സംസ്ഥാനത്ത് യുഡിഎഫ് ഭരണമുണ്ടാകുകയാണെങ്കിൽ മുസ്ലിം ലീഗിൽ നിന്ന് മന്ത്രിമാരാകാൻ സാധ്യതയുള്ളവരെക്കുറിച്ചുള്ള ചർച്ചകൾ രാഷ്ട്രീയ കേന്ദ്രങ്ങളിൽ സജീവമാണ്. കഴിഞ്ഞ തവണത്തെപ്പോലെ ഇത്തവണയും അഞ്ച് മന്ത്രിസ്ഥാനങ്ങളാണ് ലീഗ് ലക്ഷ്യമിടുന്നത്. ഇതിൽ മുൻനിരയിലുള്ളത് പി.കെ. കുഞ്ഞാലിക്കുട്ടിയാണ്. അദ്ദേഹം ഉപമുഖ്യമന്ത്രിയായേക്കുമെന്നും സുപ്രധാന വകുപ്പുകൾ ഏറ്റെടുത്തേക്കുമെന്നും സൂചനകളുണ്ട്. എം.കെ. മുനീറിന്റെ അഭാവം നികത്താൻ കെ.എം. ഷാജിക്ക് സാധ്യതയേറുന്നു. തുടർച്ചയായ വിജയങ്ങളുടെ പശ്ചാത്തലത്തിൽ മലപ്പുറത്ത് നിന്ന് പി.കെ. ബഷീറിന്റെ പേരും സജീവ പരിഗണനയിലുണ്ട്.
മികച്ച പാർലമെന്റേറിയൻ എന്ന നിലയിൽ പാലക്കാട് ജില്ലയിലെ മണ്ണാർക്കാട് നിന്നുള്ള എൻ. ഷംസുദ്ദീനും മന്ത്രിസഭയിൽ ഇടംപിടിച്ചേക്കും. കോഴിക്കോട് ജില്ലയിൽ നിന്ന് പാറക്കൽ അബ്ദുല്ല, എം.എ. റസാഖ് മാസ്റ്റർ എന്നിവരിൽ ഒരാൾക്ക് അവസരം ലഭിക്കാനാണ് സാധ്യത. കുറ്റ്യാടിയിലോ കുന്ദമംഗലത്തോ ഇവർക്ക് ജയസാധ്യതയുണ്ടെന്നാണ് പാർട്ടി വിലയിരുത്തൽ.
വടക്കൻ കേരളത്തിന് കൂടുതൽ പ്രാധാന്യം നൽകുകയാണെങ്കിൽ മഞ്ചേശ്വരത്ത് നിന്ന് എ.കെ.എം. അഷ്റഫിനെയും പരിഗണിച്ചേക്കാം. എന്നാൽ തിരഞ്ഞെടുപ്പ് ഫലത്തിന് ശേഷം സീറ്റുകളുടെ എണ്ണം നോക്കിയാകും അന്തിമ തീരുമാനം. അതേസമയം, മുഖ്യമന്ത്രി സ്ഥാനത്തേക്ക് വി.ഡി. സതീശനെ പിന്തുണയ്ക്കുന്നു എന്ന നിലപാടിൽ ലീഗ് മാറ്റം വരുത്തിയിട്ടുണ്ട്. മുഖ്യമന്ത്രി ആരാകണമെന്ന് തങ്ങൾ പറഞ്ഞിട്ടില്ലെന്ന് ജനറൽ സെക്രട്ടറി പി.എം.എ. സലാം വ്യക്തമാക്കി.
