രാത്രി വൈകി കാപ്പി കുടിക്കുന്നത് ഉറക്കം നഷ്ടപ്പെടുത്തുക മാത്രമല്ല, സ്ത്രീകളിൽ അവിവേകപരമായ തീരുമാനങ്ങൾ എടുക്കാനും അപകടസാധ്യതയുള്ള പെരുമാറ്റങ്ങൾക്കും കാരണമാകുമെന്ന് പുതിയ പഠനങ്ങൾ സൂചിപ്പിക്കുന്നു. ഉറക്കമില്ലായ്മ, അസ്വസ്ഥത, അടുത്ത ദിവസത്തെ തളർച്ച എന്നിവയാണ് സാധാരണയായി കഫീൻ മൂലമുണ്ടാകുന്ന പാർശ്വഫലങ്ങളായി നമ്മൾ കരുതുന്നത്. എന്നാൽ ടെക്സസ് സർവകലാശാലയിലെ ഗവേഷകർ നടത്തിയ പഠനത്തിൽ, രാത്രിയിലെ കഫീൻ ഉപയോഗം തലച്ചോറിന്റെ നിയന്ത്രണത്തെ ബാധിക്കുമെന്നും ഇത് സ്ത്രീകളിൽ പെട്ടെന്നുള്ള എടുത്തുചാട്ടത്തിനും വിവേചനരഹിതമായ പെരുമാറ്റത്തിനും വഴിയൊരുക്കുമെന്നും കണ്ടെത്തി.
ഫ്രൂട്ട് ഫ്ലൈകളിൽ (Drosophila melanogaster) നടത്തിയ പരീക്ഷണത്തിലാണ് കഫീൻ രാത്രികാലങ്ങളിൽ സ്വഭാവനിയന്ത്രണം കുറയ്ക്കുന്നതായി കണ്ടെത്തിയത്. പകൽ സമയത്ത് കാപ്പി കുടിക്കുമ്പോൾ ഉണ്ടാകാത്ത ഈ മാറ്റം രാത്രിയിൽ മാത്രമാണ് പ്രകടമാകുന്നത്. പ്രത്യേകിച്ച് പെൺ ഈച്ചകളിലാണ് ഈ സ്വഭാവമാറ്റം കൂടുതൽ ശക്തമായി കണ്ടത്. ഹോർമോണുകളിലെ വ്യത്യാസവും ഉപാപചയ പ്രവർത്തനങ്ങളിലെ മാറ്റവുമാകാം സ്ത്രീകളെ ഇത് കൂടുതൽ ബാധിക്കാൻ കാരണമെന്ന് ഗവേഷകർ കരുതുന്നു.
നമ്മുടെ ഉറക്കത്തെ സഹായിക്കുന്ന അഡെനോസിൻ (Adenosine) എന്ന രാസവസ്തുവിനെ തടഞ്ഞുകൊണ്ടാണ് കഫീൻ പ്രവർത്തിക്കുന്നത്. ഇത് ഉന്മേഷം നൽകുമെങ്കിലും രാത്രികാലങ്ങളിൽ തലച്ചോറിനെ അമിതമായി ഉത്തേജിപ്പിക്കുന്നത് വഴി ശരിയായ തീരുമാനങ്ങൾ എടുക്കാനുള്ള കഴിവിനെ ബാധിച്ചേക്കാം. സാമ്പത്തികമായ തെറ്റായ തീരുമാനങ്ങൾ മുതൽ വാഹനമോടിക്കുമ്പോഴുള്ള അശ്രദ്ധ വരെ ഇത്തരത്തിലുള്ള അവിവേകമായ പെരുമാറ്റത്തിന്റെ ഭാഗമായി ഉണ്ടായേക്കാം.
ജോലിത്തിരക്കിനിടയിലും പഠനത്തിനിടയിലും ഉന്മേഷത്തിനായി രാത്രിയിൽ കാപ്പിയെ ആശ്രയിക്കുന്നവർ ഈ കണ്ടെത്തലുകൾ ശ്രദ്ധിക്കേണ്ടതുണ്ട്. ഉറക്കത്തെ മാത്രമല്ല, നമ്മുടെ വിവേചനബുദ്ധിയെയും വൈകാരിക നിയന്ത്രണത്തെയും ഇത് ബാധിക്കുന്നു. അതിനാൽ, രാത്രി വൈകി കാപ്പി കുടിക്കുന്നത് ഒഴിവാക്കുന്നത് മികച്ച ഉറക്കത്തോടൊപ്പം ശരിയായ തീരുമാനങ്ങൾ എടുക്കാനും സഹായിക്കുമെന്ന് പഠനം അടിവരയിടുന്നു. കഫീൻ ഉപയോഗം പകൽ സമയത്തേക്ക് മാത്രമായി പരിമിതപ്പെടുത്തുന്നത് മാനസികാരോഗ്യം നിലനിർത്താൻ ഉത്തമമാണ്.
