന് കോടതിയിൽ സമർപ്പിച്ച റിമാൻഡ് റിപ്പോർട്ടിൽ പറയുന്നു.
എന്നാൽ അറസ്റ്റിലായ മറ്റ് പ്രതികളെല്ലാം തങ്ങളുടെ മൊബൈൽ ഫോണുകളിൽ ഇയാളുടെ പേര് ‘ബിലാലിക്ക’ എന്നാണ് സൂക്ഷിച്ചിരുന്നത്. ആലപ്പുഴ ചാരുംമൂട് സ്വദേശിയായ ഇയാൾ ഇപ്പോൾ കൊച്ചി കണിയമ്പുഴയിലെ ഫ്ലാറ്റിലായിരുന്നു താമസം. കേസിൽ ആദ്യം പിടിയിലായ സിന്ധു നൽകിയ വിവരത്തിന്റെ അടിസ്ഥാനത്തിലാണ് പൊലീസ് ഇയാളെ ഫ്ലാറ്റിൽ നിന്ന് കസ്റ്റഡിയിലെടുത്തതും പിന്നീട് അറസ്റ്റ് രേഖപ്പെടുത്തി കോടതിയിൽ ഹാജരാക്കി റിമാൻഡ് ചെയ്തതും.
കേസിലെ പരാതിക്കാരിയായ യുവതിയുടെ വീട്ടിലെത്തി ദുബായിൽ മികച്ച മോഡലിങ് അവസരങ്ങളുണ്ടെന്ന് വിശ്വസിപ്പിച്ചത് ബിലാലാണ്. കേസിലെ മൂന്നാം പ്രതിയായ മഞ്ജിമയെയും പരാതിക്കാരിയെയും പ്രധാന പ്രതിയായ സിന്ധുവിന് പരിചയപ്പെടുത്തിയതും ഇയാളാണ്. ഈ വർഷം ഫെബ്രുവരി 20-നാണ് പരാതിക്കാരിയെ ദുബായിലേക്ക് കൊണ്ടുപോയത്. ബിലാലും, നിലവിൽ ദുബായിൽ ഒളിവിൽ കഴിയുന്ന രണ്ടാം പ്രതി ഷംലയും, മഞ്ജിമയും ചേർന്നാണ് യുവതിയെ വിദേശത്തേക്ക് കൂട്ടിക്കൊണ്ടുപോയത്.
സിന്ധുവിന്റെ ഉടമസ്ഥതയിലുള്ള ‘എലീസ ഇവൻസ്’ എന്ന കമ്പനിയുടെ പേരിലുള്ള സന്ദർശക വിസയിലാണ് ഇവരെ ദുബായിലേക്ക് കൊണ്ടുപോയത്. ദുബായിലേക്ക് എത്തിക്കുന്ന യുവതികളുടെ എണ്ണത്തിന് അനുസരിച്ച് ബിലാലിന് കൃത്യമായി കമ്മിഷൻ പണം നൽകിയിരുന്നതായി സിന്ധു പൊലീസിനോട് സമ്മതിച്ചിട്ടുണ്ട്. സിന്ധുവിന്റെ ബാങ്ക് അക്കൗണ്ടിൽ നിന്ന് പലതവണകളായി ബിലാലിന്റെ അക്കൗണ്ടിലേക്ക് പണം കൈമാറിയതിന്റെ രേഖകളും പൊലീസ് കണ്ടെത്തിയിട്ടുണ്ട്.
വ്യത്യസ്ത സ്ഥലങ്ങളിൽ പല പേരുകളിലാണ് ശ്രീകുമാർ അറിയപ്പെട്ടിരുന്നതെന്ന് അന്വേഷണത്തിൽ വ്യക്തമായി. കേസിൽ അറസ്റ്റിലായ മഞ്ജിമ, അലീന എന്നിവരുടെ ഫോണുകളിലും ഇയാളുടെ പേര് ബിലാലിക്ക എന്ന് തന്നെയാണ് രേഖപ്പെടുത്തിയിരുന്നത്. സിന്ധുവിന് വേണ്ടി യുവതികളെ ദുബായിലേക്ക് കടത്തുന്ന പ്രധാന കണ്ണി ഇയാളാണെന്ന് റിമാൻഡ് റിപ്പോർട്ട് സ്ഥിരീകരിക്കുന്നു. പരാതിക്കാരിയെ കൂടാതെ ഒട്ടേറെ മറ്റ് യുവതികളെയും താൻ ദുബായിലേക്ക് അയച്ചിട്ടുണ്ടെന്ന് ഇയാൾ പൊലീസിനോട് സമ്മതിച്ചിട്ടുണ്ട്. ഇയാളുടെ മൊബൈൽ ഫോണിൽ നിന്ന് ഒട്ടേറെ യുവതികളുടെ ചിത്രങ്ങളും ഇതുമായി ബന്ധപ്പെട്ട വാട്സ്ആപ് സന്ദേശങ്ങളും പൊലീസ് കണ്ടെടുത്തിട്ടുണ്ട്.
യുവതികളെ ദുബായിൽ എത്തിക്കുന്നതിന് പ്രതികൾക്ക് 50,000 രൂപ മുതൽ ഒരു ലക്ഷം രൂപ വരെ കമ്മീഷൻ ലഭിച്ചിരുന്നതായി സിറ്റി പൊലീസ് കമ്മിഷണർ കാളിരാജ് മഹേഷ് കുമാർ വ്യക്തമാക്കി. ബിലാലും സംഘവും ദുബായിൽ എത്തിച്ച യുവതിയെ സിന്ധു വിമാനത്താവളത്തിൽ വെച്ച് ഏറ്റുവാങ്ങുകയും ബർദുബായിലെ ഫ്ലാറ്റിലെത്തിച്ച് ലഹരിമരുന്ന് നൽകി നിർബന്ധിച്ച് ലൈംഗികവൃത്തിക്ക് ഉപയോഗിക്കുകയുമായിരുന്നു.
ഇതിനുപുറമെ, പീഡന ദൃശ്യങ്ങൾ മൊബൈലിൽ പകർത്തി യുവതിയുടെ ഭർത്താവിന് ഉൾപ്പെടെ അയച്ചുകൊടുക്കുകയും ചെയ്തു. സന്ദർശക വിസയുടെ കാലാവധി കഴിഞ്ഞതിനെ തുടർന്ന് ഏപ്രിലിലാണ് യുവതിയെ തിരികെ നാട്ടിലേക്ക് അയച്ചത്. ഈ കേസിൽ ഒന്നാം പ്രതി സിന്ധു, മൂന്നാം പ്രതി മഞ്ജിമ, നാലാം പ്രതി അലീന, ആറാം പ്രതിയായ ബിലാൽ (ശ്രീകുമാർ) എന്നിവർ ഇതുവരെ അറസ്റ്റിലായിട്ടുണ്ട്. രണ്ടാം പ്രതി ഷംലയും അഞ്ചാം പ്രതി റഹ്മത്തും നിലവിൽ ദുബായിൽ ഒളിവിലാണെന്നാണ് പൊലീസ് സംശയിക്കുന്നത്.
