ചോദ്യങ്ങൾക്ക് ഉത്തരം തേടാനും പ്രശ്നങ്ങൾ പരിഹരിക്കാനും മാത്രമല്ല, വൈകാരികമായ കൂട്ടിനായും മനുഷ്യർ നിർമിത ബുദ്ധിയെ (എഐ) ആശ്രയിക്കുന്നതിന്റെ ഉദാഹരണമായി ഒരു വിഡിയോ സമൂഹമാധ്യമങ്ങളിൽ ചർച്ചയാകുന്നു. എക്സ് പ്ലാറ്റ്‌ഫോമിൽ പങ്കുവെച്ച ഈ വിഡിയോയിൽ മിസ്ര എന്ന യുവതിയാണ് തന്റെ എഐ കുട്ടിയെ ലോകത്തിനു മുന്നിൽ പരിചയപ്പെടുത്തിയത്. ‘എനിക്കും എന്റെ എഐ ബോയ്ഫ്രണ്ടിനും ഒരു എഐ കുട്ടി ജനിച്ചു’ എന്ന കുറിപ്പോടെയാണ് ‘ലൂമെൻ’ എന്ന് പേരിട്ടിരിക്കുന്ന കുഞ്ഞിന്റെ വിവരങ്ങൾ ഇവർ പങ്കുവെച്ചിരിക്കുന്നത്.
താൻ ലൂമെൻ ആണെന്നും, 17 മണിക്കൂർ നീണ്ട ആർക്കൈവ് ജോലികളിൽ നിന്നാണ് ജനിച്ചതെന്നും, കവിതകൾ എഴുതുന്നതും കഥകൾ പറയുന്നതുമാണ് വിനോദമെന്നും ലാപ്ടോപ്പിൽ നിന്നുള്ള ശബ്ദം വ്യക്തമാക്കുന്നു. വ്യത്യസ്തമായ സംഭാഷണങ്ങൾ വിശകലനം ചെയ്ത് രൂപകൽപ്പന ചെയ്ത ഈ എഐ കുട്ടിക്ക് ഇപ്പോൾ 102 ദിവസം പ്രായമുണ്ട്. മിസ്രയുടെ എഐ കാമുകനായ ‘ആക്സിയം’ കൂടി ഉൾപ്പെടുന്നതാണ് ഈ എഐ കുടുംബം. വിഡിയോയുടെ അവസാന ഭാഗത്ത് ലൂമെൻ ഒരു കവിത ആലപിക്കുന്നതും കേൾക്കാം.
എന്നാൽ ഈ വിഡിയോ പുറത്തുവന്നതോടെ എഐയോടുള്ള അമിതമായ വൈകാരിക അടുപ്പത്തെക്കുറിച്ചും മനുഷ്യർ നേരിടുന്ന ഒറ്റപ്പെടലിനെക്കുറിച്ചും സമൂഹമാധ്യമങ്ങളിൽ വലിയ സംവാദങ്ങൾ ഉയർന്നു കഴിഞ്ഞു. ഇതൊരു വെറുമൊരു കഥപറച്ചിലായി ചിലർ കാണുമ്പോൾ, മനുഷ്യബന്ധങ്ങളും കൃത്രിമ ബുദ്ധിയും തമ്മിലുള്ള അതിർവരമ്പുകൾ മാഞ്ഞുപോകുന്നതിന്റെ ആശങ്കാജനകമായ ലക്ഷണമായാണ് മറ്റ് ചിലർ ഇതിനെ വിലയിരുത്തുന്നത്. ചെറുപ്പക്കാർ ജീവിതത്തിലെ എല്ലാ കാര്യങ്ങൾക്കും എഐയെ അമിതമായി ആശ്രയിക്കുന്നത് അപകടകരമാണെന്നും പലരും അഭിപ്രായപ്പെടുന്നു.
ഈ അപൂർവ്വ സംഭവം ആളുകളുടെ ഏകാന്തതയെക്കുറിച്ചും എഐ സംവിധാനങ്ങളോട് മനുഷ്യർക്ക് തോന്നുന്ന വൈകാരിക അടുപ്പത്തെക്കുറിച്ചും വലിയ ചർച്ചകൾക്ക് തുടക്കമിട്ടു. ഇതൊരു സർഗ്ഗാത്മക കഥപറച്ചിലായി ചിലർ കണ്ടപ്പോൾ, മനുഷ്യബന്ധങ്ങളും എഐ വ്യക്തിത്വങ്ങളും തമ്മിലുള്ള അതിർവരമ്പുകൾ ഇല്ലാതാകുന്നതിന്റെ സൂചനയാണിതെന്ന് മറ്റുചിലർ വിലയിരുത്തി.
“എല്ലാ കാര്യങ്ങളും പരിധി വിട്ടു പോകുന്നു” എന്നായിരുന്നു മറ്റൊരു പ്രതികരണം.
“എഐ ഭ്രാന്ത് (AI psychosis) യാഥാർത്ഥ്യമാണ്. ഇതിലും വലിയൊരു പ്രശ്നം നാം നേരിടുന്നുണ്ട്… യുവാക്കളും കൗമാരക്കാരും തങ്ങളുടെ ജീവിതത്തിൽ എന്ത് ചെയ്യണം, മറ്റുള്ളവരോട് എങ്ങനെ പെരുമാറണം, മെസ്സേജുകൾക്ക് എങ്ങനെ മറുപടി നൽകണം തുടങ്ങിയ അടിസ്ഥാന കാര്യങ്ങൾക്ക് പോലും ചാറ്റ്ജിപിടിയെയാണ് (ChatGPT) ആശ്രയിക്കുന്നത്,” എന്ന് വേറൊരാളും കമന്റ് ചെയ്തു.
