എന്തുകൊണ്ടാണ് ഡോക്ടർമാരെ ചിലപ്പോഴൊക്കെ ദൈവമെന്ന് വിളിക്കുന്നത് എന്ന് ചിന്തിച്ചിട്ടുണ്ടോ? ഇതാ അതിനുത്തരമായി ഒരു സംഭവം.
സഹാറൻപൂരിലെ നനൗതയിലുള്ള കമ്മ്യൂണിറ്റി ഹെൽത്ത് സെന്ററിലെ ഒരു ഡോക്ടർ, ജനിച്ച ഉടൻ ശ്വാസമെടുക്കാൻ ബുദ്ധിമുട്ടിയ കുഞ്ഞിനെ വായോട് വായ ചേർത്ത് ശ്വാസം നൽകിയും നെഞ്ചിൽ അമർത്തിയും (Chest Compressions) ജീവിതത്തിലേക്ക് തിരികെ കൊണ്ടുവന്നു.
ഏറെ നേരത്തെ പരിശ്രമത്തിനൊടുവിൽ കുഞ്ഞ് കരഞ്ഞതോടെയാണ് ശ്വാസോച്ഛ്വാസം സാധാരണ നിലയിലായത്. മറ്റൊരു ആശുപത്രിയിലേക്ക് മാറ്റുന്നത് കുഞ്ഞിന്റെ ജീവന് അപകടമാകും എന്നതിനാലാണ് താൻ ഉടൻ തന്നെ ഈ രീതിയിൽ ചികിത്സ നൽകിയതെന്ന് ഡോക്ടർ റുമ പറഞ്ഞു.
ദാദൻപൂർ സ്വദേശിയായ ആയിഷയെ പ്രസവവേദനയെ തുടർന്ന് തിങ്കളാഴ്ചയാണ് ആശുപത്രിയിൽ പ്രവേശിപ്പിച്ചത്. പ്രസവം വിജയകരമായി നടന്നുവെങ്കിലും, കുഞ്ഞ് കരയുകയോ ശ്വസിക്കുകയോ ചെയ്യാത്തത് ഡോക്ടർമാരെയും ബന്ധുക്കളെയും ആശങ്കയിലാഴ്ത്തി. ആദ്യം ഓക്സിജൻ സപ്പോർട്ട് ഉൾപ്പെടെയുള്ള സാധാരണ മാർഗ്ഗങ്ങൾ പരീക്ഷിച്ചെങ്കിലും ഫലമുണ്ടായില്ല. സമയം അതിനിർണ്ണായകമാണെന്ന് മനസ്സിലാക്കിയ ഡോക്ടർ റുമ ഒട്ടും വൈകാതെ കുഞ്ഞിന് വായോട് വായ ചേർത്ത് ശ്വാസം നൽകുകയും ഒപ്പം നെഞ്ചിൽ അമർത്തി ഹൃദയമിടിപ്പ് നിലനിർത്താൻ ശ്രമിക്കുകയും ചെയ്തു.
മണിക്കൂറുകൾ നീണ്ട ഈ പോരാട്ടത്തിനൊടുവിൽ കുഞ്ഞ് കരഞ്ഞപ്പോൾ ആശുപത്രി ജീവനക്കാരും കുടുംബാംഗങ്ങളും വലിയ ആശ്വാസത്തിലായി. ആശുപത്രി ജീവനക്കാർ പകർത്തിയ ഈ ഹൃദയസ്പർശിയായ വീഡിയോ ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. ഡോക്ടറുടെ ആത്മസമർപ്പണത്തെയും കൃത്യസമയത്തെ ഇടപെടലിനെയും എല്ലാവരും പ്രശംസിക്കുകയാണ്. ഗ്രാമീണ മേഖലകളിൽ വിദഗ്ധ ചികിത്സാ സൗകര്യങ്ങൾ ദൂരെയുള്ള സാഹചര്യത്തിൽ, ഇത്തരം ജീവൻരക്ഷാ ഇടപെടലുകൾക്ക് വലിയ പ്രാധാന്യമുണ്ടെന്ന് ആരോഗ്യരംഗത്തെ വിദഗ്ധർ ചൂണ്ടിക്കാട്ടുന്നു.
