ഒരു കപ്പ് ചൂടുകാപ്പി എന്നത് പലർക്കും പലതാണ്. രാവിലെ ഉന്മേഷം തരാനും, പലഹാരങ്ങൾക്കൊപ്പം കുടിക്കാനും, ജോലിത്തിരക്കുകൾക്കിടയിൽ ഒരു ചെറിയ ഇടവേള നൽകാനുമൊക്കെ ദിവസേനയുള്ള കാപ്പികുടി ഒരു ശീലവും ആശ്വാസവുമാണ്.
എന്നാൽ, നിങ്ങളുടെ ഈ കാപ്പി കൂടുതൽ ഗുണപ്രദമാക്കാൻ അതിൽ ചേർക്കുന്ന സാധനങ്ങൾ ശ്രദ്ധിച്ച് തിരഞ്ഞെടുക്കേണ്ടതുണ്ട്. കാപ്പിക്ക് സ്വന്തമായി തന്നെ ചില ആരോഗ്യഗുണങ്ങളുണ്ടെങ്കിലും, പോഷക സമ്പുഷ്ടമായ ചില ചേരുവകൾ കൂടി ഉൾപ്പെടുത്തുന്നത് മസ്തിഷ്കത്തിന്റെ പ്രവർത്തനം, ദഹനം, രക്തത്തിലെ പഞ്ചസാരയുടെ അളവ് എന്നിവ മെച്ചപ്പെടുത്താൻ സഹായിക്കും. ഇൻസ്റ്റാഗ്രാമിൽ പോഷകാഹാര വിദഗ്ദ്ധയായ ദീപ്ശിഖ ജെയിൻ പങ്കുവെച്ച വിവരങ്ങൾ അനുസരിച്ച്, കാപ്പി കൂടുതൽ ആരോഗ്യകരമാക്കാൻ താഴെ പറയുന്നവ ചേർക്കാവുന്നതാണ്.
കാപ്പിയിൽ അല്പം കൊക്കോ ചേർക്കുന്നത് ഒരു നല്ല വഴിയാണ്. ആന്റിഓക്സിഡന്റുകളാൽ സമ്പന്നമായ കൊക്കോ, ഹൃദ്രോഗ സാധ്യത കുറയ്ക്കാനും തലച്ചോറിന്റെ പ്രവർത്തനങ്ങൾ മെച്ചപ്പെടുത്താനും സഹായിക്കും. കാപ്പിയിൽ അല്പം കൊക്കോ പൗഡറോ റൊ കൊക്കോയോ ചേർക്കുന്നത് വഴി ശരീരത്തിന് ആവശ്യമായ പോളിഫെനോളുകളും ഫ്ലവനോയ്ഡുകളും ലഭിക്കും.
മറ്റൊരു മികച്ച ചേരുവയാണ് എ2 നെയ്യ് (A2 Ghee). ഒരു ടീസ്പൂൺ എ2 നെയ്യ് കാപ്പിയിൽ ചേർക്കുന്നത് ദഹന ആരോഗ്യം മെച്ചപ്പെടുത്താൻ സഹായിച്ചേക്കാം. ഇതിലടങ്ങിയിരിക്കുന്ന ബ്യൂട്ടിറിക് ആസിഡ് കുടലിന്റെ ആരോഗ്യത്തെ സംരക്ഷിക്കാനും, ദഹനനാളത്തിലെ വീക്കം കുറയ്ക്കാനും, മൊത്തത്തിലുള്ള ദഹനപ്രക്രിയ എളുപ്പമാക്കാനും സഹായിക്കുമെന്ന് കരുതപ്പെടുന്നു.
കാപ്പിയിൽ കറുവപ്പട്ട ചേർക്കുന്നതും രുചികരവും ആരോഗ്യപ്രദവുമായ ഒരു തിരഞ്ഞെടുപ്പാണ്. ശരീരത്തിലെ ഇൻസുലിൻ സെൻസിറ്റിവിറ്റി വർദ്ധിപ്പിക്കാൻ ഈ സുഗന്ധവ്യഞ്ജനത്തിന് കഴിയും, ഇത് ഗ്ലൂക്കോസ് കൂടുതൽ ഫലപ്രദമായി ഉപയോഗിക്കാൻ ശരീരത്തെ സഹായിക്കുന്നു. കട്ടൻകാപ്പിയിൽ ഒരു നുള്ള് കറുവപ്പട്ട പൊടി ചേർക്കുന്നത് ഗ്ലൂക്കോസ് മെറ്റബോളിസം മെച്ചപ്പെടുത്തും, ഇത് പ്രമേഹമുള്ളവർക്ക് ഏറെ ഗുണം ചെയ്യും.
ഇത്തരം ലളിതമായ ചേരുവകൾ കാപ്പിയിൽ ഉൾപ്പെടുത്തുന്നത് വഴി അതിന്റെ രുചി കൂട്ടുക മാത്രമല്ല, കൂടുതൽ പോഷകഗുണമുള്ള ഒന്നാക്കി മാറ്റാനും സാധിക്കും.
