കാലിഫോർണിയയിലെ മൊജാവെ മരുഭൂമിയിൽ നടന്ന ഒരു വിവാഹചടങ്ങിൽ പ്രകൃതി ഒരുക്കിയ അപ്രതീക്ഷിത ദൃശ്യങ്ങൾ സമൂഹമാധ്യമങ്ങളിൽ തരംഗമാകുന്നു.
അതീവ സുന്ദരവും ശാന്തവുമായ അന്തരീക്ഷത്തിൽ ദമ്പതികൾ വിവാഹ പ്രതിജ്ഞ ചൊല്ലാൻ തയ്യാറെടുക്കുമ്പോഴാണ് മലനിരകളിൽ നിന്ന് ഭീദിതമായ ശബ്ദം കേട്ടുതുടങ്ങിയത്. സെക്കന്റുകൾക്കുള്ളിൽ വിവാഹവേദിക്ക് തൊട്ടുപിന്നിലെ മലനിരകളിൽ നിന്ന് കൂറ്റൻ പാറക്കല്ലുകൾ ഇടിഞ്ഞുവീഴാൻ തുടങ്ങി. സിനിമയെ വെല്ലുന്ന രീതിയിലുള്ള ഈ പ്രകൃതി പ്രതിഭാസം കണ്ട് വധൂവരന്മാരും അതിഥികളും അമ്പരന്നുപോയി.
വെഡിങ് ഫോട്ടോഗ്രാഫറായ ലോയിസ് വാൽഡെസ് പകർത്തിയ ഈ ദൃശ്യങ്ങൾ ഇപ്പോൾ ഇന്റർനെറ്റിൽ വ്യാപകമായി പ്രചരിക്കുകയാണ്. മലയിടിച്ചിൽ കണ്ട് എല്ലാവരും ഒന്ന് ഞെട്ടിയെങ്കിലും ആർക്കും പരിക്കുകളൊന്നും സംഭവിച്ചില്ല. “മലകളെപ്പോലും ചലിപ്പിക്കുന്ന പ്രണയം” എന്നാണ് പലരും ഈ വീഡിയോയ്ക്ക് താഴെ കമന്റ് ചെയ്യുന്നത്.
പ്രകൃതിയുടെ ശക്തിയും സൗന്ദര്യവും ഒരുപോലെ വെളിവാക്കിയ ആ നിമിഷം ദമ്പതികൾക്ക് ഒരിക്കലും മറക്കാനാവാത്ത ഒരു വിവാഹ സമ്മാനമായി മാറി. അല്പസമയത്തെ അമ്പരപ്പിന് ശേഷം ചടങ്ങുകൾ സന്തോഷത്തോടെ പൂർത്തിയാക്കി.
