ലോകത്ത് ഏറ്റവും കൂടുതൽ ആളുകൾ കുടിക്കുന്ന പാനീയങ്ങളിൽ ഒന്നാണ് കാപ്പി. എന്നാൽ കാപ്പി വെറുതെ നമ്മളെ ഉണർവോടെ നിലനിർത്തുക മാത്രമല്ല ചെയ്യുന്നത് എന്നാണ് പുതിയ പഠനങ്ങൾ സൂചിപ്പിക്കുന്നത്. ദിവസവും കാപ്പി കുടിക്കുന്നത് കരളിനെ സംരക്ഷിക്കാനും ലിവർ കാൻസർ ഉൾപ്പെടെയുള്ള ഗുരുതരമായ കരൾ രോഗങ്ങളുടെ സാധ്യത കുറയ്ക്കാനും സഹായിക്കുമെന്ന് ഒരു വലിയ പഠനം കണ്ടെത്തിയിട്ടുണ്ട്.
ദിവസവും അഞ്ചോ അതിലധികമോ കപ്പ് കാപ്പി കുടിക്കുന്നവരിലാണ് ഇതിന്റെ ഏറ്റവും വലിയ ഗുണങ്ങൾ കണ്ടത്. എങ്കിൽപ്പോലും, എല്ലാവരും പെട്ടെന്ന് തന്നെ കാപ്പി കുടിക്കുന്നത് കൂട്ടണം എന്ന് ഇതിനർത്ഥമില്ലെന്ന് വിദഗ്ധർ വ്യക്തമാക്കുന്നു. കാപ്പി കുടിക്കുന്നതും കരളിന്റെ ആരോഗ്യവും തമ്മിൽ ശക്തമായ ബന്ധമുണ്ടെന്നാണ് ഈ കണ്ടെത്തലുകൾ കാണിക്കുന്നത്.
യുകെ ബയോബാങ്കിൽ നിന്നുള്ള ഏകദേശം 3.55,000 മുതിർന്ന ആളുകളെ പത്ത് വർഷത്തിലധികം നിരീക്ഷിച്ചാണ് ‘ക്ലിനിക്കൽ ഗ്യാസ്ട്രോഎൻട്രോളജി ആൻഡ് ഹെപ്പറ്റോളജി’ എന്ന ജേണലിൽ ഈ പഠനം പ്രസിദ്ധീകരിച്ചത്. കാപ്പിയും കരളിന്റെ ആരോഗ്യവും തമ്മിലുള്ള ഏറ്റവും വലിയ ഗവേഷണങ്ങളിൽ ഒന്നാണിത്. പങ്കെടുത്തവരുടെ കാപ്പി കുടിക്കുന്ന ശീലം, കരളിന്റെ ഇമേജിംഗ്, രക്തപരിശോധനകൾ, ദീർഘകാലത്തെ ആരോഗ്യ വിവരങ്ങൾ എന്നിവ ഗവേഷകർ പരിശോധിച്ചു. കൂടുതൽ കാപ്പി കുടിക്കുന്നത് സിറോസിസ്, ലിവർ കാൻസർ, കരൾ രോഗം മൂലമുള്ള മരണം എന്നിവയുടെ സാധ്യത കുറയ്ക്കുന്നതായി അവർ കണ്ടെത്തി. അത്ഭുതകരമെന്നു പറയട്ടെ, സാധാരണ കാപ്പിയും കഫീൻ ഇല്ലാത്ത കാപ്പിയും (decaffeinated coffee) ഒരുപോലെ സംരക്ഷണം നൽകുന്നുണ്ട്. ഇത് കാണിക്കുന്നത് കാപ്പിയിലെ കഫീനേക്കാൾ അതിലടങ്ങിയിരിക്കുന്ന സസ്യ സംയുക്തങ്ങളാണ് (plant compounds) കരളിന് കൂടുതൽ ഗുണം ചെയ്യുന്നത് എന്നാണ്.
കാപ്പി കുടിക്കുന്നത് കൂടുംതോറും ഗുരുതരമായ കരൾ രോഗങ്ങൾ വരാനുള്ള സാധ്യത കുറയുന്നതായി ഗവേഷകർ കണ്ടെത്തി. കാപ്പി കുടിക്കാത്തവരുമായി താരതമ്യം ചെയ്യുമ്പോൾ, ദിവസവും അഞ്ചോ അതിലധികമോ കപ്പ് കാപ്പി കുടിക്കുന്നവർക്ക് സിറോസിസ് വരാനുള്ള സാധ്യത 32 ശതമാനവും, ലിവർ കാൻസർ വരാനുള്ള സാധ്യത 47 ശതമാനവും, കരൾ രോഗം മൂലം മരിക്കാനുള്ള സാധ്യത 42 ശതമാനവും കുറവാണ്. ദിവസവും ഒന്നോ രണ്ടോ കപ്പ് കാപ്പി കുടിക്കുന്നവരിലും ചെറിയ തോതിൽ ഈ ഗുണങ്ങൾ കാണാനുണ്ട്. ലോസ് ആഞ്ചലസിലെ സിഡാർസ്-സിനായ് മെഡിക്കൽ സെന്ററിലെ ട്രാൻസ്പ്ലാന്റ് ഹെപ്പറ്റോളജിസ്റ്റും ഈ പഠനത്തിന്റെ പ്രധാന രചയിതാവുമായ ഡോ. ഹ്യുൻസോക്ക് കിം പറയുന്നത്, കാപ്പി കുടിക്കുന്നത് വെറുമൊരു നല്ല ജീവിതശൈലി ആയതുകൊണ്ടല്ല, മറിച്ച് അത് കരളിന്റെ ജീവശാസ്ത്രപരമായ ആരോഗ്യവുമായി നേരിട്ട് ബന്ധപ്പെട്ടിരിക്കുന്നു എന്ന് വ്യക്തമാക്കുന്ന ശാസ്ത്രീയ തെളിവുകൾ കണ്ടെത്താൻ കഴിഞ്ഞു എന്നാണ്.
