എയർകണ്ടീഷൻ ചെയ്ത കോച്ചുകൾക്കുള്ളിൽ ട്രെയിൻ യാത്രകൾ സുരക്ഷിതവും സുഖകരവുമായിരിക്കും എന്നാണ് സാധാരണയായി പ്രതീക്ഷിക്കുന്നത്. എന്നാൽ, ഒരു എസി കമ്പാർട്ടുമെന്റിനുള്ളിലിരുന്ന് ഒരു കൂട്ടം പുരുഷന്മാർ മദ്യപിക്കുന്ന ഒരു വീഡിയോ സോഷ്യൽ മീഡിയയിൽ വൈറലായതോടെ ഇന്ത്യൻ റെയിൽവേയിലെ സുരക്ഷയെയും അച്ചടക്കത്തെയും കുറിച്ചുള്ള ചർച്ചകൾ യാത്രക്കാർക്കിടയിൽ വീണ്ടും സജീവമായി.
കുടുംബങ്ങളും കുട്ടികളും പ്രായമായവരും യാത്ര ചെയ്യുന്ന ഒരു കോച്ചിനുള്ളിൽ എങ്ങനെയാണ് ഇത്തരം പ്രവൃത്തികൾ അനുവദിക്കാൻ കഴിയുക എന്ന് ചോദിച്ച് നിരവധി ആളുകളാണ് ഈ ദൃശ്യങ്ങൾക്ക് എതിരെ രംഗത്തെത്തിയത്. സംഭവം ശ്രദ്ധയിൽപ്പെട്ടതോടെ റെയിൽവേ സേവയും ഇതിനോട് പ്രതികരിച്ചു.
ഓടിക്കൊണ്ടിരിക്കുന്ന ഒരു എസി ട്രെയിൻ കോച്ചിനുള്ളിൽ ഇരുന്ന് ഒരു കൂട്ടം ആളുകൾ മദ്യം കഴിക്കുന്നതാണ് വീഡിയോയിൽ ഉള്ളത്. ഒരു കുപ്പിയിൽ നിന്ന് മറ്റൊന്നിലേക്ക് മദ്യം പകർന്ന് ഇവർ ഡ്രിങ്ക്സ് തയ്യാറാക്കുന്നത് ദൃശ്യങ്ങളിൽ കാണാം. ഈ സമയം തൊട്ടടുത്തുള്ള ബർത്തുകളിൽ മറ്റ് യാത്രക്കാരും ഉണ്ടായിരുന്നു. പിന്റു കുമാർ എന്ന വ്യക്തിയാണ് ഈ വീഡിയോ ഇൻസ്റ്റാഗ്രാമിൽ അപ്ലോഡ് ചെയ്തത്. ട്രെയിനിലെ സൈഡ് ലോവർ ബർത്തിൽ ഇരിക്കുന്ന ഒരാൾ, മറ്റുള്ളവരുടെ ശ്രദ്ധയിൽപ്പെടാതിരിക്കാൻ ജനൽ വിരിക്ക് പിന്നിൽ ഒളിച്ചിരുന്ന് മദ്യം തയ്യാറാക്കുന്നതും സുഹൃത്തുക്കൾ ഇത് നോക്കിനിൽക്കുന്നതും വീഡിയോയിലുണ്ട്. ഇവർക്കായി ലഘുഭക്ഷണങ്ങളും അരികിൽ കരുതിയിരുന്നു.
വീഡിയോ പെട്ടെന്ന് തന്നെ ഓൺലൈനിൽ വ്യാപകമായി പ്രചരിക്കുകയും യാത്രക്കാരുടെ സുരക്ഷയെക്കുറിച്ച് ആളുകൾ ആശങ്ക ഉന്നയിക്കുകയും ചെയ്തു. കുറ്റക്കാർക്കെതിരെ കർശന നടപടി സ്വീകരിക്കണമെന്ന് പലരും അധികൃതരോട് ആവശ്യപ്പെട്ടു. ഭാവിയിൽ ആരും ട്രെയിനിൽ മദ്യപിക്കാൻ ധൈര്യപ്പെടാത്ത രീതിയിലുള്ള പിഴ ചുമത്തണമെന്നും, നിയമങ്ങളും ധാർമ്മികതയും ഇപ്പോൾ പുസ്തകങ്ങളിൽ മാത്രമാണ് ഉള്ളതെന്നും ഉപയോക്താക്കൾ കമന്റ് ചെയ്തു. ഇത്തരം ആളുകളെ ഇനി ട്രെയിൻ ടിക്കറ്റ് എടുക്കുന്നതിൽ നിന്ന് വിലക്കണമെന്നും അവരുടെ തിരിച്ചറിയൽ രേഖകൾ റദ്ദാക്കണമെന്നും ചിലർ ആവശ്യപ്പെട്ടു.
ഇതേതുടർന്ന് പ്രതികരണവുമായി എത്തിയ റെയിൽവേ സേവ, ഈ വിഷയത്തിൽ കൃത്യമായ അന്വേഷണവും ആവശ്യമായ നടപടിയും സ്വീകരിക്കുന്നതിനായി പിഎൻആർ (PNR) നമ്പർ, സംഭവം നടന്ന തീയതിയും സമയവും, അടുത്തുള്ള സ്റ്റേഷന്റെ പേര്, മൊബൈൽ നമ്പർ എന്നിവ പങ്കുവെക്കാൻ ആവശ്യപ്പെട്ടു. എന്നാൽ വീഡിയോയിൽ കാണുന്ന യാത്രക്കാരുടെ പൂർണ്ണ വിവരങ്ങളോ സംഭവം നടന്നത് ഏത് ട്രെയിനിലാണെന്നോ ഉള്ള കാര്യങ്ങൾ ഇതുവരെ സ്വതന്ത്രമായി സ്ഥിരീകരിച്ചിട്ടില്ല.
