ഭാര്യാമാതാവിന്റെ ശവസംസ്കാര ചടങ്ങുകളിൽ പങ്കെടുക്കുന്നതിനിടെ, ഗ്രേറ്റർ നോയിഡ സ്വദേശിയായ 30-കാരൻ ദീപക് ശർമ്മയെ സരയൂ നദിയിൽ നിന്ന് മുതല വലിച്ചിഴച്ചു കൊണ്ടുപോയി. ഉത്തർപ്രദേശിലെ ഗോണ്ട ജില്ലയിലാണ് സംഭവം. പ്രദേശത്ത് മുതലകളുടെ ശല്യമുണ്ടെന്ന് നദീതീരത്തേക്ക് പോകുന്നതിന് മുൻപ് ഗ്രാമവാസികൾ ഇദ്ദേഹത്തിന് മുന്നറിയിപ്പ് നൽകിയിരുന്നതായി ദൃക്സാക്ഷികൾ പറഞ്ഞു. എസ്.ഡി.ആർ.എഫ് (SDRF) സംഘവും പ്രാദേശിക അധികാരികളും ചേർന്ന് വൈകിട്ട് വൈകും വരെ തിരച്ചിൽ നടത്തിയെങ്കിലും ഇദ്ദേഹത്തെ കണ്ടെത്താനായില്ല.
ക്യാൻസർ ബാധിച്ച് മരണമടഞ്ഞ അമ്മായിയമ്മ ഊർമ്മിളാ ദേവിയുടെ മരണവാർത്ത അറിഞ്ഞാണ് ദീപക് ഭാര്യവീട്ടിൽ എത്തിയത്. ഊർമ്മിളയുടെ ഭർത്താവ് നേരത്തെ മരിച്ചിരുന്നു. ഗ്രേറ്റർ നോയിഡയിലെ പാരി ചൗക്കിനടുത്തുള്ള സിഗ്മ-2 പ്രദേശത്ത് താമസിച്ചിരുന്ന ദീപക് ഒരു സ്വകാര്യ കമ്പനിയിലാണ് ജോലി ചെയ്തിരുന്നത്. ഭാര്യ രേഖയും നാല് വയസ്സുള്ള മകൾ നിക്കിയുമടങ്ങുന്നതാണ് ഇദ്ദേഹത്തിന്റെ കുടുംബം. ഊർമ്മിളയുടെ മരണവിവരമറിഞ്ഞ് ചൊവ്വാഴ്ച വൈകിട്ടോടെയാണ് കുടുംബം ഗോണ്ടയിലെ ഉമ്രി ഗ്രാമത്തിൽ എത്തിയത്.
ബുധനാഴ്ച ഉച്ചയ്ക്ക് പന്ത്രണ്ട് മണിയോടെ സനൗലി മുഹമ്മദ്പൂർ മേഖലയിലെ സരയൂ നദിക്കരയിലുള്ള ഉദയ്ഭാൻ പാഹിക്ക് സമീപമാണ് സംഭവം നടന്നത്. ശവസംസ്കാര ചടങ്ങുകൾക്കായി ചിതയൊരുക്കാൻ സഹായിച്ച ശേഷം നദീതീരത്ത് നിൽക്കുകയായിരുന്നു ദീപക്. പെട്ടെന്ന് നദിയിൽ നിന്ന് ഉയർന്നുവന്ന ഒരു മുതല ദീപകിനെ കടിച്ചെടുത്ത് വെള്ളത്തിലേക്ക് വലിച്ചിഴച്ചു കൊണ്ടുപോകുകയായിരുന്നു. മറ്റുള്ളവർക്ക് പ്രതികരിക്കാൻ പോലും സമയം ലഭിച്ചില്ല.
ഈ ഭാഗത്ത് മുതലകളുടെ ശല്യമുള്ളതിനാൽ നദിയിലിറങ്ങരുതെന്ന് ചടങ്ങിൽ പങ്കെടുത്തവർ ദീപകിന് മുന്നറിയിപ്പ് നൽകിയിരുന്നതായി അവിടെയുണ്ടായിരുന്ന രാജേഷ് ശുക്ല പറഞ്ഞു. എന്നാൽ ദീപക് ഇത് കാര്യമാക്കാതെ വെള്ളത്തിനടുത്തേക്ക് പോവുകയായിരുന്നു. ദീപകിന്റെ നിലവിളി കേട്ട് ബന്ധുക്കളും ഗ്രാമവാസികളും ഓടിക്കൂടി. പ്രാദേശിക തോണിക്കാരും നാട്ടുകാരും ഉടൻ തന്നെ തിരച്ചിൽ ആരംഭിച്ചെങ്കിലും അദ്ദേഹത്തെ കണ്ടെത്താനായില്ല.
സംഭവമറിഞ്ഞ് പൊലീസും ജില്ലാ ഭരണകൂട ഉദ്യോഗസ്ഥരും റവന്യൂ വകുപ്പ് സംഘവും സ്ഥലത്തെത്തി. തിരച്ചിൽ ശക്തമാക്കുന്നതിനായി ലഖ്നൗവിൽ നിന്നുള്ള സംസ്ഥാന ദുരന്ത നിവാരണ സേനയെയും (SDRF) അധികൃതർ വിളിച്ചുവരുത്തി. ഈ പ്രദേശത്ത് മുതലകളുടെ സാന്നിധ്യമുള്ളതിനാൽ നദിയിലിറങ്ങരുതെന്ന് ഗ്രാമവാസികൾക്ക് അധികൃതർ നിരന്തരം മുന്നറിയിപ്പ് നൽകിവരാറുള്ളതാണ്.
