വാരണാസിയിലെ പവിത്രമായ ഗംഗാ നദിയിൽ ബോട്ടിലിരുന്ന് മദ്യപിക്കുകയും നൃത്തം ചെയ്യുകയും ചെയ്ത വീഡിയോ സമൂഹമാധ്യമങ്ങളിൽ പ്രചരിച്ചതോടെ വലിയ പ്രതിഷേധമാണ് ഉയരുന്നത്. നദിയുടെ മതപരമായ പ്രാധാന്യം കണക്കിലെടുത്ത്, ഉറക്കെ സംഗീതം വച്ച് ബോട്ടിൽ പാർട്ടി നടത്തിയത് അങ്ങേയറ്റം അനുചിതമാണെന്ന് ഭക്തർ അഭിപ്രായപ്പെട്ടു.
സംഭവത്തിൽ പോലീസ് അന്വേഷണം ആരംഭിക്കുകയും ബോട്ട് അലങ്കാരപ്പണിക്കാരനായ അർജുൻ രാജ്ഭറിനെ അറസ്റ്റ് ചെയ്യുകയും ചെയ്തു. ബോട്ടിലിരുന്ന് മദ്യപിച്ച മറ്റുള്ളവർക്കായി പോലീസ് തിരച്ചിൽ തുടരുകയാണ്.
ഈ സംഭവം രാഷ്ട്രീയ വിവാദങ്ങൾക്കും വഴിവെച്ചിട്ടുണ്ട്. ബിജെപി സർക്കാരിന്റെ ഭരണത്തിന് കീഴിൽ ആളുകൾ സമ്മർദ്ദത്തിലാണെന്നും അതുകൊണ്ടാണ് എല്ലായിടത്തും മദ്യപാനം വർദ്ധിക്കുന്നതെന്നും സമാജ്വാദി പാർട്ടി നേതാവ് അഖിലേഷ് യാദവ് പരിഹസിച്ചു.
ഇതിനുമുമ്പ് റംസാൻ കാലത്തും സമാനമായ ഒരു വിവാദം വാരണാസിയിൽ ഉണ്ടായിരുന്നു. അന്ന് ബോട്ടിലിരുന്ന് ബിരിയാണി കഴിച്ച് ഇഫ്താർ സംഗമം നടത്തിയതിന് 14 പേരെ പോലീസ് അറസ്റ്റ് ചെയ്തിരുന്നു. ഗംഗാ നദിയെ പുണ്യമായി കരുതുന്ന കോടിക്കണക്കിന് ആളുകളുടെ വിശ്വാസത്തെ വ്രണപ്പെടുത്തുന്ന ഇത്തരം പ്രവൃത്തികൾക്കെതിരെ കർശന നടപടി വേണമെന്നാണ് നാട്ടുകാരുടെ ആവശ്യം. മതവികാരം വ്രണപ്പെടുത്തിയതിനും ജലസ്രോതസ്സുകൾ മലിനമാക്കിയതിനും ഉൾപ്പെടെ വിവിധ വകുപ്പുകൾ പ്രകാരമാണ് പോലീസ് കേസെടുത്തിരിക്കുന്നത്.
