ഡൽഹിയിലെ ഒരു സാധാരണ സലൂണില് കയറി ഫേഷ്യൽ മസാജ് ചെയ്യുന്ന റഷ്യൻ സഞ്ചാരിയായ യുവതിയുടെ വീഡിയോയാണ് ഇപ്പോള് സോഷ്യല് മീഡിയയില് വൈറൽ. ഇവിടെ വെറും 100 രൂപയ്ക്ക് (ഏകദേശം 1 ഡോളർ) ഒരു കിടിലന് ഫെയിസ് മസാജ് ചെയ്ത അനുഭവമാണ് യുവതി പങ്കുവയ്ക്കുന്നത്. വിദേശത്ത് ഏകദേശം 200 ഡോളർ വരെ ചെലവുവരുന്നതാണ് ഈ ഫേഷ്യല്.
“ന്യൂഡൽഹിയിൽ നിന്ന് ഫേഷ്യൽ മസാജ് ചെയ്യുന്നു, ഇതൊരു വേറിട്ട അനുഭവം തന്നെയാണ്” എന്ന കുറിപ്പോടെ പങ്കുവെച്ച ഈ വീഡിയോ ചുരുങ്ങിയ സമയം കൊണ്ട് ആയിരക്കണക്കിന് ആളുകളാണ് കണ്ടത്. ഡൽഹിയിലെ തെരുവുകളിലെയും സാധാരണ സലൂണുകളിലെയും പരമ്പരാഗത സൗന്ദര്യപരിപാലന രീതികളെയാണ് ഈ വീഡിയോ ലോകത്തിന് മുന്നിൽ കാണിച്ചുകൊടുത്തത്.
വലിയ എസി മുറികളോ ശാന്തമായ സംഗീതമോ ഒന്നുമില്ലാത്ത ഡൽഹിയിലെ ഒരു സാധാരണ ബാര്ബര്ഷോപ്പിലാണ് ഈ വിദേശി വനിത കയറിച്ചെന്നത്. കോൾഡ് ക്രീമും ഹെർബൽ ലോഷനുമൊക്കെ ഉപയോഗിച്ച് മുഖത്ത് അമർത്തിത്തഴുകിയും, താടിയെല്ലുകളിൽ പ്രത്യേക രീതിയിൽ മസാജ് ചെയ്തും, തലയിൽ താളത്തിൽ തട്ടിയുമുള്ള അവിടുത്തെ പരമ്പരാഗത രീതി അവർക്ക് തികച്ചും പുതിയൊരു അനുഭവമായിരുന്നു.
എന്നാൽ, ഇതിനേക്കാളൊക്കെ ഈ വിദേശിയെ അത്ഭുതപ്പെടുത്തിയത് ഇതിന്റെ നിരക്കാണ്. ഇത്തരം സേവനങ്ങൾക്ക് വൻ തുക ഈടാക്കുന്ന വിദേശ രാജ്യങ്ങളുമായി താരതമ്യം ചെയ്യുമ്പോൾ, കേവലം 100 രൂപ മാത്രമാണ് (ഏകദേശം 1 ഡോളർ) ഈ മസാജിന് അവിടെയായത്. ന്യൂയോർക്കിലോ ലണ്ടനിലോ ഇത്തരം ഒരു മസാജിന് 150 മുതൽ 200 ഡോളർ വരെ ചെലവാകുമ്പോഴാണ് ഡൽഹിയിലെ സാധാരണ കടയിൽ വളരെ തുച്ഛമായ തുകയ്ക്ക് മികച്ച സേവനം ലഭിക്കുന്നത്.
വീഡിയോ വൈറലായതോടെ വൻ പ്രതികരണങ്ങളാണ് സോഷ്യൽ മീഡിയയിൽ ഉയർന്നുവന്നത്. ഡൽഹിയിലെ സാധാരണക്കാരായ തൊഴിലാളികളുടെ പ്രവീണ്യത്തെയും ആതിഥ്യമര്യാദയെയും അഭിനന്ദിച്ച് നിരവധി പേർ രംഗത്തെത്തി. തങ്ങളുടെ സ്ട്രീറ്റ് സർവീസ് സംസ്കാരത്തെ പുകഴ്ത്തി ഇന്ത്യക്കാരും, ഡൽഹിയിലെ ഇത്തരം സലൂണുകൾ സന്ദർശിക്കുമെന്ന് പ്രതിജ്ഞയെടുത്ത് വിദേശികളും കമന്റുകൾ കുറിച്ചു.
വലിയ തുക മുടക്കിയുള്ള സൗന്ദര്യവർദ്ധക പരിചരണങ്ങളുടെ ഈ കാലത്ത്, യഥാർത്ഥ കഴിവുകൾക്കും പരിചരണത്തിനും വലിയ വിലയുടെ ആവശ്യമില്ലെന്ന് ഈ സംഭവം തെളിയിക്കുന്നു. ഈ വീഡിയോ ലക്ഷക്കണക്കിന് ആളുകളിലേക്ക് എത്തുമ്പോൾ, ഇന്ത്യയിലെ ഏറ്റവും മികച്ച അനുഭവങ്ങൾ പലപ്പോഴും പ്രതീക്ഷിക്കാത്ത സ്ഥലങ്ങളിലാണ് ഒളിച്ചിരിക്കുന്നത് എന്ന് ഒരിക്കൽ കൂടി വ്യക്തമാകുകയാണ്.
