വർഷത്തിൽ നാലു തവണ മാത്രം ആർത്തവം ഉണ്ടാകുന്ന അവസ്ഥയെന്ന് കേൾക്കുമ്പോൾ നടക്കാത്ത സ്വപ്നമായി തോന്നാമെങ്കിലും, ചൈനീസ് ബയോളജിസ്റ്റ് ഹോങ്മയ് വാങിന്റെയും സംഘത്തിന്റെയും ഗവേഷണങ്ങൾ വിജയിച്ചാൽ ഇത് യാഥാർത്ഥ്യമായേക്കാം. രാജ്യത്തെ ജനസംഖ്യാപരമായ ഇടിവ് നേരിടാൻ മൂലകോശങ്ങളിലും മനുഷ്യ ഭ്രൂണങ്ങളിലും പരീക്ഷണങ്ങൾ നടത്തി, സ്ത്രീകളുടെ പ്രത്യുത്പാദന കാലയളവ് നീട്ടിയെടുക്കാനുള്ള ശ്രമത്തിലാണ് ഈ ഗവേഷകർ. മൂന്നു മാസത്തിലൊരിക്കൽ മാത്രം ആർത്തവം വരുന്ന രീതി നടപ്പിലാക്കാൻ സാധിച്ചാൽ, അണ്ഡങ്ങൾ കൂടുതൽ കാലം കേടുപാടുകൾ കൂടാതെ സംരക്ഷിക്കാനും ഗർഭധാരണത്തിന് ഉപയോഗിക്കാനും കഴിയും.
പുരുഷന്മാർക്ക് ഒരൊറ്റ സ്ഖലനത്തിൽ ദശലക്ഷക്കണക്കിന് ബീജങ്ങൾ ഉത്പാദിപ്പിക്കാൻ കഴിയുമെങ്കിലും, സ്ത്രീകൾ നിശ്ചിത എണ്ണം അണ്ഡങ്ങളുമായാണ് ജനിക്കുന്നത്. ഇതിൽ ഏകദേശം 400 എണ്ണം മാത്രമാണ് പ്രായപൂർത്തിയാകുന്നത് മുതൽ ആർത്തവവിരാമം വരെ ഉത്പാദിപ്പിക്കപ്പെടുന്നത്. അതുകൊണ്ടുതന്നെ, ആർത്തവവിരാമം ഒരു വർഷമെങ്കിലും വൈകിപ്പിക്കാൻ സാധിക്കുന്നത് വലിയ സാമൂഹിക മാറ്റങ്ങൾക്ക് വഴിതെളിക്കുമെന്ന് ഗവേഷകർ ചൂണ്ടിക്കാണിക്കുന്നു.
എന്നാൽ, ഇതിൽ പ്രധാനപ്പെട്ട ചില വെല്ലുവിളികളും മറികടക്കാനുണ്ട്. അണ്ഡോത്പാദനം തടയുന്നത് വഴി അണ്ഡങ്ങളെ സംരക്ഷിക്കാൻ സാധിക്കുമെങ്കിലും, സ്ത്രീകളുടെ ആരോഗ്യത്തിന് അത്യന്താപേക്ഷിതമായ ഈസ്ട്രജൻ ഹോർമോണിന്റെ ഉത്പാദനം ഇത് തടസ്സപ്പെടുത്താൻ സാധ്യതയുണ്ട്. എന്നിരുന്നാലും, പ്രതിമാസ ആർത്തവ വേദനയും ബുദ്ധിമുട്ടുകളും അനുഭവിക്കുന്ന സ്ത്രീകൾക്ക് വലിയൊരു പ്രതീക്ഷയാണ് ഈ ഗവേഷണം നൽകുന്നത്.
