ലാഹോർ : പാകിസ്ഥാൻ സൂപ്പർ ലീഗ് (PSL) 2026-ൽ പെഷവാർ സൽമിയും ക്വറ്റ ഗ്ലാഡിയേറ്റേഴ്സും തമ്മിലുള്ള മത്സരത്തിനിടെ ആരാധകരെ അമ്പരപ്പിച്ച രസകരമായ ഒരു സംഭവം അരങ്ങേറി. ക്വറ്റ ബാറ്റർമാരായ അബ്രാർ അഹമ്മദും ഉസ്മാൻ താരിഖും പിച്ചിന് നടുവിൽ കുടുങ്ങിപ്പോയെങ്കിലും, ഫീൽഡർമാരുടെ പിഴവ് കാരണം റൺ ഔട്ടിൽ നിന്ന് അത്ഭുതകരമായി രക്ഷപ്പെടുകയായിരുന്നു. മത്സരത്തിൽ പെഷവാർ സൽമി എട്ട് വിക്കറ്റിന് ക്വറ്റ ഗ്ലാഡിയേറ്റേഴ്സിനെ തകർത്തു.
ക്വറ്റയുടെ അബ്രാർ അഹമ്മദിന് ലഭിച്ച ഒരു ‘ഫ്രീ ഹിറ്റ്’ പന്തിലാണ് നാടകീയ രംഗങ്ങൾ തുടങ്ങിയത്. അബ്രാർ അടിച്ച പന്ത് നേരെ പോയിന്റ് ഫീൽഡറുടെ കൈകളിലേക്കാണ് എത്തിയത്. ഫ്രീ ഹിറ്റ് ആയതിനാൽ ക്യാച്ച് ഔട്ട് ഭയമില്ലാതിരുന്ന ബാറ്റർമാർ റണ്ണിനായി ഓടി. എന്നാൽ പന്ത് ഫീൽഡറുടെ കയ്യിലാണെന്ന് കണ്ട് പിച്ചിന് നടുവിൽ ഇരുവരും പകച്ചുനിന്നു. ഈ സമയത്ത് രണ്ട് ബാറ്റർമാരും ക്രീസിന് പുറത്തായിരുന്നു.
പന്തുമായി ഓടിയെത്തിയ ഫീൽഡർക്ക് ഏത് വിക്കറ്റിലേക്കാണ് എറിയേണ്ടതെന്ന കാര്യത്തിൽ ആശയക്കുഴപ്പമുണ്ടായി. പന്ത് നേരിട്ട് സ്റ്റംപിൽ കൊള്ളിക്കാനോ വിക്കറ്റ് കീപ്പർക്ക് നൽകാനോ ഉള്ള അവസരം ഉണ്ടായിട്ടും ഫീൽഡർ വൈകിയാണ് പന്ത് എറിഞ്ഞത്. നോൺ സ്ട്രൈക്കർ എൻഡിലേക്ക് എറിഞ്ഞ പന്ത് സ്റ്റംപിൽ കൊള്ളാതെ പോയതോടെ ബാറ്റർമാർ ഭാഗ്യത്തിന് റൺ പൂർത്തിയാക്കി.
ഈ ‘കോമഡി’ റൺ ഔട്ട് ശ്രമത്തിന്റെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്. ബാറ്റർമാരുടെ ആശയക്കുഴപ്പത്തെക്കാൾ പന്ത് കയ്യിലിരുന്നിട്ടും ഔട്ടാക്കാൻ കഴിയാത്ത ഫീൽഡറുടെ പ്രകടനത്തെയാണ് ആരാധകർ പരിഹസിക്കുന്നത്. “പി.എസ്.എൽ 2026-ലെ യഥാർത്ഥ കോമഡി ഓഫ് എറേഴ്സ്” എന്നാണ് സോഷ്യൽ മീഡിയ ഈ സംഭവത്തെ വിശേഷിപ്പിക്കുന്നത്.
