ഭൂരിഭാഗം കൗമാരക്കാരും സ്കൂളിൽ പോകാൻ തയ്യാറെടുക്കുന്ന സമയത്ത്, 17 വയസ്സുകാരിയായ റിദ്ധി ചൗഹാൻ പ്രഭാത പരിശീലനത്തിനായി മുന്നൂറോളം കേഡറ്റുകളെ നയിച്ചുകൊണ്ട് പരേഡ് ഗ്രൗണ്ടിൽ എത്തിയിട്ടുണ്ടാകും. ക്വീൻസിലെ ബെഞ്ചമിൻ എൻ. കാർഡോസോ ഹൈസ്കൂളിലെ ഈ ഇന്ത്യൻ-അമേരിക്കൻ വിദ്യാർത്ഥിനി, തൻ്റെ സ്കൂളിലെ നേവി ജൂനിയർ റിസർവ് ഓഫീസേഴ്സ് ട്രെയിനിംഗ് കോർപ്സ് (NJROTC) യൂണിറ്റിലെ ഏറ്റവും ഉയർന്ന വിദ്യാർത്ഥി നേതൃപദവിയായ ബറ്റാലിയൻ കമാൻഡിംഗ് ഓഫീസറായി സേവനമനുഷ്ഠിക്കുകയാണ്. യുണൈറ്റഡ് സ്റ്റേറ്റ്സ് നേവിയിൽ ഓഫീസറാകുക എന്ന തന്റെ വലിയ സ്വപ്നത്തിലേക്കുള്ള ചുവടുവെപ്പായി നേവൽ അക്കാദമി പ്രിപ്പറേറ്ററി സ്കൂളിൽ റിദ്ധി പ്രവേശനം നേടിയിട്ടുണ്ടെന്ന് എ.എൻ.ഐ റിപ്പോർട്ട് ചെയ്യുന്നു.
തൻ്റെ ആത്മവിശ്വാസവും നേതൃപാടവവും വളർത്തിയെടുക്കുന്നതിനായാണ് റിദ്ധി ആദ്യവർഷത്തിൽ തന്നെ NJROTC പ്രോഗ്രാമിൽ ചേർന്നത്. അക്കാദമിക് കമാൻഡർ, സ്റ്റെം കമാൻഡർ, പ്ലാറ്റൂൺ ലീഡർ, ഇൻസ്പെക്ഷൻ കമാൻഡർ തുടങ്ങി നിരവധി പദവികൾ മികച്ച രീതിയിൽ കൈകാര്യം ചെയ്ത ശേഷമാണ് റിദ്ധി ബറ്റാലിയൻ കമാൻഡിംഗ് ഓഫീസർ പദവിയിലേക്ക് ഉയർന്നത്. ഇന്ന് ബറ്റാലിയന്റെ ദൈനംദിന പ്രവർത്തനങ്ങൾ നിയന്ത്രിക്കുക, പരിശീലന സെഷനുകൾക്ക് മേൽനോട്ടം വഹിക്കുക, ജൂനിയർ കേഡറ്റുകൾക്ക് മാർഗ്ഗനിർദ്ദേശം നൽകുക എന്നിവയാണ് റിദ്ധിയുടെ ചുമതലകൾ. ആഴ്ചയിൽ നാല് ദിവസവും ക്ലാസുകൾ തുടങ്ങുന്നതിന് മുൻപ്, രാവിലെ 7 മണിക്ക് തന്നെ റിദ്ധി പരേഡ് പരിശീലനത്തിനായി സ്കൂളിൽ എത്താറുണ്ട്.
നേതൃത്വത്തിനപ്പുറം പഠനത്തിലും മറ്റ് മേഖലകളിലും റിദ്ധി മികച്ച നേട്ടങ്ങൾ കൈവരിച്ചിട്ടുണ്ട്. അക്കാദമിക് കമാൻഡർ എന്ന നിലയിൽ, തൻ്റെ സ്കൂൾ ടീമിനെ തുടർച്ചയായി രണ്ട് വർഷം ലീഡർഷിപ്പ് ആൻഡ് അക്കാദമിക് ബൗളിന്റെ രണ്ടാം റൗണ്ടിൽ എത്തിക്കാൻ റിദ്ധിക്ക് കഴിഞ്ഞു. കൂടാതെ ഒരു ദേശീയ അക്കാദമിക് പരീക്ഷയിൽ സ്കൂൾ യൂണിറ്റ് ഒന്നാം സ്ഥാനം നേടുന്നതിലും റിദ്ധി പങ്കുവഹിച്ചു. കേഡറ്റുകൾക്ക് റോബോട്ടിക്സിലും എഞ്ചിനീയറിംഗിലും പ്രായോഗിക പരിചയം നൽകുന്നതിനായി, ബറ്റാലിയന്റെ ആദ്യത്തെ ‘സീപെർച്ച്’ (SeaPerch) അണ്ടർവാട്ടർ റോബോട്ട് വികസിപ്പിക്കുന്നതിനും റിദ്ധി നേതൃത്വം നൽകി.
മറ്റുള്ളവരെ സേവിക്കുന്നതും മാതൃകയാകുന്നതുമാണ് നേതൃത്വം എന്ന് റിദ്ധി വിശ്വസിക്കുന്നു. മഹന്ത് സ്വാമി മഹാരാജ് പകർന്നുനൽകിയ വിനയം, കാരുണ്യം, സ്വാർത്ഥതയില്ലാത്ത സേവനം എന്നീ മൂല്യങ്ങളും, BAPS സ്വാമിനാരായൺ സൻസ്ഥയുമായുള്ള തൻ്റെ ബന്ധവും തന്റെ നേതൃത്വ ശൈലിയെ രൂപപ്പെടുത്തുന്നതിൽ പ്രധാന പങ്ക് വഹിച്ചിട്ടുണ്ടെന്ന് റിദ്ധി പറയുന്നു. രാജസ്ഥാനിലെ ജയ്പൂരിൽ വേരുകളുള്ള രുചികയുടെയും ദിലീപ് ചൗഹാന്റെയും മകളായ റിദ്ധി, പ്രിപ്പറേറ്ററി പ്രോഗ്രാം പൂർത്തിയാക്കിയ ശേഷം യുണൈറ്റഡ് സ്റ്റേറ്റ്സ് നേവൽ അക്കാദമിയിൽ ചേരാനാണ് ആഗ്രഹിക്കുന്നത്. വെറും 17-ാം വയസ്സിൽ നൂറുകണക്കിന് കേഡറ്റുകളെ നയിക്കുകയും അനേകം യുവതലമുറയ്ക്ക് പ്രചോദനമാകുകയും ചെയ്ത റിദ്ധിയുടെ ജീവിതം, കഠിനാധ്വാനവും അച്ചടക്കവുമുണ്ടെങ്കിൽ ചെറുപ്പക്കാർക്ക് വലിയ ലക്ഷ്യങ്ങൾ കൈവരിക്കാനാകുമെന്ന് ഓർമ്മിപ്പിക്കുന്നു.
