പാരമ്പര്യമായി പ്രമേഹരോഗമുള്ള കുടുംബത്തിൽ ജനിച്ച 51-കാരിയായ ഒരു സ്ത്രീ, ഉയർന്ന രക്തസമ്മർദ്ദവും രക്തത്തിലെ പഞ്ചസാരയുടെ അളവും താൻ ഇനി എപ്പോഴും സഹിക്കേണ്ടി വരുമെന്നാണ് കരുതിയിരുന്നത്. അവരുടെ എച്ച്.ബി.എ1സി (HbA1c) ലെവൽ 10.4 ശതമാനവും, ഫാസ്റ്റിംഗ് ബ്ലഡ് ഷുഗർ 241 mg/dL വരെയും ഉയർന്നിരുന്നു.
എന്നാൽ പ്രശസ്ത ന്യൂട്രീഷ്യനിസ്റ്റ് ലവ്‌നീത് ബത്രയുടെ നിർദ്ദേശാനുസരണം ഭക്ഷണക്രമത്തിൽ വരുത്തിയ മാറ്റങ്ങളിലൂടെ ഇവരുടെ എച്ച്.ബി.എ1സി ലെവൽ 10.4 ശതമാനത്തിൽ നിന്ന് 5.3 ശതമാനത്തിലേക്ക് താഴ്ത്താൻ സാധിച്ചു. “ജനിതക ഘടകങ്ങൾ നമ്മളെ രോഗത്തിലേക്ക് നയിച്ചേക്കാം, എന്നാൽ നമ്മുടെ ജീവിതശൈലിയാണ് അതിനെ പുറത്തുകൊണ്ടുവരുന്നത്. പോഷകാഹാരം മരുന്നുകൾക്ക് പകരമാവില്ലെങ്കിലും ചികിത്സകൾ വിജയിക്കാനുള്ള അടിത്തറ സൃഷ്ടിക്കുന്നു,” എന്ന് ലവ്‌നീത് തൻ്റെ ഇൻസ്റ്റാഗ്രാം പോസ്റ്റിൽ കുറിച്ചു.
ഏതൊരു ഡയറ്റ് പ്ലാനും നിർദ്ദേശിക്കുന്നതിന് മുമ്പ് ലവ്‌നീത് നടത്തുന്ന ‘എ.ബി.സി.ഡി’ (ABCD) വിലയിരുത്തലിലൂടെയാണ് ഈ മാറ്റം സാധ്യമാക്കിയത്. ശരീരഭാരവും പ്രായവും അളക്കുന്ന ആന്ത്രോപോമെട്രിക് (Anthropometric) വിലയിരുത്തൽ, രക്ത പരിശോധനാ റിപ്പോർട്ടുകൾ നോക്കുന്ന ബയോകെമിക്കൽ (Biochemical) രീതി, രോഗ ലക്ഷണങ്ങൾ മനസ്സിലാക്കുന്ന ക്ലിനിക്കൽ (Clinical) രീതി, ദിനചര്യയിലെ പോഷകക്കുറവുകൾ കണ്ടെത്താനുള്ള ഡയറ്ററി (Dietary) പഠനം എന്നിവയാണ് ഇതിൽ ഉൾപ്പെടുന്നത്.
കർശനമായ പട്ടിണി കിടക്കലോ കലോറി എണ്ണലോ ഇല്ലാതെ ദൈനംദിന ഭക്ഷണക്രമത്തിൽ ചില പ്രായോഗിക മാറ്റങ്ങൾ വരുത്തുകയാണ് ചെയ്തതെന്ന് ലവ്‌നീത് പറയുന്നു. ആവശ്യത്തിന് പ്രോട്ടീൻ ഉൾപ്പെടുത്തുക, നാരുകൾ (Fibre) അടങ്ങിയ ഭക്ഷണം കഴിക്കുക, കഴിക്കുന്ന ഭക്ഷണത്തിൻ്റെ മുൻഗണനാക്രമം മാറ്റുക എന്നിവയ്ക്കാണ് പ്രാധാന്യം നൽകിയത്. ഭക്ഷണശാലയിലെ വിഭവങ്ങൾ കഴിക്കുന്ന ക്രമം മാറ്റി കഴിച്ച് തുടങ്ങിയതോടെ ഇവരുടെ എച്ച്.ബി.എ1സി ലെവൽ 10.4-ൽ നിന്ന് 7.4 ആയും, പിന്നീട് 6.2 ആയും ഒടുവിൽ 5.3 ആയും കുറഞ്ഞു.
തുടർന്ന് ആറ് മാസമായി പ്രമേഹത്തിനുള്ള മരുന്നുകളെല്ലാം നിർത്തിയെന്നും നിർദ്ദേശിച്ച ഭക്ഷണക്രമം മാത്രമാണ് പിന്തുടരുന്നതെന്നും ആ സ്ത്രീ വ്യക്തമാക്കുന്നു. മരുന്നുകളൊന്നുമില്ലാതെ തന്നെ നിലവിൽ തൻ്റെ എച്ച്.ബി.എ1സി ലെവൽ 5.8-5.9 ആയി നിലനിർത്താൻ സാധിക്കുന്നുണ്ടെന്ന് അവർ അറിയിച്ചു. “മൂന്ന് മാസത്തേക്ക് മാത്രം ഡയറ്റ് ചെയ്യുക എന്നതല്ല ലക്ഷ്യം, മറിച്ച് ജീവിതകാലം മുഴുവൻ എങ്ങനെ ഭക്ഷണം കഴിക്കണമെന്ന് പഠിക്കുക എന്നതാണ്,” ലവ്‌നീത് കൂട്ടിച്ചേർക്കുന്നു.
Disclaimer: This content including advice provides generic information only. It is in no way a substitute for a qualified medical opinion. Always consult a specialist or your own doctor for more information. Hashtagonline does not claim responsibility for this information.