കാപ്പിയിൽ കരളിന്റെ ആരോഗ്യത്തെ സഹായിക്കുന്ന നിരവധി പ്രകൃതിദത്ത ഘടകങ്ങൾ അടങ്ങിയിട്ടുണ്ടെന്നാണ് ശാസ്ത്രജ്ഞർ വിശ്വസിക്കുന്നത്. ഇതിലടങ്ങിയിരിക്കുന്ന ആന്റിഓക്സിഡന്റുകളും പോളിഫെനോളുകളും ശരീരത്തിലെ വീക്കവും (inflammation) കോശങ്ങൾക്കുണ്ടാകുന്ന കേടുപാടുകളും കുറയ്ക്കാൻ സഹായിക്കും. കൂടാതെ കരളിൽ കൊഴുപ്പ് അടിഞ്ഞുകൂടുന്നത് തടയാനും ഇത് നല്ലതാണ്. കഫീൻ ഇല്ലാത്ത കാപ്പിയിലും ഇതേ ഗുണങ്ങൾ കാണുന്നതിനാൽ കഫീൻ മാത്രമല്ല ഇതിന് കാരണം എന്ന് ഗവേഷകർ കരുതുന്നു.
കാപ്പിയിൽ പഞ്ചസാരയോ കൃത്രിമ മധുരങ്ങളോ ചേർക്കുന്നത് കാപ്പിയുടെ ഗുണം കുറയ്ക്കുമെന്നും പഠനത്തിൽ കണ്ടെത്തിയിട്ടുണ്ട്. മധുരം ചേർക്കുന്നത് കരളിന് അത്ര നല്ലതല്ലെന്നാണ് ഇമേജിംഗ് ടെസ്റ്റുകൾ കാണിക്കുന്നത്. അതിനാൽ പഞ്ചസാര ചേർക്കാതെയോ വളരെ കുറച്ച് മാത്രം ചേർത്തോ കാപ്പി കുടിക്കുന്നതാണ് കരളിന്റെ ആരോഗ്യത്തിന് കൂടുതൽ നല്ലത്. അമിതമായി പ്രോസസ്സ് ചെയ്ത ക്രീമറുകളും ഫ്ലേവറുകളും കാപ്പിയുടെ സ്വാഭാവിക ഗുണങ്ങളെ നശിപ്പിക്കും.
അതിനർത്ഥം എല്ലാവരും ദിവസവും അഞ്ച് കപ്പ് കാപ്പി കുടിക്കണം എന്നാണോ? ഒരിക്കലുമല്ല. ഉയർന്ന അളവിൽ കാപ്പി കുടിക്കുന്നത് കരൾ രോഗ സാധ്യത കുറയ്ക്കുന്നു എന്ന് കണ്ടെത്തിയെങ്കിലും, ഇതൊരു നിരീക്ഷണ പഠനം മാത്രമാണ്. അതായത് കാപ്പി കുടിക്കുന്നത് കരൾ രോഗങ്ങളെ നേരിട്ട് തടയുമെന്ന് ഇതിലൂടെ പൂർണ്ണമായി തെളിയിക്കപ്പെട്ടിട്ടില്ല. പുകവലി, മദ്യപാനം, ശരീരഭാരം തുടങ്ങിയ മറ്റ് ഘടകങ്ങൾ കൂടി ഇതിൽ പങ്കുവഹിക്കുന്നുണ്ടാകാം.
അതുകൊണ്ട് കാപ്പി കുടിക്കാത്ത ആളുകൾ കരൾ സംരക്ഷണത്തിനായി മാത്രം ദിവസവും അഞ്ച് കപ്പ് കാപ്പി കുടിച്ചു തുടങ്ങേണ്ടതില്ലെന്നാണ് വിദഗ്ധർ പറയുന്നത്. അമിതമായി കഫീൻ ഉള്ളിൽച്ചെന്നാൽ ഉത്കണ്ഠ, ഉറക്കക്കുറവ്, ഹൃദയമിടിപ്പ് കൂടുക, ദഹനക്കേട് എന്നിവ ഉണ്ടാകാൻ സാധ്യതയുണ്ട്. ഗർഭിണികളും മറ്റ് ആരോഗ്യപ്രശ്നങ്ങൾ ഉള്ളവരും കഫീന്റെ ഉപയോഗം പരിമിതപ്പെടുത്തേണ്ടതുണ്ട്.
