ലാഹോർ : പാകിസ്ഥാൻ സൂപ്പർ ലീഗിൽ വ്യാഴാഴ്ച നടന്ന ഇസ്ലാമാബാദ് യുണൈറ്റഡ് – ലാഹോർ ഖലന്ദേഴ്സ് പോരാട്ടത്തിൽ ഇസ്ലാമാബാദ് ക്യാപ്റ്റൻ ഷദാബ് ഖാൻ എടുത്ത അവിശ്വസനീയമായ ക്യാച്ച് സോഷ്യൽ മീഡിയയിൽ തരംഗമാകുന്നു. വായുവിൽ ഉയർന്നുചാടി ഷദാബ് എടുത്ത ഈ മനോഹരമായ ക്യാച്ച് കണ്ട് ആരാധകർ അദ്ദേഹത്തെ “സൂപ്പർമാൻ” എന്നാണ് വിശേഷിപ്പിക്കുന്നത്.
ഇമാദ് വസീം എറിഞ്ഞ പന്തിൽ ലാഹോർ താരം അബ്ദുള്ള ഷഫീഖിനെ പുറത്താക്കാനാണ് ഷദാബ് ഈ സാഹസിക ക്യാച്ച് എടുത്തത്. മിഡ് ഓഫിൽ ഫീൽഡ് ചെയ്യുകയായിരുന്ന ഷദാബ്, തന്റെ തലയ്ക്ക് മുകളിലൂടെ പോകുകയായിരുന്ന പന്തിനെ വലതുവശത്തേക്ക് ഏകദേശം 5-6 അടി ഉയരത്തിൽ ചാടിയാണ് കൈപ്പിടിയിലൊതുക്കിയത്. പന്ത് നിലത്തു വീഴാതെ അദ്ദേഹം കൃത്യമായി പിടിച്ചെടുത്തു.
ഈ ടൂർണമെന്റിലെ തന്നെ ഏറ്റവും മികച്ച ക്യാച്ചാണിതെന്നാണ് ക്രിക്കറ്റ് പ്രേമികൾ പറയുന്നത്. “സൂപ്പർമാൻ പിഎസ്എല്ലിൽ എത്തിയിരിക്കുന്നു”, “ലോകത്തിലെ മികച്ച ഫീൽഡർമാരിൽ ഒരാളാണ് ഷദാബ്” എന്നിങ്ങനെ നീളുന്നു ആരാധകരുടെ കമന്റുകൾ.
മത്സരം തികച്ചും ഏകപക്ഷീയമായിരുന്നു. ആദ്യം ബാറ്റ് ചെയ്ത ലാഹോർ ഖലന്ദേഴ്സിനെ വെറും 100 റൺസിന് ഇസ്ലാമാബാദ് ബൗളർമാർ പുറത്താക്കി. തുടർന്ന് മറുപടി ബാറ്റിംഗിന് ഇറങ്ങിയ ഇസ്ലാമാബാദ് പത്താം ഓവറിൽ തന്നെ ലക്ഷ്യം മറികടന്ന് 9 വിക്കറ്റിന് വിജയിച്ചു. ഓൾറൗണ്ട് പ്രകടനം കാഴ്ചവെച്ച ക്രിസ് ഗ്രീൻ ആണ് മാൻ ഓഫ് ദി മാച്ച് പുരസ്കാരം നേടിയത്.
