ഐപിഎല്ലിൽ രാജസ്ഥാൻ റോയൽസിനെ 77 റൺസിന് തകർത്ത് ഗുജറാത്ത് ടൈറ്റൻസ് ഉജ്ജ്വല വിജയം സ്വന്തമാക്കി. ഗുജറാത്ത് ഉയർത്തിയ 230 റൺസ് എന്ന കൂറ്റൻ ലക്ഷ്യം പിന്തുടർന്ന രാജസ്ഥാൻ 152 റൺസിന് എല്ലാവരും പുറത്തായി. നാല് വിക്കറ്റുകൾ വീഴ്ത്തിയ റാഷിദ് ഖാനാണ് രാജസ്ഥാന്റെ തകർച്ചയ്ക്ക് ആക്കം കൂട്ടിയത്. ഇതോടെ ജയ്പുരിൽ നടന്ന മത്സരത്തിൽ തകർപ്പൻ ജയത്തോടെ ഗുജറാത്ത് കരുത്തുകാട്ടി.
മറുപടി ബാറ്റിങ് തുടങ്ങിയ രാജസ്ഥാന് വേണ്ടി കൗമാരതാരം വൈഭവ് സൂര്യവംശി തകർപ്പൻ തുടക്കമാണ് നൽകിയത്. ആദ്യ രണ്ട് ഓവറിൽ തന്നെ ടീം സ്കോർ 26-ൽ എത്തിച്ച വൈഭവ്, മുഹമ്മദ് സിറാജിനെതിരെ ഫോറുകൾ പായിച്ച് ആരാധകരെ ആവേശം കൊള്ളിച്ചു. എന്നാൽ 16 പന്തിൽ 36 റൺസെടുത്ത താരത്തെ സിറാജ് തന്നെ പുറത്താക്കി. വൈഭവിനു പിന്നാലെ വന്ന പ്രമുഖ ബാറ്റർമാർ പരാജയപ്പെട്ടതോടെ രാജസ്ഥാൻ സമ്മർദ്ദത്തിലായി.
യശസ്വി ജയ്സ്വാൾ, ഷിമ്രോൺ ഹെറ്റ്മയർ, ഡൊണോവൻ ഫെരെയ്ര എന്നിവർ ചെറിയ സ്കോറിന് പുറത്തായി നിരാശപ്പെടുത്തി. 24 റൺസെടുത്ത ധ്രുവ് ജുറേലും 15 റൺസെടുത്ത ശുഭം ദുബെയും പൊരുതിയെങ്കിലും സ്കോർ ഉയർത്താനായില്ല. 38 റൺസെടുത്ത രവീന്ദ്ര ജഡേജ അല്പനേരം പിടിച്ചുനിന്നെങ്കിലും റാഷിദ് ഖാൻ ജഡേജയെയും വീഴ്ത്തിയതോടെ രാജസ്ഥാന്റെ പതനം പൂർത്തിയായി. ഒടുവിൽ 152 റൺസിൽ രാജസ്ഥാൻ ഇന്നിങ്സ് അവസാനിച്ചു.
നേരത്തെ ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഗുജറാത്ത് നിശ്ചിത 20 ഓവറിൽ നാല് വിക്കറ്റ് നഷ്ടത്തിൽ 229 റൺസെന്ന വലിയ സ്കോർ പടുത്തുയർത്തി. സായ് സുദർശനും ക്യാപ്റ്റൻ ശുഭ്മാൻ ഗില്ലും നൽകിയ വെടിക്കെട്ട് തുടക്കമാണ് ടീമിന് തുണയായത്. പവർപ്ലേ ഓവറുകളിൽ തന്നെ ഇരുവരും ചേർന്ന് 82 റൺസ് അടിച്ചുകൂട്ടി. ഒൻപതാം ഓവറിൽ നൂറ് കടന്ന ഗുജറാത്ത് നിരയിൽ സായ് സുദർശൻ 55 റൺസെടുത്ത് പുറത്തായി.
പിന്നീട് ക്രീസിലെത്തിയ ജോസ് ബട്ട്ലർ 13 റൺസിന് പുറത്തായെങ്കിലും ഗിൽ അക്രമണ ബാറ്റിങ് തുടർന്നു. 44 പന്തിൽ നിന്ന് 84 റൺസെടുത്ത ഗില്ലിന്റെ പ്രകടനമാണ് ടീമിനെ കൂറ്റൻ സ്കോറിലേക്ക് നയിച്ചത്. അവസാന ഓവറുകളിൽ വാഷിങ്ടൺ സുന്ദറും (37 റൺസ്) രാഹുൽ തെവാട്ടിയയും (14 റൺസ്) ചേർന്ന് നടത്തിയ മിന്നൽ പ്രകടനം ഗുജറാത്തിനെ 229-ൽ എത്തിച്ചു. രാജസ്ഥാന് വേണ്ടി ബ്രിജേഷ് ശർമ രണ്ട് വിക്കറ്റുകൾ നേടി.
