ഓട്ടം, ചാട്ടം, വ്യായാമം, ആഹാരനിയന്ത്രണം തുടങ്ങി നിങ്ങള് ഭാരം കുറയ്ക്കാന് എന്തെല്ലാം ചെയ്യാറുണ്ട്? അതെല്ലാം ശരീരത്തിന് വേണ്ടിയാണ് ചെയ്യുന്നതെങ്കില് നോയിഡ ആസ്ഥാനമായുള്ള ഒരു ചൈനീസ് കമ്പനി ഇങ്ങനെ ചെയ്യുന്ന ജീവനക്കാരെ പ്രോത്സാഹിപ്പിക്കാന് ആകര്ഷകമായ സമ്മാനത്തുക പ്രഖ്യാപിച്ചിരിക്കുകയാണ്. തങ്ങളുടെ ജീവനക്കാരെ ശരീരഭാരം കുറയ്ക്കാന് പ്രോത്സാഹിപ്പിക്കുന്നതിനായി ഒരു മില്യണ് യുവാനിന്റെ (ഏകദേശം 1.2 കോടി രൂപ) ബോണസ് കമ്പനി പ്രഖ്യാപിച്ചത് വലിയ ചര്ച്ചകള്ക്ക് വഴിവെച്ചു.
ഒരു ജീവനക്കാരന് 90 ദിവസം കൊണ്ട് 20 കിലോയിലധികം ഭാരം കുറച്ചതിന് 20,000 യുവാനാണ് (ഏകദേശം 2.4 ലക്ഷം രൂപ) ലഭിച്ചത്. ഓഗസ്റ്റ് 12-ന് ഷെന്ഷെന് ആസ്ഥാനമായുള്ള സാങ്കേതിക കമ്പനിയായ ആരാഷി വിഷന് ഇന്ക്. (ഇന്സ്റ്റാ360), തങ്ങളുടെ വാര്ഷിക ‘മില്യണ് യുവാനിയുടെ ശരീരഭാരം കുറയ്ക്കല് ചലഞ്ച്’ പ്രഖ്യാപിച്ചതോടെയാണ് വാര്ത്തകളില് ഇടം നേടിയത്.
ഈ പദ്ധതി എല്ലാ വര്ഷവും നടത്താറുണ്ട്. ചിട്ടയായ വ്യായാമത്തിലൂടെയും ആരോഗ്യകരമായ ഭക്ഷണരീതികളിലൂടെയും ജീവനക്കാര്ക്ക് ആരോഗ്യകരമായ ജീവിതശൈലി സ്വീകരിക്കാന് പ്രചോദനം നല്കുക എന്നതാണ് ഇതിന്റെ ലക്ഷ്യം. എല്ലാ ജീവനക്കാര്ക്കും ഇതില് രജിസ്റ്റര് ചെയ്യാം. ഓരോ 0.5 കിലോഗ്രാം ഭാരം കുറയ്ക്കുമ്പോഴും, പങ്കെടുത്തവര്ക്ക് 500 യുവാന് (ഏകദേശം 6,000 രൂപ) ക്യാഷ് റിവാര്ഡ് ലഭിക്കും. ഈ വര്ഷം, ഷി യാകി എന്ന യുവ ജീവനക്കാരന് മൂന്ന് മാസത്തിനുള്ളില് 20 കിലോ ഭാരം കുറച്ച് ‘ശരീരഭാരം കുറയ്ക്കല് ചാമ്പ്യന്’ എന്ന പദവിയും 20,000 യുവാന് ക്യാഷ് പ്രൈസും നേടി. തന്റെ ജീവിതത്തിലെ ഏറ്റവും മികച്ച സമയമാണിതെന്ന് ഷി യാകി പറഞ്ഞു.
ഭാരം കുറയുന്നതില് പുരോഗതിയില്ലാത്ത മറ്റ് സഹപ്രവര്ത്തകരെ പ്രചോദിപ്പിക്കാനായി ഷി യാകി ‘ക്വിന് ഹാവോ ശരീരഭാരം കുറയ്ക്കല് രീതി’ ഗ്രൂപ്പ് ചാറ്റില് പങ്കുവെച്ചു. ചൈനീസ് നടന് ക്വിന് ഹാവോ 15 ദിവസം കൊണ്ട് 10 കിലോ ഭാരം കുറയ്ക്കാന് ഉപയോഗിച്ച ഈ രീതി ഇങ്ങനെയാണ്- ആദ്യ ദിവസം സോയാബീന് പാല് മാത്രം കുടിക്കുക. രണ്ടാം ദിവസം ചോളം മാത്രം കഴിക്കുക. മൂന്നാം ദിവസം പഴങ്ങള് മാത്രം കഴിക്കുക. തുടര്ന്നുള്ള ദിവസങ്ങളില് പ്രോട്ടീനും പച്ചക്കറികളും മാറിമാറി കഴിക്കുക.
2022 മുതല്, കമ്പനി ഏഴ് തവണ ഈ ചലഞ്ച് നടത്തി, ആകെ 2 മില്യണ് യുവാനില ധികം (ഏകദേശം 2.4 കോടി രൂപ) സമ്മാനമായി നല്കി. കഴിഞ്ഞ വര്ഷം മാത്രം, 99 ജീവനക്കാര് പങ്കെടുത്തു, 950 കിലോഗ്രാം ഭാരം കുറച്ചു, ഒരു മില്യണ് യുവാന് ക്യാഷ് റിവാര്ഡ് പങ്കിട്ടെടുത്തു. ‘ഈ ചലഞ്ചിലൂടെ, ആരോഗ്യകരമായ ജീവിതശൈലി പ്രോത്സാഹിപ്പിക്കാനും ജോലിക്ക് പുറമെ തങ്ങളുടെ ക്ഷേമത്തിന് മുന്ഗണന നല്കാന് ജീവനക്കാരെ പ്രേരിപ്പിക്കാനും ഞങ്ങള് ലക്ഷ്യമിടുന്നു- ഒരു കമ്പനി പ്രതിനിധി പറഞ്ഞു. ശരീരഭാരം തിരികെ കൂടിയാല് പിഴ നല്കണം എന്നൊരു വ്യവസ്ഥയും ഈ ചലഞ്ചിലുണ്ട്. തിരികെ കൂടുന്ന ഓരോ 0.5 കിലോഗ്രാമിനും 800 യുവാന് പിഴ അടയ്ക്കണം.
ഇതുവരെ ആര്ക്കും ഈ പിഴ ചുമത്തിയിട്ടില്ല എന്നത് ശ്രദ്ധേയമാണ്. ഈ പദ്ധതി രാജ്യവ്യാപകമായ ഒരു വലിയ ഉദ്യമവുമായി യോജിച്ചുപോകുന്നതാണ്. 2024 ജൂണില്, ചൈന ‘ശരീരഭാരം നിയന്ത്രിക്കുന്നതിനുള്ള വര്ഷം’ എന്ന പേരില് ഒരു മൂന്നുവര്ഷ പദ്ധതി (2024- 2026) ആരംഭിച്ചു. ആരോഗ്യരംഗത്തെ പ്രോത്സാഹിപ്പിക്കാനും രാജ്യത്തെ വര്ദ്ധിച്ചുവരുന്ന അമിതവണ്ണവും പൊണ്ണത്തടിയും നിയന്ത്രിക്കാനും ലക്ഷ്യമിട്ട്, ദേശീയ ആരോഗ്യ കമ്മീഷനും മറ്റ് 16 വകുപ്പുകളും ചേര്ന്നാണ് ഈ പദ്ധതിക്ക് നേതൃത്വം നല്കുന്നത്.
