ജസ്പ്രീത് ബുംറയുടെ പന്തുകളിൽ സിക്സർ അടിക്കുക എന്നത് എളുപ്പമുള്ള കാര്യമല്ല. അദ്ദേഹം എറിയുന്ന ആദ്യ പന്തിൽ തന്നെ സിക്സർ അടിക്കുക എന്നത് അതിലും വിഷമമുള്ള കാര്യമാണ്. എന്നാൽ ചൊവ്വാഴ്ച രാജസ്ഥാൻ റോയൽസും മുംബൈ ഇന്ത്യൻസും തമ്മിലുള്ള മത്സരത്തിൽ ഇതെല്ലാം സംഭവിച്ചു. വെറും 15 വയസ്സുകാരനായ വൈഭവ് സൂര്യവംശിയാണ് ബുംറയുടെ ആദ്യ ഓവറിൽ തന്നെ രണ്ട് സിക്സറുകൾ ഉൾപ്പെടെ 14 റൺസ് അടിച്ചെടുത്തത്. മൂന്ന് ഓവർ എറിഞ്ഞ ബുംറ 34 റൺസ് വഴങ്ങിയെങ്കിലും ഒരു വിക്കറ്റ് പോലും വീഴ്ത്താനായില്ല.
ഈ സീസണിലെ ബുംറയുടെ പ്രകടനം ആരാധകര്ക്ക് ആശങ്കയുണ്ടാക്കുന്നതാണ്. കഴിഞ്ഞ വർഷം 16 വിക്കറ്റുകളും അതിന് മുൻപത്തെ വർഷം 20 വിക്കറ്റുകളും വീഴ്ത്തിയ ബുംറയ്ക്ക് ഈ സീസണിലെ മൂന്ന് മത്സരങ്ങളിൽ ഇതുവരെ ഒരു വിക്കറ്റ് പോലും നേടാനായിട്ടില്ല. വിക്കറ്റ് കിട്ടിയില്ലെങ്കിലും റൺസ് വഴങ്ങുന്നതിൽ കാണിച്ചിരുന്ന മിതത്വം (Economy) ഇത്തവണ അദ്ദേഹത്തിന് നഷ്ടമായി . മുൻ വർഷങ്ങളിൽ ആറിൽ താഴെ റൺസ് മാത്രം വഴങ്ങിയിരുന്ന ബുംറയുടെ ഇത്തവണത്തെ ശരാശരി 8 ആണ്. ഇത് 2015-ന് ശേഷമുള്ള അദ്ദേഹത്തിന്റെ ഏറ്റവും ഉയർന്ന നിരക്കാണ്.
ബുംറയുടെ ഈ ഫോമില്ലായ്മയ്ക്ക് പ്രധാനമായും മൂന്ന് കാരണങ്ങളാണ് ചൂണ്ടിക്കാണിക്കപ്പെടുന്നത്. ഒന്ന്, കഴിഞ്ഞ വർഷം അദ്ദേഹത്തിന് ഉണ്ടായ നടുവിനേറ്റ പരിക്ക്. ഇത് അദ്ദേഹത്തിന്റെ പന്തുകളുടെ കൃത്യതയെ ബാധിച്ചിട്ടുണ്ട്. മുൻപ് ആദ്യ പന്ത് മുതൽ കൃത്യമായ ലെങ്തിൽ പന്തെറിയാറുള്ള ബുംറ ഇപ്പോൾ ഇടയ്ക്കിടെ പിഴവുകൾ വരുത്തുന്നു. രണ്ടാമതായി, മുംബൈ ഇന്ത്യൻസ് ബൗളിംഗ് നിരയിൽ അദ്ദേഹം ഒറ്റപ്പെട്ടുപോകുന്നു എന്നതാണ്. മിച്ചൽ സാന്റ്നർ ഒഴികെയുള്ള മറ്റെല്ലാ മുംബൈ ബൗളർമാരും ഓവറിൽ ശരാശരി 10 റൺസിന് മുകളിൽ വഴങ്ങുന്നുണ്ട്. മറ്റുള്ളവർ റൺസ് വാരിക്കോരി നൽകുമ്പോൾ സമ്മർദ്ദത്തിലാകുന്ന ബുംറയ്ക്ക് അത് മറികടക്കാൻ സാധിക്കുന്നില്ല.
എങ്കിലും, എട്ട് റൺസ് ശരാശരി എന്നത് ടി20 ക്രിക്കറ്റിൽ മോശം പ്രകടനമല്ല. ബുംറ ഉയർത്തിയിട്ടുള്ള ഉയർന്ന നിലവാരം കാരണമാണ് ഈ പ്രകടനം മോശമായി തോന്നുന്നത്. അദ്ദേഹം വൈകാതെ തന്നെ ഫോമിലേക്ക് തിരിച്ചെത്തുമെന്നും വിക്കറ്റുകൾ വീഴ്ത്തി തുടങ്ങുമെന്നും ആരാധകർ പ്രതീക്ഷിക്കുന്നു. അതേസമയം, മറ്റ് ബൗളർമാർ കൂടി ഫോമിലെത്തിയാൽ മാത്രമേ ബുംറയ്ക്ക് കൂടുതൽ ആത്മവിശ്വാസത്തോടെ പന്തെറിയാൻ സാധിക്കൂ.
