കാൻഹ ടൈഗർ റിസർവിനുള്ളിൽ കിടന്ന പ്ലാസ്റ്റിക് കുപ്പി ഒരു കടുവ കടിച്ചുകുടയുന്ന ദൃശ്യങ്ങൾ സോഷ്യൽ മീഡിയയിൽ വൈറലായതോടെ, ഇന്ത്യയിലെ ഏറ്റവും സുരക്ഷിതമായ വന്യജീവി സങ്കേതങ്ങളിൽ പോലും പ്ലാസ്റ്റിക് മലിനീകരണം എത്രത്തോളം ഗുരുതരമായി ബാധിച്ചിരിക്കുന്നു എന്നതിലേക്ക് വിരൽ ചൂണ്ടുന്നു .
വൈൽഡ് ലൈഫ് ഫോട്ടോഗ്രാഫർ അനിൽ വോഹ്റ പകർത്തിയ ഈ ദൃശ്യങ്ങൾ ഡോ. പി.എം. ധാക്കത്തെയാണ് എക്സ് പ്ലാറ്റ്ഫോമിൽ പങ്കുവെച്ചത്. വനത്തിനുള്ളിൽ കിടന്ന പ്ലാസ്റ്റിക് കുപ്പി കടുവ കൗതുകത്തോടെ കടിക്കുന്നത് ദൃശ്യങ്ങളിൽ കാണാം. മനുഷ്യർ തള്ളുന്ന മാലിന്യങ്ങൾ വന്യജീവികളെയും പ്രകൃതിയെയും എത്രത്തോളം ദോഷകരമായി ബാധിക്കുന്നു എന്നതിനെക്കുറിച്ചുള്ള ചർച്ചകൾക്ക് ഈ വീഡിയോ വീണ്ടും വഴിവെച്ചിരിക്കുകയാണ്. പ്രകൃതിയുടെ കാതലായ ഭാഗങ്ങളിൽ പോലും പ്ലാസ്റ്റിക് മലിനീകരണം എത്തിക്കഴിഞ്ഞു എന്നതിന്റെ വ്യക്തമായ തെളിവാണ് ഇതെന്നും, ഇത് വെറുമൊരു മാലിന്യപ്രശ്നം മാത്രമല്ല, ജൈവവൈവിധ്യത്തിന് തന്നെ വലിയൊരു ഭീഷണിയാണെന്നും ഡോ. ധാക്കത്തെ പറഞ്ഞു.
പ്ലാസ്റ്റിക് മാലിന്യങ്ങൾ വന്യജീവികൾക്ക് ഉണ്ടാക്കുന്ന അപകടങ്ങൾ നമ്മൾ കാണുന്നതിലും അപ്പുറമാണെന്ന് അദ്ദേഹം വിശദീകരിച്ചു. വലിയ പ്ലാസ്റ്റിക് കഷണങ്ങൾ മൃഗങ്ങൾ വിഴുങ്ങിയാൽ അവയുടെ ഉള്ളിൽ കുടുങ്ങാനും മുറിവുകളുണ്ടാക്കാനും സാധ്യതയുണ്ട്. അതേസമയം കണ്ണിന് കാണാൻ കഴിയാത്ത മൈക്രോപ്ലാസ്റ്റിക് കണികകൾ മണ്ണിലൂടെയും വെള്ളത്തിലൂടെയും ആവാസവ്യവസ്ഥയുടെ ഭാഗമാവുകയും, കാലക്രമേണ ഭക്ഷണശൃംഖലയെ മൊത്തത്തിൽ മലിനമാക്കുകയും ചെയ്യും.
‘ബയോമാഗ്നിഫിക്കേഷൻ’ (ഭക്ഷണശൃംഖലയിലൂടെ വിഷാംശം ഉയർന്ന ജീവികളിലേക്ക് പടരുന്ന പ്രക്രിയ) വഴി ഈ മലിനീകരണ വസ്തുക്കൾ കാട്ടിലെ രാജാവായ കടുവകളെപ്പോലുള്ള ജീവികളുടെ ശരീരത്തിൽ അമിതമായി അടിഞ്ഞുകൂടാനും കടുത്ത ആരോഗ്യപ്രശ്നങ്ങൾ ഉണ്ടാക്കാനും കാരണമാകും. വനത്തിന്റെ സന്തുലിതാവസ്ഥ നിലനിർത്തുന്നതിൽ കടുവകൾ വഹിക്കുന്ന പങ്ക് വളരെ വലുതാണെന്നും, അതിനാൽ വന്യജീവി സങ്കേതങ്ങളിലേക്ക് മാലിന്യങ്ങൾ വലിച്ചെറിയുന്നത് പൂർണ്ണമായും നിർത്തണമെന്നും അദ്ദേഹം ഓർമ്മിപ്പിച്ചു.
വന്യജീവി സ്നേഹികൾക്കും പരിസ്ഥിതി പ്രവർത്തകർക്കും ഇടയിൽ ഈ വീഡിയോ വലിയ രീതിയിൽ ചർച്ചയായിട്ടുണ്ട്. അതീവ സംരക്ഷിത മേഖലയായ നാഷണൽ പാർക്കിൽ പ്ലാസ്റ്റിക് കുപ്പി എങ്ങനെ വന്നു എന്നത് വിനോദസഞ്ചാരികൾ കാട്ടിൽ നടത്തുന്ന മാലിന്യനിക്ഷേപത്തിന്റെ ആഴം കാണിക്കുന്നു എന്ന് പലരും അഭിപ്രായപ്പെട്ടു. ദേശീയോദ്യാനങ്ങളിലും പരിസരപ്രദേശങ്ങളിലും പ്ലാസ്റ്റിക് നിയന്ത്രണങ്ങൾ കൂടുതൽ കർശനമാക്കാൻ അധികൃതർ തയ്യാറാകണമെന്ന് സോഷ്യൽ മീഡിയയിൽ ആവശ്യമുയരുന്നുണ്ട്. വന്യജീവി സംരക്ഷണം എന്നാൽ നായാട്ട് തടയുന്നതോ കാടുകൾ വെട്ടിനശിപ്പിക്കാതെ സൂക്ഷിക്കുന്നതോ മാത്രമല്ല, മനുഷ്യൻ ഉണ്ടാക്കുന്ന മാലിന്യങ്ങൾ ഈ ജീവികളുടെ ആവാസവ്യവസ്ഥയിലേക്ക് എത്താതിരിക്കാൻ നോക്കൽ കൂടിയാണെന്ന് ഈ ദൃശ്യങ്ങൾ നമ്മെ ഓർമ്മിപ്പിക്കുന്നു.
