ഇന്ത്യ- ഇംഗ്ലണ്ട് ആദ്യ ഏകദിന മത്സരം കാണാൻ മുൻ ഇന്ത്യൻ ക്രിക്കറ്റ് ക്യാപ്റ്റൻ മഹേന്ദ്ര സിംഗ് ധോണി ബർമിംഗ്ഹാമിലെ എഡ്ജ്ബാസ്റ്റൺ സ്റ്റേഡിയത്തിലെ ഗാലറിയിൽ എത്തിയത് ആരാധകരെ ആവേശത്തിലാഴ്ത്തി. എന്നാൽ മത്സരത്തേക്കാളും ആരാധകരുടെ മനസ്സ് കീഴടക്കിയത് തൊട്ടടുത്തിരുന്ന ഒരു ചെറിയ കുട്ടിയുമായി ധോണി പങ്കിട്ട മനോഹരമായ നിമിഷമായിരുന്നു.
ഗാലറിയിലിരുന്ന് കളി ആസ്വദിക്കുന്നതിനിടയിൽ ആ കുട്ടി കഴിച്ചുകൊണ്ടിരുന്ന പോപ്കോണിൽ നിന്നും അല്പം തനിക്ക് തരാമോ എന്ന് ധോണി ചോദിക്കുന്ന ദൃശ്യങ്ങൾ ടിവി ക്യാമറകളിൽ പതിഞ്ഞു. വളരെ പെട്ടെന്നാണ് ഈ വീഡിയോ സോഷ്യൽ മീഡിയയിൽ വൈറലായത്. ടിവി ചാനൽ ഈ വീഡിയോ പങ്കുവെച്ചുകൊണ്ട് കുറിച്ചത്, ‘താൻ ആരുടെ അടുത്താണ് ഇരുന്നതെന്ന് ഭാവിയിൽ ലോകത്തോട് പറയാൻ ഈ കുട്ടിക്ക് ഏറ്റവും മികച്ച ഒരു കഥയുണ്ടാകും’ എന്നാണ്.
ക്രിക്കറ്റ് ഇതിഹാസത്തിനൊപ്പം ഇരുന്ന് കളി കാണാൻ കഴിഞ്ഞ ആ കുട്ടി ഭാഗ്യവാനാണെന്നാണ് ആരാധകർ സോഷ്യൽ മീഡിയയിൽ കുറിക്കുന്നത്. ‘ധോണി ആ സീറ്റിനെ ജീവിതകാലം മുഴുവൻ വീമ്പ് പറയാവുന്ന ഒന്നാക്കി മാറ്റി’ എന്ന് ഒരു ആരാധകൻ കുറിച്ചപ്പോൾ, കോലി ധോണിയെ ലണ്ടനിൽ താമസിക്കാൻ സമ്മതിപ്പിച്ചോ എന്നാണ് മറ്റൊരാൾ തമാശയായി ചോദിച്ചത്.
നേരത്തെ ജൂലൈ 7-ന് തന്റെ ജന്മദിനത്തിലും ഇന്ത്യ-ഇംഗ്ലണ്ട് ട്വന്റി-20 മത്സരം കാണാൻ ധോണി എത്തിയിരുന്നു. അന്താരാഷ്ട്ര ക്രിക്കറ്റിൽ നിന്ന് വിരമിച്ചെങ്കിലും ധോണിയുടെ സ്റ്റേഡിയത്തിലെ സാന്നിധ്യം ഇന്നും ആരാധകരിൽ വലിയ ആവേശമാണ് ഉണ്ടാക്കുന്നത്. മത്സരത്തിനപ്പുറം ധോണിയും കുട്ടിയും തമ്മിലുള്ള ഈ സ്നേഹപ്രകടനം സോഷ്യൽ മീഡിയയിൽ വലിയ ചർച്ചയായി മാറിയിരിക്കുകയാണ്.
