ഇടുങ്ങിയ വഴിയിലൂടെ നടന്നുപോവുകയായിരുന്ന സ്ത്രീയെ തെരുവു കാള കുത്തി മറിച്ചു. വായുവില് കരണം മറിഞ്ഞ് ബോധരഹിതയായി അവര് നിലത്ത് വീണു. സെപ്റ്റംബർ 25-ന് വൈകുന്നേരം 5 മണിയോടെ ഉത്തർപ്രദേശിലെ ഝാൻസിയിലെ ബാബിന ഗ്രാമത്തിലാണ് ഞെട്ടിക്കുന്ന സംഭവം . ഈ സംഭവത്തിന്റെ മുഴുവൻ ദൃശ്യങ്ങളും വഴിയിലെ സിസിടിവി ക്യാമറയിൽ പതിഞ്ഞിട്ടുണ്ട്, വീഡിയോ ദൃശ്യങ്ങൾ ഇപ്പോൾ സാമൂഹിക മാധ്യമങ്ങളിൽ വൈറലായി പ്രചരിക്കുകയാണ്.
അലഞ്ഞുതിരിയുന്ന ഭീമാകാരമായ കറുത്ത കാള സ്ത്രീയെ അന്തരീക്ഷത്തിലേക്ക് ഉയരത്തിൽ കുത്തി എറിയുകയും, അവർ ശക്തിയായി തറയിൽ വീണു. ആക്രമണത്തിൽ സ്ത്രീക്ക് പരിക്കേൽക്കുകയും ഉടൻതന്നെ ബോധരഹിതയായി നിലത്ത് വീഴുകയും ചെയ്തു.17 സെക്കൻഡ് ദൈർഘ്യമുള്ള വീഡിയോയിൽ, സ്ത്രീ വഴിയിലൂടെ നടന്നുപോകുമ്പോൾ കാളയെ കാണുന്നതും, അവർ അതിനെ അവഗണിച്ച് മുന്നോട്ട് നടക്കുന്നതും കാണാം.
തുടർന്ന് പ്രകോപിതനായ കാള സ്ത്രീയെ പിന്തുടർന്ന് ആക്രമിക്കുകയും അന്തരീക്ഷത്തിലേക്ക് കുത്തി എറിയുകയുമായിരുന്നു. ഉയരത്തിലേക്ക് തെറിച്ച സ്ത്രീ അനക്കമില്ലാതെ തറയിൽ വീഴുന്നതും ദൃശ്യങ്ങളിലുണ്ട്.
രാജസ്ഥാനിലും സമാനമായ സംഭവം
രാജസ്ഥാനിലെ ജോധ്പൂരിൽ, സമാനമായ മറ്റൊരു ഞെട്ടിക്കുന്ന സംഭവത്തിൽ, തെരുവ് കാളയുടെ പെട്ടെന്നുള്ള ആക്രമണത്തിൽ 60 വയസ്സുള്ള ഒരു സ്ത്രീക്ക് ഗുരുതരമായി പരിക്കേറ്റിരുന്നു.
സെപ്റ്റംബർ 22 തിങ്കളാഴ്ച ജോധ്പൂരിലെ മണ്ഡോർ ഏരിയയിലുള്ള ചെയ്ൻപുര ബാവ്ഡിയിലാണ് സംഭവം നടന്നത്. കാള സ്ത്രീയെ ഏകദേശം 4 അടി ദൂരത്തേക്ക് കുത്തി തെറിപ്പിച്ചു. അടുത്തുള്ള ചുമരിൽ ഇടിച്ച് വീണ വയോധികയുടെ തലയ്ക്ക് ഗുരുതരമായി പരിക്കേൽക്കുകയായിരുന്നു. അലഞ്ഞുതിരിയുന്ന മൃഗങ്ങളെക്കുറിച്ചുള്ള ഇത്തരം സംഭവങ്ങൾ അടുത്ത കാലത്തായി ഇന്ത്യയിൽ വർദ്ധിച്ചു വരുന്നതായി കാണപ്പെടുന്നു.
