“ഞാന് മരിച്ച് പോവണമെങ്കില് എന്റെ ആയുസ് തീര്ന്നിരിക്കണം. അതിനിപ്പോള് ഞാന് വീട്ടിനകത്ത് ഇരുന്നാലും മതി. ഒരു ഫാന് പൊട്ടി വീണാലും പോരേ. സമയം അവസാനിക്കണമെങ്കില് അതായാലും പോരേ. അപ്പോള് ഒരു പ്രവര്ത്തി ചെയ്തോണ്ടിരിക്കുമ്പോള് ആയാലെന്താ പ്രശ്നം. നോ എന്നൊരു കാര്യം ഇന്നുവരെ പറഞ്ഞിട്ടില്ല. ഒരാള് വന്ന് ഒരു കാര്യം ആവശ്യപ്പെട്ടാല് നോ പറയാറില്ല. എന്നെക്കൊണ്ട് പറ്റുന്നതിന്റെ മാക്സിമം ഞാന് ചെയ്തുകൊടുക്കാം. നോ പറയില്ല. അതുകൊണ്ടാണ് ഇത് ചെയ്തൂടേയെന്ന് ചോദിക്കുമ്പോള് ചെയ്യാം എന്ന് മറുപടി കൊടുക്കുന്നത്.’’ സന്തോഷ് നായരുടെ വാക്കുകൾ.
അപ്രതീക്ഷിതമായി വിട്ടുപിരിഞ്ഞ നടൻ സന്തോഷ് നായർ, തന്റെ ജീവിതത്തെയും മരണത്തെയും കുറിച്ച് മുൻപ് പങ്കുവെച്ച ധീരമായ നിലപാടുകൾ ഇപ്പോൾ സോഷ്യൽ മീഡിയയിൽ വലിയ ചർച്ചയാവുകയാണ്.
1983-ൽ ‘ഓമനിക്കാൻ ഓർമ വെക്കാൻ’ എന്ന സിനിമയുടെ ചിത്രീകരണത്തിനിടെ സംഭവിച്ച ഗുരുതരമായ കാലിലെ പരിക്കിനെക്കുറിച്ചും, ആ വേദന സഹിച്ചുകൊണ്ട് പതിറ്റാണ്ടുകളോളം അഭിനയരംഗത്ത് തുടർന്നതിനെക്കുറിച്ചും അദ്ദേഹം മൂവി വേൾഡിന് നൽകിയ അഭിമുഖത്തിൽ വെളിപ്പെടുത്തിയിരുന്നു. തന്റെ കരിയറിലെ പുതിയ പ്രതീക്ഷകളെക്കുറിച്ച് വാചാലനായ സന്തോഷ് നായർ വിടവാങ്ങുമ്പോൾ, ആ വാക്കുകൾ ഓർമ്മയായി മാറുകയാണ്. അന്ന് ഫൈറ്റ് സീനിനിടെ വീണപ്പോൾ സംഭവിച്ച പരിക്കുമായിട്ടാണ് താൻ ഇത്രയും കാലം ഓടാനും ചാടാനുമുള്ള രംഗങ്ങൾ ചെയ്തതെന്ന് അദ്ദേഹം പറഞ്ഞിരുന്നു.
സിനിമയിൽ എന്ത് വെല്ലുവിളികൾ ഏറ്റെടുക്കാനും താൻ ഒരിക്കലും മടി കാണിച്ചിട്ടില്ലെന്നും അദ്ദേഹം അഭിമുഖത്തിൽ വ്യക്തമാക്കിയിരുന്നു. തന്റെ തലമുറയിലുള്ള അഭിനേതാക്കൾക്കെല്ലാം ഈയൊരു തൊഴിൽപരമായ മാന്യത ഉണ്ടായിരുന്നുവെന്നും, വേദനകൾ മുറിക്കുള്ളിൽ ഒതുക്കി വെച്ച് ക്യാമറയ്ക്ക് മുന്നിൽ ആവേശത്തോടെ പ്രവർത്തിക്കുകയായിരുന്നു പതിവെന്നും അദ്ദേഹം ഓർത്തെടുത്തു.
നിർമ്മാതാവും സംവിധായകനും ആവശ്യപ്പെടുന്ന കാര്യങ്ങൾ കൃത്യമായി ചെയ്തു കൊടുക്കുക എന്നത് തന്റെ ഉത്തരവാദിത്തമാണെന്ന ഉറച്ച ബോധ്യം അദ്ദേഹത്തിനുണ്ടായിരുന്നു. വെള്ളത്തിൽ ചാടാൻ പറഞ്ഞാൽ നീന്തൽ അറിയില്ലെങ്കിൽ പോലും മടിക്കാതെ അത് ചെയ്യുമായിരുന്നു. ‘സൈന്യം’ എന്ന സിനിമയുടെ ചിത്രീകരണത്തിനിടെ ജോഷി സാർ ആവശ്യപ്പെട്ടപ്പോൾ അപകടസാധ്യതയുള്ള രംഗം താൻ ഏറ്റെടുത്തതും, സഹപ്രവർത്തകർ അത്ഭുതത്തോടെ നോക്കിനിന്നതും സന്തോഷ് നായർ ആവേശത്തോടെ പങ്കുവെച്ചിരുന്നു.
പരിക്കുകളെക്കുറിച്ചോ വേദനയെക്കുറിച്ചോ തനിക്ക് ഒരിക്കലും പരാതിയില്ലെന്നും ആ അനുഭവങ്ങളാണ് തന്നെ ഇത്രത്തോളം വളർത്തിയതെന്നും അദ്ദേഹം വിശ്വസിച്ചിരുന്നു. ഷൂട്ടിങ് എന്നത് പുറത്തുനിന്നുള്ളവർക്ക് എളുപ്പമായി തോന്നാമെങ്കിലും അതിനുപിന്നിലെ കഠിനാധ്വാനം താൻ എന്നും ആസ്വദിച്ചിരുന്നു. ഇന്നത്തെപ്പോലെ സാങ്കേതിക വിദ്യകൾ ഇല്ലാതിരുന്ന കാലത്ത് റിസ്ക് എടുത്തുതന്നെയായിരുന്നു പല രംഗങ്ങളും ചെയ്തിരുന്നത്.
നീന്തൽ അറിയാത്ത താൻ എങ്ങനെയാണ് കടലിൽ ചാടുന്നത് എന്ന് വിജയരാഘവനെപ്പോലുള്ള സുഹൃത്തുക്കൾ അത്ഭുതപ്പെടുമ്പോൾ, ആരെങ്കിലും രക്ഷിക്കുമല്ലോ എന്ന ലളിതമായ മറുപടിയാണ് അദ്ദേഹം നൽകിയിരുന്നത്. മരണത്തെക്കുറിച്ചും അദ്ദേഹത്തിന് വ്യക്തമായ കാഴ്ചപ്പാടുണ്ടായിരുന്നു; ആയുസ്സ് അവസാനിച്ചാൽ അത് വീട്ടിനുള്ളിൽ ഇരുന്നാലും സംഭവിക്കുമെന്നും, അതുകൊണ്ട് ഇഷ്ടപ്പെട്ട ജോലി ചെയ്തുകൊണ്ടിരിക്കുമ്പോൾ മരണം സംഭവിക്കുന്നതിൽ ഭയമില്ലെന്നുമാണ് അദ്ദേഹം പറഞ്ഞിരുന്നത്. ആ വാക്കുകൾ ഇന്ന് ആരാധകരുടെ ഉള്ളുലയ്ക്കുകയാണ്.
