സൂറത്തിലെ ഉധ്ന സ്വദേശിയായ ഒരാൾ 2017 ഫെബ്രുവരി 18-ന് സ്റ്റേറ്റ് ബാങ്ക് ഓഫ് ഇന്ത്യയുടെ എടിഎമ്മിൽ നിന്ന് 10,000 രൂപ പിൻവലിക്കാൻ ശ്രമിച്ചു. കാർഡ് ഉപയോഗിച്ച് പിൻ നമ്പർ നൽകിയെങ്കിലും മെഷീനിൽ നിന്ന് പണമോ രസീതോ വന്നില്ല. എന്നാൽ അദ്ദേഹത്തിന്റെ ബാങ്ക് അക്കൗണ്ടിൽ നിന്ന് പണം കുറഞ്ഞതായി മൊബൈലിൽ സന്ദേശം ലഭിച്ചു.
ഉടൻ തന്നെ തന്റെ ബാങ്കായ ബാങ്ക് ഓഫ് ബറോഡയുടെ ഡുംഭാൽ ബ്രാഞ്ചിൽ പരാതിപ്പെട്ടെങ്കിലും മാസങ്ങളോളം ഇമെയിലുകൾ അയച്ചിട്ടും പരിഹാരമുണ്ടായില്ല. എടിഎമ്മിലെ സിസിടിവി ദൃശ്യങ്ങൾക്കായി എസ്ബിഐയിൽ വിവരാവകാശ നിയമപ്രകാരം അപേക്ഷ നൽകിയെങ്കിലും ഫലമുണ്ടായില്ല. ഒടുവിൽ അതേ വർഷം ഡിസംബറിൽ അദ്ദേഹം ഉപഭോക്തൃ കോടതിയെ സമീപിച്ചു.
ബാങ്ക് ഓഫ് ബറോഡ തങ്ങളുടെ രേഖകളിൽ ഇടപാട് വിജയകരമാണെന്ന് കോടതിയിൽ വാദിച്ചെങ്കിലും അത് തെളിയിക്കാൻ ആവശ്യമായ രേഖകൾ ഹാജരാക്കാൻ അവർക്കായില്ല. പണം ലഭിച്ചോ എന്ന് ഉറപ്പുവരുത്തേണ്ടത് ബാങ്കിന്റെ ഉത്തരവാദിത്തമാണെന്ന് നിരീക്ഷിച്ച കോടതി, ആർബിഐ നിയമപ്രകാരം അഞ്ച് ദിവസത്തിനുള്ളിൽ തുക തിരികെ നൽകേണ്ടതായിരുന്നുവെന്ന് വ്യക്തമാക്കി.
ഒമ്പത് വർഷം നീണ്ട നിയമപോരാട്ടത്തിനൊടുവിൽ, 10,000 രൂപ 9 ശതമാനം പലിശ സഹിതം തിരികെ നൽകാൻ കോടതി ഉത്തരവിട്ടു. കൂടാതെ, പണം നൽകാൻ വൈകിയ ഓരോ ദിവസത്തിനും 100 രൂപ വീതം പിഴയായി 3,28,000 രൂപയും, മാനസിക ബുദ്ധിമുട്ടുകൾക്ക് 3,000 രൂപയും, കോടതി ചെലവിനായി 2,000 രൂപയും നൽകാൻ ബാങ്കിനോട് കോടതി നിർദേശിച്ചു. അങ്ങനെ 10,000 രൂപയ്ക്ക് വേണ്ടിയുള്ള പോരാട്ടം ആ വ്യക്തിക്ക് 3.28 ലക്ഷം രൂപയിലധികം നേടിക്കൊടുത്തു.
