ഹരിയാനയിൽ ഹോളി ആഘോഷങ്ങൾക്കിടെ പശുവിനെ നിർബന്ധിതമായി മദ്യം കുടിപ്പിക്കുകയും മദ്യപിച്ചെത്തിയവർ സഞ്ചരിച്ച വണ്ടി വലിപ്പിക്കുകയും ചെയ്തതായി പരാതി. രാജ്യത്തുടനീളം ഹോളിയുടെ ആവേശവും സന്തോഷവും നിറഞ്ഞുനിൽക്കുമ്പോഴും, ഓരോ വർഷവും മൃഗങ്ങൾക്കെതിരെയുള്ള ക്രൂരതകൾ റിപ്പോർട്ട് ചെയ്യപ്പെടുന്നത് പതിവാകുകയാണ്. അത്തരമൊരു ഞെട്ടിക്കുന്ന സംഭവമാണ് ഇപ്പോൾ ഹരിയാനയിൽ നിന്നും പുറത്തുവരുന്നത്.
മദ്യപിച്ച് ലക്കുകെട്ട ഒരു സംഘം ആളുകൾ പശുവിനെക്കൊണ്ട് തങ്ങൾ സഞ്ചരിച്ച വണ്ടി വലിപ്പിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. വണ്ടിയിൽ ഇരിക്കുന്നവർക്കിടയിൽ വെച്ച് രണ്ടുപേർ ചേർന്ന് പശുവിന്റെ വായ ബലമായി തുറന്ന് മദ്യം അകത്തേക്ക് ഒഴിച്ചു കൊടുക്കുന്നതും വീഡിയോയിൽ വ്യക്തമാണ്. കണ്ടുനിന്നവർ ഇത് തടയാൻ ശ്രമിക്കാതെ കാഴ്ചക്കാരായി നിൽക്കുകയായിരുന്നു. ‘StreetdogsofBombay’ എന്ന ഇൻസ്റ്റാഗ്രാം പേജ് പങ്കുവെച്ച ഈ വീഡിയോ അപ്ലോഡ് ചെയ്ത് ഒരു മണിക്കൂറിനുള്ളിൽ തന്നെ മുപ്പത്തിയാറായിരത്തിലധികം പേർ കണ്ടു കഴിഞ്ഞു.
ധുലേതി, ദുലന്തി, രംഗ്വാലി ഹോളി എന്നിങ്ങനെയും അറിയപ്പെടുന്ന ഈ ഉത്സവം ഹിന്ദു കലണ്ടർ പ്രകാരം ഓരോ വർഷവും വ്യത്യസ്ത തീയതികളിലാണ് വരുന്നത്. ഐതീഹ്യമനുസരിച്ച് ഈ വർഷം മാർച്ച് 2-ന് ഹോളികാ ദഹനവും മാർച്ച് 3 ബുധനാഴ്ച ഹോളിയും ആഘോഷിക്കുന്നു. തിന്മയ്ക്ക് മേൽ നന്മ നേടിയ വിജയത്തിന്റെ പ്രതീകമായ ഹോളി, ഗുജിയ, മാൽപുവ തുടങ്ങിയ പരമ്പരാഗത വിഭവങ്ങളും സംഗീതവും നിറങ്ങളുമായാണ് ജനങ്ങൾ ആഘോഷിക്കാറുള്ളത്. പരസ്പരം നിറങ്ങൾ പുരട്ടിയും വെള്ളം തെറിച്ചും സൗഹൃദം പുതുക്കുന്ന ഈ ഉത്സവത്തിനിടയിലാണ് മൃഗങ്ങൾക്കെതിരെയുള്ള ഇത്തരം അതിക്രമങ്ങൾ വൻ പ്രതിഷേധത്തിന് ഇടയാക്കുന്നത്.
