പ്രതിപക്ഷ ഉപനേതാവ് സ്ഥാനം സിപിഐക്ക് അർഹതപ്പെട്ടതാണെന്ന് പാർട്ടി സംസ്ഥാന സെക്രട്ടറി ബിനോയ് വിശ്വം ഡൽഹിയിൽ വ്യക്തമാക്കി. പിണറായി വിജയൻ പ്രതിപക്ഷ നേതാവാകുമെന്ന സൂചനകൾക്കിടെയാണ് ഈ സ്ഥാനത്തിനായി സിപിഐ ശക്തമായ അവകാശവാദം ഉന്നയിച്ചിരിക്കുന്നത്. നിലവിലെ രാഷ്ട്രീയ സാഹചര്യത്തിൽ പ്രതിപക്ഷത്തെ രണ്ടാമത്തെ വലിയ കക്ഷിയെന്ന നിലയിൽ ഈ പദവി തങ്ങൾക്ക് ലഭിക്കുമെന്ന് അദ്ദേഹം പ്രത്യാശ പ്രകടിപ്പിച്ചു.
പ്രതിപക്ഷ ഉപനേതൃസ്ഥാനം എന്നത് കേവലം ഒരു കീഴ്വഴക്കം മാത്രമാണെന്ന സിപിഎം നിലപാടിനെ ബിനോയ് വിശ്വം ചോദ്യം ചെയ്തു. ഭരണഘടനയിൽ ഇങ്ങനെയൊരു പദവിയെക്കുറിച്ച് പറയുന്നില്ലെന്ന് തങ്ങൾക്കും അറിയാമെന്നും എന്നാൽ കേരളത്തിൽ ഇത്തരം രീതികൾ നിലവിലുണ്ടെന്നും അദ്ദേഹം ഓർമ്മിപ്പിച്ചു. പ്രതിപക്ഷ നേതാവും ഉപനേതാവും എപ്പോഴും ഒരേ പാർട്ടിയിൽ നിന്ന് തന്നെയാകണമെന്ന നിർബന്ധമില്ലെന്നും കാലത്തിനനുസരിച്ച് ചില പഴയ രീതികൾ മാറേണ്ടതുണ്ടെന്നും അദ്ദേഹം കൂട്ടിച്ചേർത്തു.
തിരഞ്ഞെടുപ്പ് തോൽവി ജനങ്ങൾ നൽകിയ വലിയൊരു മുന്നറിയിപ്പാണെന്നും തെറ്റുകൾ തിരുത്തി മുന്നോട്ട് പോകണമെന്നും അദ്ദേഹം പറഞ്ഞു. ആശാ വർക്കർമാരുടെ സമരത്തെ അപമാനിച്ചത് വലിയ തെറ്റായിപ്പോയി. തൊഴിലാളി സമരങ്ങളെ ആക്ഷേപിക്കുന്നത് കമ്യൂണിസ്റ്റ് ശൈലിയല്ലെന്നും അദ്ദേഹം വിമർശിച്ചു. വ്യക്തിപൂജ പാർട്ടിയിൽ കടന്നുകൂടിയിട്ടുണ്ടെങ്കിൽ അത് ഗുരുതരമായ വീഴ്ചയാണെന്നും നേതൃമാറ്റത്തെക്കുറിച്ചുള്ള ഫെയ്സ്ബുക്ക് ചർച്ചകളല്ല പാർട്ടി തീരുമാനങ്ങളാണ് പ്രധാനമെന്നും അദ്ദേഹം വ്യക്തമാക്കി.
നേരത്തെ ആശാ സമരവുമായി ബന്ധപ്പെട്ട് സിപിഎമ്മുമായി അഭിപ്രായവ്യത്യാസമുണ്ടായിരുന്നെങ്കിലും സിപിഐ അത് പരസ്യമായി പ്രകടിപ്പിച്ചിരുന്നില്ല. എന്നാൽ നിയമസഭാ തിരഞ്ഞെടുപ്പിലേറ്റ കനത്ത പരാജയത്തിന് പിന്നാലെയാണ് ഇപ്പോൾ പാർട്ടി നിലപാടുകൾ ബിനോയ് വിശ്വം കടുപ്പിച്ചത്. ഭരണമുന്നണിയിലെ പ്രധാന കക്ഷികൾക്കിടയിലുള്ള ഈ പരസ്യമായ തർക്കം രാഷ്ട്രീയ കേന്ദ്രങ്ങളിൽ വലിയ ചർച്ചയായി മാറിയിട്ടുണ്ട്.
