ജയ്പുർ സവായ് മാൻസിങ് സ്റ്റേഡിയത്തിൽ നടന്ന ആവേശകരമായ ഐപിഎൽ പോരാട്ടത്തിൽ വൈഭവ് സൂര്യവംശിയുടെ തകർപ്പൻ സെഞ്ചറി പാഴായി. കൂറ്റൻ സ്കോർ ഉയർത്തിയിട്ടും സൺറൈസേഴ്സ് ഹൈദരാബാദിനോട് അഞ്ച് വിക്കറ്റിനാണ് രാജസ്ഥാൻ റോയൽസ് തോൽവി വഴങ്ങിയത്. രാജസ്ഥാൻ മുന്നോട്ടുവെച്ച 229 റൺസ് എന്ന വലിയ ലക്ഷ്യം ഒൻപത് പന്തുകൾ ബാക്കിനിൽക്കെ അഞ്ച് വിക്കറ്റ് നഷ്ടത്തിൽ ഹൈദരാബാദ് മറികടന്നു. ഇതോടെ ഈ സീസണിലെ തങ്ങളുടെ മൂന്നാം തോൽവിയാണ് രാജസ്ഥാൻ സ്വന്തം മണ്ണിൽ ഏറ്റുവാങ്ങിയത്.
മറുപടി ബാറ്റിങ്ങിൽ ഇഷാൻ കിഷന്റെയും അഭിഷേക് ശർമയുടെയും വെടിക്കെട്ട് പ്രകടനമാണ് ഹൈദരാബാദിന് കരുത്തായത്. ഇഷാൻ കിഷൻ വെറും 31 പന്തിൽ 74 റൺസെടുത്തപ്പോൾ, അഭിഷേക് ശർമ 29 പന്തിൽ 57 റൺസ് നേടി മികച്ച പിന്തുണ നൽകി. അവസാന ഘട്ടത്തിൽ നിതീഷ് കുമാർ റെഡ്ഡിയും (36), ഹെൻറിച് ക്ലാസനും (29) ചേർന്ന് ടീമിനെ വിജയത്തോടടുപ്പിച്ചു. ഈ ജയത്തോടെ പത്തു പോയിന്റുള്ള ഹൈദരാബാദ് പട്ടികയിൽ മൂന്നാം സ്ഥാനത്തേക്ക് കയറി. ഇതേ പോയിന്റുള്ള രാജസ്ഥാൻ നാലാം സ്ഥാനത്താണ്.
തുടക്കത്തിൽ തന്നെ ട്രാവിസ് ഹെഡിനെ ജോഫ്ര ആർച്ചർ പുറത്താക്കിയെങ്കിലും, ഇഷാനും അഭിഷേകും ചേർന്ന് ഹൈദരാബാദിനെ വേഗത്തിൽ 100 കടത്തി. അഭിഷേകിനെ ഡോനോവൻ ഫെരേരയും ഇഷാൻ കിഷനെ ആർച്ചറും പുറത്താക്കിയെങ്കിലും ഹൈദരാബാദ് പതറിയില്ല. അവസാന ഓവറുകളിൽ ക്ലാസനെയും നിതീഷ് റെഡ്ഡിയെയും ബ്രിജേഷ് ശർമ മടക്കിയതോടെ രാജസ്ഥാന് പ്രതീക്ഷ തോന്നി. എന്നാൽ നാന്ദ്രെ ബർഗർ എറിഞ്ഞ 19–ാം ഓവറിൽ സലിൽ അറോറ സിക്സറിലൂടെ ഹൈദരാബാദിന്റെ വിജയം പൂർത്തിയാക്കുകയായിരുന്നു.
നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ രാജസ്ഥാൻ 20 ഓവറിൽ ആറു വിക്കറ്റ് നഷ്ടത്തിലാണ് 228 റൺസ് നേടിയത്. 12 സിക്സുകളും അഞ്ച് ഫോറുകളും പറത്തി വെറും 37 പന്തിൽ നിന്നാണ് വൈഭവ് സൂര്യവംശി 103 റൺസ് അടിച്ചുകൂട്ടിയത്. വൈഭവിനൊപ്പം 51 റൺസ് നേടിയ ധ്രുവ് ജുറേലും മികച്ച ബാറ്റിങ് കാഴ്ചവെച്ചു. അവസാന ഓവറുകളിൽ ഡോനോവൻ ഫെരേര 16 പന്തിൽ 33 റൺസ് നേടി സ്കോർ ഉയർത്തി. എന്നാൽ മികച്ച സ്കോർ നേടിയിട്ടും ബൗളിങ്ങിലെ പോരായ്മകൾ രാജസ്ഥാന് തിരിച്ചടിയായി.
മത്സരത്തിന്റെ തുടക്കം മുതൽ വൈഭവ് സൂര്യവംശി ഹൈദരാബാദ് ബൗളർമാരെ കടന്നാക്രമിക്കുകയായിരുന്നു. പ്രഫുൽ ഹിംഗെയുടെ ആദ്യ ഓവറിൽ തന്നെ നാല് സിക്സുകൾ നേടിയ വൈഭവ്, 15 പന്തുകളിൽ തന്റെ അർധ സെഞ്ചറി തികച്ചു. പവർപ്ലേ അവസാനിക്കുമ്പോൾ ഒരു വിക്കറ്റ് നഷ്ടത്തിൽ 76 റൺസെന്ന ശക്തമായ നിലയിലായിരുന്നു രാജസ്ഥാൻ. പിന്നീട് ധ്രുവ് ജുറേലിനൊപ്പം ചേർന്ന് വൈഭവ് സ്കോർ ബോർഡ് വേഗത്തിൽ ചലിപ്പിച്ചു. ഒൻപത് ഓവറായപ്പോഴേക്കും രാജസ്ഥാൻ സ്കോർ 100 കടന്നിരുന്നു.
152 റൺസിൽ നിൽക്കെ ജുറേൽ പുറത്തായെങ്കിലും സാക്കിബ് ഹുസെയ്ന്റെ ഓവറിൽ സിക്സർ പായിച്ച് വൈഭവ് സെഞ്ചറിയിലെത്തി. തൊട്ടടുത്ത പന്തിൽ തന്നെ താരം പുറത്തായെങ്കിലും രാജസ്ഥാൻ സുരക്ഷിതമായ നിലയിലായിരുന്നു. ക്യാപ്റ്റൻ റിയാൻ പരാഗ് നിരാശപ്പെടുത്തിയെങ്കിലും 18–ാം ഓവറിൽ ടീം സ്കോർ 200 പിന്നിട്ടു. ഹൈദരാബാദിനായി ഇഷാൻ മലിംഗ രണ്ട് വിക്കറ്റുകൾ വീഴ്ത്തി. വൈഭവിന്റെ ഇന്നിങ്സ് ആരാധകരെ ആവേശത്തിലാക്കിയെങ്കിലും മത്സരഫലം രാജസ്ഥാന് അനുകൂലമാക്കാൻ കഴിഞ്ഞില്ല.
